ភ្នំពេញ៖ ក្រសួងសុខាភិបាលបានជូនដំណឹងទៅអភិបាលរាជធានី និងខេត្តនៅទូទាំងប្រទេស ឱ្យត្រៀមរៀបចំបង្កើតក្រុមគ្រូពេទ្យថែទាំ និងព្យាបាលអ្នកជំងឺកូវីដ១៩នៅតាមផ្ទះ។
ក្រសួងសុខាភិបាលបានប្រាប់ទៅរដ្ឋបាលថ្នាក់រាជធានី-ខេត្តទាំងអស់បែបនេះនៅក្នុងលិខិតមួយផ្ញើទៅអភិបាលរាជធានី និងខេត្តនៅទូទាំងប្រទេសនៅថ្ងៃនេះ។
បើតាមលិខិតដដែលនេះ ក្រសួងសុខាភិបាលបានណែនាំឱ្យបង្កើតក្រុមគ្រូពេទ្យសម្រាប់ផ្ដល់ការថែទាំ និងព្យាបាលនៅតាមផ្ទះសម្រាប់អ្នកជំងឺកូវីដ១៩កម្រិតស្រាល។
ក្រសួងចង្អុលបង្ហាញថា ក្រុមគ្រូពេទ្យសម្រាប់ផ្ដល់ការថែទាំង និងព្យាបាលអ្នកជំងឺកូវីដ១៩នៅតាមផ្ទះនេះ ត្រូវដឹកនាំដោយប្រធានការិយាល័យសុខាភិបាលស្រុកនីមួយៗ។
បើតាមលិខិតដដែលនេះ ក្រសួងសុខាភិបាលនឹងផ្ដល់ការបណ្ដុះបណ្ដាលទៅដល់ក្រុមគ្រូពេទ្យដែលនឹងត្រូវចាត់តាំងឱ្យផ្ដល់សេវាថែទាំង និងព្យាបាលនៅតាមផ្ទះនេះ។
ក្រសួងសុខាភិបាល បានជូនដំណឹងទៅរដ្ឋបាលថ្នាក់រាជធានី-ខេត្តបែបនេះ បន្ទាប់ពីប្រមុខរាជរដ្ឋាភិបាលកម្ពុជាសម្ដេចតេជោ ហ៊ុន សែន បានណែនាំឱ្យសិក្សាពីលទ្ធភាពរៀបចំការព្យាបាលអ្នកជំងឺកូវីដ១៩នៅតាមផ្ទះរៀងៗខ្លួន ចំពេលដែលកម្ពុជាបានរកឃើញករណីឆ្លងវីរុសកូរ៉ូណាកាន់តែច្រើនឡើង។
ក្នុងសារជាសំឡេងនៅថ្ងៃនេះ សម្ដេចតេជោ ហ៊ុន សែន បានមានប្រសាសន៍ថា ប្រសិនបើការឆ្លងរីករាលនៃជំងឺកូវីដ១៩មិនថមថយទេនោះ មន្ទីរពេទ្យនឹងពេញហៀរទៅដោយអ្នកជំងឺកូវីដ១៩ ដែលលើសពីសមត្ថភាពរបស់ក្រុមគ្រូពេទ្យ។
សម្ដេចតេជោបានណែនាំឱ្យមានការព្យាបាលនៅតាមផ្ទះសម្រាប់អ្នកជំងឺកូវីដ១៩កម្រិតស្រាល ខណៈអ្នកជំងឺកូវីដ១៩កម្រិតធ្ងន់ សម្ដេចណែនាំឱ្យដឹកយកទៅព្យាបាលនៅតាមមន្ទីរពេទ្យដែលត្រូវបានរៀបចំហើយ។
ដើម្បីដាក់ឱ្យដំណើរការការព្យាបាលអ្នកជំងឺកូវីដ១៩បាន សម្ដេចតេជោ ហ៊ុន សែន បានណែនាំក្រុមការងារឱ្យរៀបចំក្រមប្រតិបត្តិឱ្យបានរួចរាល់។
សម្ដេចតេជោ ហ៊ុន សែន មានប្រសាសន៍បញ្ជាក់ថា អ្នកជំងឺកូវីដ១៩កម្រិតស្រាល ដែលត្រូវដាក់ឱ្យព្យាបាលនៅតាមផ្ទះបាន លុះត្រាតែអ្នកជំងឺនោះមានផ្ទះសមរម្យ។
សម្ដេចប្រមុខដឹកនាំរាជរដ្ឋាភិបាលបានបញ្ជាក់ទៀតថា សម្រាប់អ្នកជំងឺកូវីដ១៩កម្រិតស្រាល នឹងត្រូវបញ្ជូនទៅសម្រាកព្យាបាលនៅមន្ទីរពេទ្យដដែល ប្រសិនបើផ្ទះសម្បែងរបស់គាត់មានទំហំតូច ដែលអាចបង្កហានិភ័យដល់សមាជិកដទៃទៀតនៅក្នុងក្រុមគ្រួសារនោះ។
គិតត្រឹមថ្ងៃនេះ កម្ពុជារកឃើញមនុស្សសរុបដល់ទៅ ២ ៨២៤នាក់ហើយបានឆ្លងវីរុសកូវីដ១៩នៅទូទាំងប្រកាសគិតចាប់តាំងពីប្រទេសនេះរកឃើញករណីឆ្លងលើកដំបូងកាលពីចុងខែមករាឆ្នាំមុន ក្នុងនោះករណីឆ្លងដ៏ច្រើនលើសលប់ដល់ទៅ ២ ២៩៣ករណីពាក់ព័ន្ធនឹងព្រឹត្តិការណ៍សហគមន៍២០កុម្ភៈ។
ទន្ទឹមគ្នានេះ ក្រសួងសុខាភិបាលបញ្ជាក់ថា អ្នកជំងឺកូវីដសរុបដល់ទៅ ១ ៧៩៤នាក់ហើយ ត្រូវបានព្យាបាលជាសះស្បើយ និងត្រូវបានអនុញ្ញាតឱ្យចាកចេញពីមន្ទីរពេទ្យ ក្នុងនោះរួមបញ្ចូលទាំងអ្នកជាសះស្បើយថ្មី ៤៧នាក់ដែលក្រសួងទើបប្រកាសនៅថ្ងៃនេះផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
