បាត់ដំបង៖ ឆ្លងតាមរយៈការវាយតម្លៃពីអង្គការសុខភាពពិភពលោក ធនាគារពិភពលោក និងដៃគូ​មួយចំនួន ដែលបានឧបត្ថម្ភគាំទ្រដល់វិស័យអប់រំនៅកម្ពុជា បានបង្ហាញថា ប្រទេសកម្ពុជា​ជាប់ចំណាត់ថ្នាក់លេខ៣ ក្នុងតំបន់អាស៊ានក្នុងការកំណែទម្រង់ស៊ីជម្រៅលើវិស័យអប់រំ ខណៈសិង្ហបុរីជាប់លេខ១ និងប្រទេសថៃជាប់លេខ២។

ក្នុងពិធីសម្ពោធអគារមត្តេយ្យសិក្សា និងផ្លូវបេតុង នៅសាលាបឋមសិក្សាជ្រៃ ស្ថិតក្នុងឃុំជ្រៃ ស្រុកមោងឫស្សី ខេត្តបាត់ដំបង នៅថ្ងៃទី១០ ខែកញ្ញា ឆ្នាំ២០២២ រដ្ឋលេខាធិការក្រសួងអប់រំ យុវជន និងកីឡា ឯកឧត្តម ស សុខា បានថ្លែងឱ្យដឹងថា រាជរដ្ឋាភិបាលកម្ពុជា​បានផ្ដោតការយកចិត្ត​ទុកដាក់​ខ្ពស់ក្នុងការធ្វើកំណែទម្រង់វិស័យអប់រំ ជាពិសេសលើការរៀន និងបង្រៀន។

ក្នុងឱកាសនោះដែរ ឯកឧត្តម ស សុខា បាននាំយកអំណោយរបស់សម្តេចក្រឡាហោម ស ខេង និងលោកជំទាវ ចែកជូនពុកម៉ែបងប្អូនប្រជាពលរដ្ឋជួបការលំបាកផ្នែកជីវភាព ចំនួន ៥០០គ្រួសារ នៅក្នុងឃុំជ្រៃ ស្រុកមោងឫស្សី ដើម្បីជួយសម្រួលដល់ជីវភាពប្រចាំថ្ងៃ ពិសេសក្នុងបរិបទកូវីដ-១៩ ។

ឯកឧត្តម បានអំពាវនាវដល់ពុកម៉ែ បងប្អូនប្រជាពលរដ្ឋទាំងអស់ ជាពិសេសលោកតា​លោកយាយ​វ័យចំណាស់ត្រូវបង្កើនការប្រុងប្រយ័ត្ន ​និងថែទាំសុខភាពឱ្យបានជាប្រចាំ ព្រមទាំងអនុវត្តន៍ឱ្យ​បាន​ខ្ជាប់ខ្ជួននូវវិធានការ ៣ការពារ ៣កុំ និងចូលរួមចាក់វ៉ាក់សាំងកូវីដ-១៩ ឱ្យបានគ្រប់ដូស ទៅតាមដំណាក់កាល​ ដែលរាជរដ្ឋាភិបាល ផ្តល់ជូន៕