ភ្នំពេញ ៖ ក្រសួងសុខាភិបាល នៃព្ររាជាណាចក្រកម្ពុជា រសៀលថ្ងៃទី៩ ខែកញ្ញា ឆ្នាំ២០២២នេះ បានទទួលអំណោយឧបករណ៍តាមដានសរីរៈវិទ្យាវេជ្ជសាស្រ្ត (Medical Physiological Monitor) ចំនួន០៥គ្រឿង សម្រាប់ប្រើប្រាស់នៅតាមមនី្ទរពេទ្យ ពីក្រុមហ៊ុន China MEHECO Corporation។

​ពិធីប្រគល់-ទទួលនេះ ប្រារព្ធឡើងក្រោមវត្តមានឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល នៃព្រះរាជាណាចក្រកម្ពុជា រួមជាមួយលោក ជូវ ម៉ិញសាន តំណាងក្រុមហ៊ុន China MEHECO Corporation។ ឯកឧត្តម រដ្ឋមន្រី្ត ម៉ម ប៊ុនហេង បានថ្លែងថា ជំនួយថ្មីមួយទៀតនេះ របស់វិស័យឯកជន ចិន ចូលរួមជាមួយរដ្ឋាភិបាល នៃសាធារណរដ្ឋប្រជាមានិតចិន ដែលជាមិត្តដែកថែប កម្ពុជា សបញ្ជាក់ពីចំណងមិត្តភាព សាមគ្គីភាពជាប្រពៃណី និងកិច្ចសហប្រតិបតិ្តការក្នុងភាពជាដៃគូយុទ្ធ សាស្រ្តគ្រប់ជ្រុងជ្រោយកម្ពុជា-ចិន កាន់តែត្រូវបានពង្រឹង និងពង្រីកឥតឈប់ឈរ និងបានបញ្ជាក់កាន់តែច្បាស់អំពីដំណើរឈានទៅសម្រេចបានការកសាងសហគមន៍វាសនារួមកម្ពុជា-ចិន។

ឯកឧត្តម សាស្រ្តាចារ្យ ម៉ម ប៊ុនហេង បានបន្ថែមទៀតថា កម្ពុជា-ចិន បាននិងកំពុងកាន់ដៃគ្នា ស្មាប្រកៀកស្មា ឈរយ៉ាងរឹងម៉ាំក្នុងការប្រយុទ្ធប្រឆាំង នឹងជំងឺកូវីដ-១៩ ប៉ុណ្ណោះទេ ប៉ុន្តែដើម្បីបន្តនិរន្តរភាពសង្គម សេដ្ឋកិច្ច នៃប្រទេសទាំងពីរ ក៏ដូចជាពិភពលោកទាំងមូល។

ឯកឧត្តម រដ្ឋមន្រី្ត ក៏បានសម្តែងអំណរគុណយ៉ាងជ្រាលជ្រៅជូនចំពោះរដ្ឋាភិបាល និងប្រជាជនចិន ព្រមទាំងវិស័យឯកជន ដែលតែងតែជួយដល់រាជរដ្ឋាភិបាល និងប្រជាជនកម្ពុជា ទោះជាក្នុងកាលៈទេសៈណាក៏ដោយ ជាពិសេសក្នុងកាលៈទេសៈដ៏លំបាក ប្រយុទ្ធប្រឆាំងនឹងការរីករាលដាលនៃជំងឺកូវីដ-១៩៕ រូបភាព អត្ថបទ៖ រដ្ឋា