ឧត្តរមានជ័យ៖ បើតាមការឱ្យដឹងពីឯកឧត្តម ទេសរដ្ឋមន្រ្តី គន់ គីម អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់BTV ថា បន្ទាប់ពីមានភ្លៀងធ្លាក់រយៈពេលជិតមួយសប្តាហ៍ ក្នុងឃុំអន្លង់វែង ស្រុកអន្លង់វែង មានការជន់លិចផ្ទះសម្បែងប្រជាពលរដ្ឋប្រមាណ ១០គ្រួសារ ដែលរស់នៅប្របតាមស្ទឹង និងទីទួលទំនាបមួយចំនួន។

ឯកឧត្តម ទេសរដ្ឋមន្រ្តី បញ្ជាក់ថា យោងតាមការព្យាករណ៍របស់ក្រសួងធនធានទឹក​ និងឧតុនិយម សង្កេតឃើញថា ខេត្តតាមបណ្តោយព្រំដែនកម្ពុជា-ថៃ​ មានភ្លៀងបន្តធ្លាក់តែតំបន់មួយចំនួន ប៉ុន្តែ​ពុំទាន់​មានស្ថានភាពធ្ងន់ធ្ងរនោះទេ។

ឯកឧត្តម ទេសរដ្ឋមន្រ្តី បន្ថែមថា ភ្លាមៗបន្ទាប់ពីជំនន់ទឹកភ្លៀងបង្កផលប៉ះពាល់​ផ្ទះសម្បែង​បងប្អូន​ប្រជាពលរដ្ឋ ​យុវជនគណបក្សឃុំ​ និងស្រុក ​បានសហការគ្នានាំយក​អំណោយ​ជា​គ្រឿងឧបភោគ បរិភោគ​ជូនប្រជាពលរដ្ឋ ​ដើម្បីដោះស្រាយការលំបាកដោយសារបញ្ហាជំនន់ទឹកភ្លៀង។

ឯកឧត្តម ​ទេសរដ្ឋមន្រ្តី ​បានណែនាំដល់កងឯកភាព ​អាជ្ញាធរមូលដ្ឋាន​ និងយុវជនគណបក្សឃុំ និងស្រុក​ បន្តសហការគ្នា​ ចុះតាមដានជាប្រចាំនៅតំបន់ប្រជាពលរដ្ឋរស់នៅ ឬផ្ទះសម្បែង​ប្រជាពលរដ្ឋក្បែរតំបន់ជន់លិចនោះ ​ដើម្បីត្រៀមអន្តរាគមន៍ជួយ ក្នុងករណីមានស្ថានភាព​ធ្ងន់ធ្ងរផងដែរ៕