ភ្នំពេញ៖ ខណៈពិធីបុណ្យកាន់បិណ្ឌ-ភ្ជុំបិណ្ឌ នឹងចាប់ផ្តើមពីថ្ងៃទី១១រហូតថ្ងៃទី២៦ខែកញ្ញា ខាងមុខនេះ អាជ្ញាធររាជធានីភ្នំពេញ ​បានត្រៀមរួចរាល់ការរក្សាសន្តិសុខសណ្តាប់ធ្នាប់ និង​ចរាចរណ៍​គ្រប់ច្រកចេញចូល​នៅរាជធានីភ្នំពេញ។

លោក ម៉េត មាសភក្តី អ្នកនាំពាក្យសាលារាជធានីភ្នំពេញ ​នៅថ្ងៃទី៩ខែកញ្ញានេះ បាន​ប្រាប់BTVឱ្យដឹងថា ដើម្បីឱ្យការ​ប្រារព្ធ​ពិធីបុណ្យកាន់បិណ្ឌ-ភ្ជុំបិណ្ឌ ​នៅឆ្នាំនេះ ដំណើរការរលូន​ដូចឆ្នាំមុន អាជ្ញាធររាជធានីភ្នំពេញ ​បានណែនាំទៅដល់បណ្តាខណ្ឌទាំង១៤រួចរាល់ សហការ​ជាមួយគណៈកម្មការវត្ត ​រៀបចំសណ្តាប់ធ្នាប់ ​នៅពេលពុទ្ធបរិស័ទ​អញ្ជើញ​ទៅកាន់វត្តអារាម។សមត្ថកិច្ចត្រូវបង្កើនការដើរល្បាតនៅតាមផ្ទះប្រជាពលរដ្ឋ និងការរៀបចំ​សម្រួលចរាចរណ៍​នៅតាមដងផ្លូវជាដើម។

ជារៀងរាល់ឆ្នាំ ពេលដល់ថ្ងៃខែ ដែលត្រូវប្រារព្ធពិធីបុណ្យកាន់បិណ្ឌ-ភ្ជុំបិណ្ឌ​ គ្រប់បងប្អូនកូនចៅ សាច់ញាតិ​សន្ដាន​ទាំងអស់ ទោះនៅទីជិត​ ឬទីឆ្ងាយ​ តែងតែធ្វើដំណើរទៅជួបជុំគ្នា ជាពិសេស​ទៅជួប​ឪពុកម្ដាយ​ ដើម្បីរៀបចំម្ហូបអាហា​រ បាយសម្ល និងចង្ហាន់យកទៅប្រគេន​ព្រះសង្ឃ​ដែលគង់​នៅវត្តអារាម។

បុណ្យភ្ជុំបិណ្ឌ ជាពិធីបុណ្យមួយ ​ក្នុងចំណោមពិធីបុណ្យធំៗដទៃទៀតនៃ​ ព្រះរាជពិធីទា្វរទសមាស ដែល​ប្រជារាស្រ្តខ្មែរ ​តាំងពីបុរាណរៀងមក តែងតែប្រារព្ធពិធីនេះមិនដែលអាក់ខានឡើយ ពោលគឺចា ប់ពីថៃ្ង ១រោច រហូតដល់ថៃ្ងទី ១៥រោច ខែភទ្របទ ដែលគេហៅថាបិណ្ឌ១, បិណ្ឌ២ ... និងថៃ្ង​បញ្ចប់ គឺជាថៃ្ង "ភ្ជុំបិណ្ឌ"៕អត្ថបទ៖ទូច សោភ័ណ