ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល នាព្រឹកថ្ងៃទី១១ ខែកញ្ញា ឆ្នាំ២០២២នេះ នាឱកាសដែលព្រះរាជាណាចក្រកម្ពុជាប្រារព្ធពិធីបុណ្យភ្ជុំបិណ្ឌ និងកាន់បិណ្ឌ និងជាវេណទី១ បានដឹកនាំក្រុមការងារគ្រូពេទ្យ ចុះពិនិត្យ ពិគ្រោះ ព្យាបាលជំងឺ និងចាក់វ៉ាក់សាំងបង្ការជំងឺកូវីដ-១៩ ជូនព្រះសង្ឃ ប្រជាពុទ្ធបរិស័ទ លោកយាយ លោកតា ក្មេង ចាស់ ប្រុស ស្រី ដែលអញ្ជើញមកកាន់វត្តឃ្មួញ ស្ថិតក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ។

ឯកឧត្តម សាស្រ្តាចារ្យ ម៉ម ប៊ុនហេង ថ្លែងប្រាប់BTV ព័ត៌មាន ថា ថ្ងៃនេះជាពិធីបុណ្យកាន់បិណ្ឌ១ គឺថ្នាក់ដឹកនាំក្រសួង អាជ្ញាធរសង្កាត់ ខណ្ឌ បានរួមគ្នាចូលរួមជាចតុប្បច្ច័យ វេប្រគេនចង្ហាន់ និងសម្ភារៈបរិក្ខារមួយចំនួន ទៅព្រះសង្ឃគង់ក្នុងវត្តឃ្មួញ ដែលជាការងារមួយដ៏ល្អ ដែលយើងបានរួមគ្នាធ្វើបុណ្យ ធ្វើទាន មានក្រុមគ្រូពេទ្យ រួមជាមួយនឹងប្រជាពុទ្ធបរិស័ទទាំងអស់ ក្នុងនោះយើងក៏បានរៀបចំក្រុមការងារគ្រូពេទ្យ ចុះមកពិនិត្យ ពិគ្រោះ ព្យាបាលជំងឺ ផ្តល់អំណោយថ្នាំពេទ្យដោយឥតគិតថ្លៃ ព្រមទាំងចាក់វ៉ាក់សាំងបង្ការជំងឺកូវីដ-១៩ ចាប់ពីដូសមូលដ្ឋាន រហូតដល់ដូសជំរុញ ជូនប្រជាពុទ្ធបរិស័ទ ក្មេង ចាស់ ប្រុស ស្រី លោកយាយ លោកតា មកកាន់វត្ត ដើម្បីឲ្យគាត់ទទួលបានសុខភាពល្អ។ ដូច្នេះក្នុងនាមយើងជាប្រជាពុទ្ធបរិស័ទ ជាគ្រូពេទ្យផង ដូច្នេះត្រូវបំពេញកាតព្វកិច្ចបន្ថែម ដើម្បីផ្តល់សេវាសុខាភិបាលជូនគាត់ឲ្យកាន់តែល្អប្រសើរ។

ជាមួយគ្នានេះឯកឧត្តម រដ្ឋមន្រី្ត ម៉ម ប៊ុនហេង ក៏មានសេចកី្តរីករាយ និងមានមោទនភាព ដែលមានព្រះចៅអធិការវត្ត មន្រី្តបុគ្គលិកសុខាភិបាល និងអាជ្ញាធរសង្កាត់ ខណ្ឌ ដែលបានរួមកម្លាំងគ្នា ធ្វើការងារពុទ្ធចក្រ និងអាណាចក្រ ដើម្បីសម្រេចបានជោគជ័យក្នុងការអនុវត្តន៍នូវគោលនយោបាយដ៏ខ្ពង់ខ្ពស់របស់រាជរដ្ឋាភិបាល ដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា ដែលលោកតែងតែឧបត្ថម្ភគាំទ្រ ដូចជាណែនាំ ផ្តល់ឱវាទដល់មន្រី្តបុគ្គលិកសុខាភិបាល ធ្វើយ៉ាងណាចុះជាប់ជាមួយប្រជាជន ហើយក៏សូមសម្ដែងនូវការកោតសរសើរ ដល់មន្ដ្រីបុគ្គលិកសុខាភិបាល និងអាជ្ញាធរមូលដ្ឋានទាំងអស់ ដែលធ្វើការងារជាមួយគ្នា និងចុះជាប់ ព្រមទាំងបង្ខិតសេវាសុខាភិបាល ជូនប្រជាពលរដ្ឋយើងបានល្អណាស់៕ អត្ថបទ រដ្ឋា