ភ្នំពេញ៖ ឯកឧត្តម វ៉ាន់ វិនធាន ឯកអគ្គរដ្ឋទូតចិនប្រចាំនៅកម្ពុជា បានថ្លែងអំណរគុណចំពោះ កម្ពុជា ដែលប្រកាន់ខ្ជាប់យ៉ាងម៉ឺងម៉ាត់ អំពីគោលការណ៍ចិនតែមួយ និងតែងគាំទ្រចិនក្នុងការការពារផលប្រយោជន៍ស្នូលរបស់ខ្លួន លើបញ្ហាដូចជាកោះតៃវ៉ាន់ និងស៊ីជាំងជាដើម។
ក្នុងពិធីសម្ពោធសមិទ្ធផលលើការជួសជុលអគារក្រហម និងបណ្ណាល័យព្រឹទ្ធសភា នៅថ្ងៃទី៩ ខែកញ្ញា ឆ្នាំ២០២២ ឯកឧត្តម អគ្គរដ្ឋទូតចិន បានថ្លែងថា ទំនាក់ទំនងចិន និងកម្ពុជា ត្រូវបានបង្កើន និងបីបាច់ថែទាំយ៉ាងយកចិត្តទុកដាក់ដោយថ្នាក់ដឹកនាំចិនជំនាន់មុន និងព្រះករុណា ព្រះវររាជបិតាជាតិខ្មែរ ព្រះបរមរតនកោដ្ឋ ដោយទំនាក់ទំនងមួយនេះ បានឆ្លងកាត់ការសាកល្បងនៃការផ្លាស់ប្តូរស្ថានភាពអន្តរជាតិ ត្រូវបានអភិវឌ្ឍកាន់តែរស់រវើកបន្ថែមទៀត ហើយបច្ចុប្បន្ននេះ ប្រទេសទាំងពីរ បានក្លាយជាដៃគូយុទ្ធសាស្ត្រគ្រប់ជ្រុងជ្រោយ និងសហគមន៍វាសនាតែមួយ ។
ឯកឧត្តម បានបន្តថា ចិន និងកម្ពុជា គឺជាមិត្តដែកថែបយ៉ាងពិតប្រាកដ និងសូមថ្លែងអំណរគុណចំពោះការប្រកាន់ខ្ជាប់យ៉ាងម៉ឺងម៉ាត់ របស់កម្ពុជាអំពីគោលការណ៍ចិនតែមួយ តែងគាំទ្រចិន ក្នុងការការពារផលប្រយោជន៍ស្នូលរបស់ខ្លួនលើបញ្ហាដូចជាកោះតៃវ៉ាន់ និងស៊ីនជាំងជាដើម ហើយចិនក៏គាំទ្រយ៉ាងម៉ឺងម៉ាត់ដល់ភាគីកម្ពុជា ក្នុងការការពារអធិបតេយ្យភាពជាតិ ឯករាជ្យភាព និងសេចក្តីថ្លៃថ្នូររបស់ជាតិ ការដើរលើមាគ៌ាអភិវឌ្ឍន៍ដែលសមស្របនឹងលក្ខខណ្ឌជាតិរបស់ខ្លួន គាំទ្រក្នុងកិច្ចខិតខំប្រឹងប្រែងអភិវឌ្ឍន៍សេដ្ឋកិច្ច និងការកែលម្អជិវភាពរស់នៅរបស់ប្រជាពលរដ្ឋខ្លួន ហើយចិនបន្តផ្ដល់ការគាំទ្រ និងការជួយទៅតាមលទ្ធភាពរបស់ខ្លួន។
ក្នុងឱកាសនោះ ឯកឧត្តមកិត្តិសង្គហបណ្ឌិត ទេព ងន អនុប្រធានទី២ព្រឹទ្ធសភា បានមានប្រសាសន៍ថា ការអភិវឌ្ឍសេដ្ឋកិច្ច សង្គម និងផ្នែកនីតិប្បញ្ញត្តិរបស់កម្ពុជា មិនអាចកាត់ផ្ដាច់ពីការជួយជ្រោមជ្រែងទាំងស្មារតី ជំនួយឥតសំណង សម្បទានឥណទាន និងការគាំទ្ររបស់រដ្ឋាភិបាល និងប្រជាជនចិនបានឡើយ ។
ឯកឧត្តមបន្ថែមថា ក្នុងនាមព្រឹទ្ធសភាកម្ពុជា សូមថ្លែងអំណរដល់ស្ថានទូតចិន ដែលតែងតែឯកភាពរាល់សំណើស្នើសុំរបស់ព្រឹទ្ធសភា ក្នុងការកសាងហេដ្ឋារចនាសម្ព័ន្ធរូបវ័ន្ត ការផ្ដល់ជំនួយជាសម្ភារ បច្ចេកទេស និងការអភិវឌ្ឍធនធានមនុស្ស នៃអគ្គកលេខាធិការដ្ឋានព្រឹទ្ធសភាផងដែរ៕ អត្ថបទ បាន សុខរិទ្ធិ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
