​​បាល់ទាត់​៖ ​ក្លិបតោ​ខៀវ Chelsea រកបាន​អ្នកចាត់ការ​ថ្មី​ហើយ​គឺ​លោក Graham Potter ដែល​ចាក​ចេញពី Brighton មក​ជំនួស​តំណែង​អ្នកចាត់ការ​អាល្លឺម៉ង់ Thomas Tuchel ដែល​ត្រូវ​បានបញ្ចប់​តំណែង​កាលពី​ថ្ងៃ​ពុធ​។ ​​បុរស​វ័យ ៤៧ឆ្នាំ Graham Potter បាន​ចុះហត្ថលេខា​ដឹកនាំ Chelsea រយៈពេល ៥ឆ្នាំក្រោយ​ចំណាយពេល ៣ឆ្នាំ​ដឹកនាំ Brighton​។

​​ក្រុមការងារ​របស់លោក Graham Potter រួមមាន​គ្រូបង្វឹក Bjorn Hamberg និង Bruno ក៏ដូចជា​គ្រូ​អ្នកចាំទី Ben Roberts និង​ជំនួយការ Kyle Macaulay សុទ្ធតែ​បាន​ផ្លាស់​មកកាន់ Chelsea ទាំងអស់ បន្ទាប់ពី​ក្លិប​នៅ​ទីក្រុង​ឡុង​ដ៍​មួយ​នេះ​ចំណាយលុយ ២១លាន​ផោន​សំរាប់​ការផ្ទេរ​នេះ​។ ​​រំលឹកថា ​លោក Graham Potter ដែល​បាន​ចូលមក​ដឹកនាំ Brighton កាលពី​ឆ្នាំ២០១៩ បាន​ដឹកនាំ​ក្រុម​បញ្ចប់​នៅ​ចំណាត់ថ្នាក់​លេខ៩ រដូវ​កាល​មុន ដែលជា​ចំ​ណាត​ថ្នាក់​ល្អ​បំផុត​ក្នុង​ប្រវត្តិសាស្ត្រ​ក្លិប​នៅ​លី​គ​កំពូល​អង់គ្លេស​។

​​បច្ចុប្បន្ន Brighton ចាប់ផ្តើម​រដូវ​កាល English Premier League ក៏បាន​ល្អ​ទៀត​ដោយ​កំពុង​ឈរ​លេខ៤ ក្នុង​តារាង​ក្រោយ​ឈ្នះ៤ ស្មើ១ ចាញ់១ ហើយ​ក្នុងនោះ​មាន​ឈ្នះ​នៅ​ទឹកដី Manchester United ថ្ងៃ​បើក​រដូវ​កាល​ផងដែរ​។ ​​ដោយ​ឡែក​សម្រាប់​ការដកតំណែង​លោក Thomas Tuchel គឺ​បន្ទាប់ពី​ក្លិប​ចាប់ផ្តើម​រដូវ​កាល​នៅ EPL មិនល្អ​បូករួម​ទាំង​ចាញ់​ប្រកួត​ទី១ នៅ UCL​។ ​​យ៉ាងណាក្តី​ការបណ្តេញ​លោក Tuchel ត្រូវបាន​គេ​ដឹង​អ្នកចាត់ការ​អាល្លឺម៉ង់​រូបនេះ​ខ្វែងគំនិត​គ្នា​ជាមួយ​ម្ចាស់​ក្លិប​ថ្មី​លោក Todd Boehly ច្រើនជាង​៕

​អត្ថបទ​៖​នាង សុភា​វុ​ធ