ភ្នំពេញ៖ អគ្គបញ្ជាការដ្ឋានកងយោធពលខេមរភូមិន្ទ(ខភម)ថ្មី នឹងចាប់ផ្តើមសាងសង់នាពេលឆាប់ៗខាងមុខនេះ នៅលើផ្ទៃដីចំនួន ៧៤ហិកតា ដែលស្ថិតនៅតំបន់បឹងតាមោក ខណ្ឌព្រែកព្នៅ រាជធានីភ្នំពេញ ដោយអគ្គបញ្ជាការដ្ឋានថ្មីនេះនឹងសាងសង់ចែកចេញជាបីតំបន់ មានកន្លែងព្យុះហយាត្រារបស់កងទ័ព រួមទាំងមានកន្លែងស្នាក់នៅរបស់កងទ័ពមួយចំនួនផងដែរ។
យោងតាមរបាយការណ៍នៅក្នុងកិច្ចប្រជុំដែលដឹកនាំដោយសម្តេចពិជ័យសេនា ទៀ បាញ់ ឧបនាយករដ្ឋមន្រ្តីរដ្ឋមន្រ្តីក្រសួងការពារជាតិកម្ពុជា នាព្រឹកថ្ងៃទី៨ ខែកញ្ញា ឆ្នាំ២០២២នេះ បានឲ្យដឹងថា អគ្គបញ្ជាការដ្ឋានថ្មីនេះ នឹងមានកន្លែងសម្រាប់កិច្ចការងារកងទ័ពជាច្រើន ដូចជាទីលានសម្រាប់ប្រារព្ធពិធី ផ្លូវការផ្សេងៗ ទីតាំងយុទ្ធសាស្ត្រយូអង្វែងរបស់កងយោធពលខេមរៈភូមិន្ទ និងកន្លែងធ្វើព្យុះហយាត្រារបស់កងទ័ពជាដើម។
តាមសេចក្តីរាយការណ៍របស់ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ នឹងជាគណៈកម្មការរៀបចំសាងសង់អគាររដ្ឋបាល អគ្គបញ្ជាការដ្ឋានថ្មី បានបញ្ជាក់ថា គណៈកម្មការបានសហការជាមួយក្រុមការងារនៃក្រសួងដែនដី នគរូបនីយកម្ម និងសំណង់ បានធ្វើការប្រជុំពិភាក្សាគ្នាយ៉ាងល្អិតល្អន់ ជាច្រើនលើកច្រើនសារ នឹងធ្វើការប្រមូលផ្ដុំរាល់គំនិតជាច្រើនពីថ្នាក់ដឹកនាំតាមរចនាបថបច្ចេកទេសយោធា ព្រមទាំងបានដាក់ឆ្លង ថ្នាក់ដឹកនាំអគ្គមេបញ្ជាការ នៃកងយោធពលខេមរៈភូមិន្ទ ថ្នាក់ដឹកនាំក្រសួងការពារជាតិ និងប្រមុខរាជរដ្ឋាភិបាលដើម្បីពិនិត្យ និងសម្រេចផងដែរ។
នាយឧត្តមសេនីយ៍ ឥត សារ៉ាត់ បានបន្ថែមទៀតថា តាមការគ្រោងទុក សំណង់អគាររដ្ឋបាលអគ្គបញ្ជាការដ្ឋានថ្មីនេះ គ្រោងនឹងសង់លើផ្ទៃដីសរុបប្រមាណជាជាង ៧៤ហិកតា ដែលមានប្លង់ទីតាំងរួម ចែកចេញជាបីតំបន់ ក្នុងនោះតំបន់ទី១ គ្រោងនឹងសាងសង់ទីលានសួនច្បារ និងអគាររដ្ឋបាលអគ្គបញ្ជាការ ដែលមានកម្ពស់៩ជាន់ សាងសង់សាលប្រជុំធំ ដែលអាចចំណុះមនុស្សបានរហូតដល់ទៅ ២១៤៥នាក់ «កៅអី».អគារមន្ទីរអដ្ឋកោណថ្នាក់យុទ្ធសាស្ត្រសម្រាប់ប្រើប្រាស់កម្រិតធម្មតា ទី១ ទី២ និងទី៣ និងកម្រិតយុទ្ធសាស្ត្រជាតិ ដែលចំពោះមុខគ្រោងនឹងរៀបចំអគារ មានកម្ពស់បីជាន់ ។
នៅផ្នែកសង្ខាង នៃអគាររដ្ឋបាលអគ្គបញ្ជាការថ្មីក៏គ្រោងនឹងរៀបចំកន្លែងតាំងពិព័រណ៍របស់អគ្គបញ្ជាការដ្ឋាន គ្រោងរៀបចំចំណតយានយន្តនៅផ្នែកសួនក្បែរផ្លូវខាងក្នុង ដែលអាចចតរថយន្តបានចំនួន ៦៦០ គ្រឿង និងរៀបចំចំណតទូចចក្រយានយន្ត នៅក្បែរផ្លូវជាប់របងសង្ខាង ដែលអាចចតទោចក្រយានយន្តបានចំនួន៤៤០គ្រឿង ។
ជាមួយគ្នានោះដែរគណៈកម្មការ ក៏នឹងគ្រោងសាងសង់នៅអគារនិវេសនដ្ឋានសម្រាប់ថ្នាក់ដឹកនាំអគ្គមេបញ្ជាការ និងនាយសេនាធិការចម្រុះចំនួន ២ខ្នង អមសង្ខាងនៃអគារអដ្ឋកោណប៉ែកខាងក្រោយជាប់នឹងរបងតំបន់ទី២។រីឯតំបន់ទីបីគ្រោងនិងសាងសង់ទីលាន និងវេទិកាសម្រាប់ធ្វើពិធីព្យុហយាត្រា ក្នុងពិធីបុណ្យធំៗ និងអគារស្នាក់នៅរបស់នាយទាហាន នាយទាហានរង និងពលទាហាន កងការពារ កងអន្តរាគមន៍ និងទីបញ្ជាការកងពលតូច និងផ្ទះស្នាក់នៅរបស់កងអន្តរាគមន៍ រួមនឹងដីបម្រុងទុក្ខសម្រាប់ដាំដើមឈើ នឹងនៅមានហេដ្ឋារចនាសម្ព័ន្ធនានាជាច្រើនទៀតដែលនឹងត្រូវសាងសង់ឡើងសម្រាប់អគ្គបញ្ជាការដ្ឋានថ្មីនេះផងដែរ ។
ថ្លែងនៅក្នុងកិច្ចប្រជុំនោះសម្ដេចពិជ័យសេនា ទៀ បាញ់ បានជំរុញឲ្យក្រុមការងារជំនាញបច្ចេកទេសពន្លឿនការសិក្សាគម្រោង និងចាប់ផ្ដើមសាងសង់ឲ្យបានឆាប់ និងស្របតាមលក្ខណៈបទដ្ឋានស្តង់ដាបច្ចេកទេសនៃសំណង់ មានទាំងគុណភាព សោភ័ណភាព ធានាដល់ការប្រើប្រាស់ជាយុទ្ធសាស្ត្រយោធាយូរអង្វែង ទៅថ្ងៃអនាគតសម្រាប់កូនចៅជំនាន់ក្រោយៗទៀត៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
