ស៊ីហ្គេម៖ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ បានបញ្ជាក់ថា ប្រសិនបើគ្មានការប្រែប្រួលនោះទេ អត្តពលិកកម្ពុជាចំនួន ១៦១នាក់លើ ១២ប្រភេទកីឡា នឹងចេញទៅបោះជុំរុំហ្វឹកហាត់រយៈពេលវែងនៅចិននាថ្ងៃទី១៥ ខែកញ្ញាសប្ដាហ៍ក្រោយនេះ ដើម្បីពង្រឹងសមត្ថភាពត្រៀមការប្រកួតកីឡាស៊ីហ្គេមនៅកម្ពុជា។
ឯកឧត្តមមានប្រសាសន៍ថា ក្រោយខកខានជាយូរដោយសារបញ្ហាកូវីដ-១៩ ឥលូវបានទទួលគោលការណ៍អនុញ្ញាតដ៏ខ្ពង់ខ្ពស់ពីសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធាន CAMSOC រួចហើយក្នុងការបញ្ជូនអត្តពលិក ១២ប្រភេទស្មើនឹង ១៦១នាក់ទៅហាត់នៅចិននាពេលឆាប់ៗខាងមុខ ក្រោមជំនួយឥតសំណង់របស់រដ្ឋាភិបាល និងប្រជាជនចិនដល់រាជរដ្ឋាភិបាលកម្ពុជា។ ចំពោះអត្តពលិកទាំង ១២ប្រភេទកីឡាដែលកម្ពុជាត្រៀមបញ្ជូនទៅហាត់នៅចិននាសប្ដាហ៍ក្រោយនេះ រួមមានប្រតិភូដឹកនាំ ២នាក់, កីឡាកាយសម្ព័ន្ធ ១១នាក់, កីឡាយូដូ ៥នាក់, កីឡាវូស៊ូ ១០នាក់, កីឡាបាល់បោះ ១៥នាក់, កីឡាវាយកូនឃ្លីលើតុ ១០នាក់, កីឡាអត្តពលកម្ម ២០នាក់, កីឡាចំបាប់ ១៥នាក់, កីឡាវាយសី ១២នាក់, កីឡាហែលទឹក ១១នាក់, កីឡាលើកទម្ងន់ ១០នាក់, កីឡាបាល់ទាត់-នារី ២៥នាក់ និងបាល់ទះ ១៥នាក់។
តាមគម្រោងអត្តពលិកទាំងអស់នឹងហ្វឹកហាត់នៅចិនរហូតដល់ការប្រកួតស៊ីហ្គេមឆ្នាំ២០២៣ នៅកម្ពុជា ហើយក្រោយបញ្ចប់បេសកកម្មក្នុងការប្រកួតព្រឹត្តិការណ៍ជាប្រវត្តិសាស្ដ្រនៅកម្ពុជា កីឡាករ-កីឡាការិនីទាំង ១៦១នាក់ដដែលនឹងត្រូវត្រលប់ទៅហ្វឹកហាត់បន្តនៅចិនវិញ រហូតចប់កិច្ចសន្យាជំនួយឥតសំណងដែលមានរយៈពេល ២ឆ្នាំ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
