ភ្នំពេញ៖ ស្ថាប័នរារដ្ឋាភិបាលចំនួនបីរួមមានក្រសួងមហាផ្ទៃ ក្រសួងកសិកម្មរុក្ខាប្រមាញ់ ​និងនេសាទ និងក្រសួងបរិស្ថានបានទទួលសំណើរពីគ្រប់ភាគីជាពិសេសក្រុមជនជាតិដើមភាគតិច ដើម្បីធ្វើ​ជា​ធាតុលើសេចក្តីព្រាងវិសោធនកម្មច្បាប់ចំនួនបី រួមមាន៖ ច្បាប់ជលផល ​ច្បាប់ព្រៃឈើ និងច្បាប់តំបន់ការពារធម្មជាតិ។

តាមការបញ្ជាក់ពីឯកឧត្តម ង៉ាន់ ចំរើន រដ្ឋលេខាធិការក្រសួងមហាផ្ទៃ ​ថ្លែងថា បច្ចុប្បន្ន​ក្រសួងមហាផ្ទៃ ​បាននិងកំពុងដឹកនាំធ្វើវិសោធនកម្មច្បាប់ចំនួនបីរួមមាន៖ ច្បាប់ជលផល ច្បាប់ព្រៃ និងច្បាប់តំបន់ការពារធម្មជាតិនោះ​ ហើយបច្ចុប្បន្នច្បាប់នេះ ​បាននិងកំពុង បើកកិច្ចពិគ្រោះយោបល់​នៅថ្នាក់អន្តរក្រសួងជិតចប់ហើយ​ ហើយបន្ទាប់ពីនេះ​ ក្រសួងនឹង នឹងអញ្ជើញគ្រប់ភាគីពាក់ព័ន្ធ​ទាំងអស់​ជាពិសេស​ក្រុមអង្គការសង្គមស៊ីវិល និងក្រុមសម្ព័ន្ធអង្គការជនជាតិភាគី​និង​បណ្តា​សហគមន៍​នានា​ទៀត​ចូលរួមផ្តល់យោបល់ដែលជាធាតុចូលបង្កើតច្បាប់ថ្មីនេះ។

ក្រុមសម្ព័ន្ធជនជាតិភាគតិច​ បាន​ដាក់សំណើរ ៨ចំណុច​ ជូនរាជរដ្ឋាភិបាល​ដើម្បីពិភាក្សាដាក់​បញ្ចូល​ក្នុង​សេចក្តីព្រាងច្បាប់វិសោធនកម្មច្បាប់តំបន់ការពារធម្មជាតិ ​និងច្បាប់ព្រៃឈើ។ ​

នេះបើតាម លោកស្រី យុន ម៉ាណេ នាយិការអង្គជនជាតិដើមភាគតិចកម្ពុជា ​ដោយបញ្ជាក់ថា នៅ​ក្នុងសំណើរ៨ ចំណុចនោះគឺផ្តោតជាសំខាន់លើការស្នើរាជរដ្ឋាភិបាលកុំប្តូរពាក្យ សហគមន៍​ជនជាតិ​ដើម​ភាគតិចទៅជាសហគមន៍មូលដ្ឋាន​ និង​ការរក្សាដីចំការប្រណេរចរ ​រក្សាដីព្រៃសហគមន៍ តំបន់ព្រៃអរក្ស ​តំបន់កប់ខ្មោច និងតំបន់ព្រៃជំនឿនានារបស់គេឲ្យនៅគង់វង្សជាដើម។

លោកស្រី យុន ម៉ាណេ​ ក៏ដូចបណ្តាសម្ព័ន្ធ​ជនជាតិភាគតិច​បានស្នើសុំស្ថាប័ន​បង្កើត​អង្គភាព​ឯករាជ្យ​ដើម្បីជួយដោះស្រាយបញ្ហាទំនាស់នានាដែលកើតមានក្នុងសហគមន៍ជនជាតិភាគតិចផងដែរ៕ អត្ថបទ ស៊ុម សុខជា