បាល់ទាត់៖ សហព័ន្ធកីឡាបាល់ទាត់ជាតិកម្ពុជា បានប្រកាសត្រៀមរំសាយយុវជនចំនួន ៨នាក់ក្រោយបញ្ចប់ការសិក្សានៅមជ្ឈមណ្ឌលសាលាបាល់ទាត់ជាតិបាទី អស់រយៈពេលជាច្រើនឆ្នាំកន្លងទៅ។ យុវជនទាំង ៨រូបដែលត្រៀមចាកចេញរួមមានកីឡាករ វី លាភផេង, តាំង ប៊ុនឆៃ, អ៊ឹម វីនុន, ជូ ស៊ីនទី, ស្រួច ជីវ័ណ្ណ, ភេម កៅសិញ, សេង សម្បត្តិ និង កយ សាលីម ដែលពួកគេភាគច្រើនមានវ័យ ១៨ឆ្នាំ។
នេះជាលើកទី៣ ហើយ ដែលសហព័ន្ធត្រូវរំសាយយុវជន ដែលបញ្ចប់ការសិក្សានៅសាលាបាល់ទាត់ជាតិបាទី។ ទន្ទឹមជាមួយគ្នា សហព័ន្ធក៏បានជូនដំណឹងទៅសមាគម និងក្លិប ដែលចង់បានពួកគេទៅបន្ដអាជីពក្រោមទ្រនំរបស់ខ្លួន ទាក់ទង និងពិភាក្សាលើកិច្ចសន្យាជាមួយសហព័ន្ធផងដែរ។ គួរបញ្ជាក់ថា មជ្ឈមណ្ឌល និងសាលាកីឡាបាល់ទាត់ជាតិបាទី បានបើកឲ្យដំណើរការកាលពីឆ្នាំ២០១៣ ដោយចម្រាញ់យុវជនតាមបណ្ដាលខេត្តជាច្រើន មកបណ្ដុះបណ្ដាលផ្នែកបាល់ទាត់ សិក្សារៀនសូត្រ និងស្នាក់នៅដែលទទួលខុសត្រូវដោយសហព័ន្ធកីឡាបាល់ទាត់កម្ពុជា។ ដោយឡែកយុវជនដែលត្រូវបានរំសាយ ២លើកមុនកាលពីឆ្នាំ២០១៨ និងឆ្នាំ២០១៩ គឺមានយុវជនសរុប ២១រូប ហើយបច្ចុប្បន្នពួកគេកំពុងប្រកបអាជីពតាមបណ្ដាក្លិប នៃលីគកំពូលកម្ពុជា ហើយក៏មានយុវជនខ្លះកំពុងធ្វើព្យុះភ្លៀងលើទីលានផងដែរ ជាក់ស្ដែងដូចជាកីឡាករ សៀង ចន្ធា នៅក្លិបបឹងកេតជាដើម៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
