ភ្នំពេញ៖ ក្រសួងផែនការ ចាប់ផ្តើមពិភាក្សា និងប្រមូលធាតុចូល ដើម្បីពិនិត្យ​ផ្ទៀងផ្ទាត់​ទិន្នន័យ​ពាក់ព័ន្ធវិស័យទឹកស្អាតនកម្ពុជា​ ក្នុងង​គោលដៅ​បង្កើត​ទិន្នន័យ​ជារួមមួយសម្រាប់រប្រើប្រាស់នានា និងដើម្បីវាស់វែងនូវ​ការ​សម្រេចបាន ​គោលដៅអភិវឌ្ឍន៍ប្រកបដោយចីរភាពឆ្នាំ​ ២០៣០ ផងដែរ។

មន្រ្តីជំនាញនៃ វិទ្យាស្ថានជាតិស្ថិតិនៃក្រសួងផែនការ ​បានដឹកនាំការពិភាក្សា​ ធ្វើឡើងនៅថ្ងៃទី៩ ខែកញ្ញានេះ ​ជាមួយមន្រ្តីជំនាញមកពីក្រសួងស្ថាប័នពាក់ព័ន្ធ ​រួមទាំង​អង្គការដៃគូអភិវឌ្ឍន៍ ក្នុងការ​ពិនិត្យផ្ទៀងផ្ទាត់​លើទិន្នន័យទឹកស្អាតនិងអនាម័យនៅកម្ពុជា។

ឯកឧត្តម ឡាយ ឆាន អគ្គនាយករង នៃវិទ្យាស្ថានជាតិស្ថិតិនៃក្រសួងផែនការ លើកឡើងថា​ បច្ចុប្បន្ន​កម្ពុជាមានទិន្នន័យទឹកស្អាត ​និងអនាម័យចម្រុះ ​ដោយមានប្រភពពីក្រសួងផែនការ ពីក្រសួង​អភិវឌ្ឍន៍ជនបទ ​ពីក្រសួងឧស្សាហកម្ម ​និងពីប្រភពផ្សេងទៀត ដែលមិនទាន់មានភាពរួមគ្នា​មួយនៅឡើយ។

ឯកឧត្តម បន្តថា នៅពេលបង្កើតបានទិន្នន័យរួមមួយរូចហើយ ​ទិន្នន័យនេះ នឹងត្រូវប្រើប្រាស់​សម្រាប់​គោលដៅបង្កើតគោលនយោបាយ ​គោលដៅ​សិក្សាស្រាវជ្រាវ ​ក៏ដូចជាមានភាពសំខាន់​ក្នុងការ​វាស់វែង​សូចនាករ​ ផ្នែកទឹកស្អាត​និងអនាម័យ​ នៃ​គោលដៅ​អភិវឌ្ឍន៍ដោយចីរភាព ដោយ​កំណត់ថាឆ្នាំ ២០៣០ គ្រប់ប្រជាពលរដ្ឋទាំងអស់នៅកម្ពុជា​នឹងមានទឹកស្អាត​សម្រាប់​ការប្រើប្រាស់ ដោយ​មានការគ្រប់គ្រងប្រកបដយសុវត្ថិភាព។

វិស័យទឹកស្អាត និងអនាម័យ ជាក់ស្ដែងគឺជាសូចនាករទី ៦ នៃគោលដៅអភិវឌ្ឍន៍ប្រកបដោយ​ចីរភាព។ ភាពជាសូចនាករនេះ គឺទាមទារឱ្យកម្ពុជា​ ក៏ដូចជាប្រទេសសមាជិកដទៃទៀត នៃ​អង្គការ​សហប្រជាជាតិ មានការប្ដេជ្ញាសម្រេចឱ្យបាននូវគោលដៅប្រកបដោយចីរភាពឆ្នាំ ២០៣០៕

អត្ថបទ៖ គឹមហុក