ភ្នំពេញ៖ ព្រះរាជាណាចក្រកម្ពុជា នឹងប្រកាសអនុវត្តន៍គម្រោងលើកកម្ពស់គុណភាព និងសមធម៌សុខាភិបាលដំណាក់កាលទី២ នាដើមខែតុលា ឆ្នាំ២០២២ខាងមុខនេះ។

នាឱកាសដែរលោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និង​ជានាយក​គម្រោងលើកកម្ពស់គុណភាព និងសមធម៌សុខាភិបាល (H-EQIP) ការឆ្លើយតបបន្ទាន់ទៅនឹងជំងឺ​កូវីដ-១៩ (COVID-19 ERP) និងអាហារូបត្ថម្ភនៅកម្ពុជា (CNP) បានអនុញ្ញាតឱ្យលោកស្រី Aparnaa Somanathan ប្រធានផ្នែកសុខភាព អាហារូបត្ថម្ភ និងប្រជាជន ប្រចាំតំបន់អាស៊ីបូព៌ា និងប៉ាស៊ីហ្វិក ព្រមទាំងក្រុមការងារធនាគារពិភពលោក ចូលជួបសំដែងការគួរសម និងពិភាក្សាការងារស្តីពី Health Nutrition and Population portfolio និងបច្ចុប្បន្នភាពនៃការអនុវត្តគម្រោង, នាទីសី្តការក្រសួង ព្រឹកថ្ងៃទី១២ ខែកញ្ញា ឆ្នាំ២០២២នេះ។

សូមបញ្ជាក់ផងដែរថា គម្រោងលើកកម្ពស់សមធម៌សុខាភិបាលគុណភាព និងសមធម៌​សុខាភិបាល​នេះ គឺដើម្បីធានា ​និងបង្កើននូវប្រសិទ្ធភាព គុណភាព និងសុវតិ្ថភាពក្នុងការផ្តល់សេវាជូន​ប្រជាជន​កម្ពុជា ហើយគម្រោងមួយនេះ គឺជាគម្រោង ដែលមានថវិកាចំនួន៣ធំៗសម្រាប់ដំណើរការ​អនុវត្តន៍។ ទី១.កញ្ចប់ថវិការបស់រាជរដ្ឋាភិបាលកម្ពុជា, ទី២. កញ្ចប់ថវិកាជំនួយ និងទី៣.កញ្ចប់ថវិកាដែលជាគម្រោងឥណទានសម្បទាន (កម្ចី)។

លោកជំទាវ វេជ្ជបណ្ឌិត យក់ សម្បតិ្ត បានថ្លែងថា ក្នុងនាមឯកឧត្តម រដ្ឋមន្រី្តសាស្រ្តាចារ្យ ម៉ម ប៊ុនហេង សូមថ្លែងអំណរគុណដល់លោកស្រីប្រធានផ្នែកសុខភាព​ អាហារូបត្ថម្ភ​ និងប្រជាជន ប្រចាំតំបន់អាស៊ីបូព៌ា ​និងប៉ាស៊ីហ្វិក ​ជាពិសេសធនាគារពិភពលោក ដែលបានសម្របសម្រួល​ជា​មួយដៃគូ ក្នុងការអនុវត្តន៍គម្រោងលើកកម្ពស់គុណភាព ​និងសមធម៌សុខាភិបាល ឲ្យមានការ​រីក​ចម្រើន និងវឌ្ឍនភាព និងខិតខំបន្តអនុវត្តន៍សហការជាមួយគ្នាបន្តទៀត។

ជាការឆ្លើយតប ​លោកស្រី Aparnaa Somanathan សូមកោតសរសើរដល់ថ្នាក់ដឹកនាំក្រសួង​សុខាភិបាល​ ក្រុមការងារបច្ចេកទេស ​និងអ្នកអនុវត្តន៍គម្រោងទាំងអស់ ដែលបានសហការ​យ៉ាង​ល្អជាមួយនឹងដៃគូអភិវឌ្ឍន៍នានា ​ជាមួយធនាគារពិភពលោក ក្នុងកិច្ចសហប្រតិបតិ្តការគ្នា​ក្នុងកា​រ​អនុវត្តន៍គម្រោងទាំង៤(គម្រោងលើកកម្ពស់គុណភាព ​និងសមធម៌សុខាភិបាល ទី១, គម្រោង​លើកកម្ពស់គុណភាព ​និងសមធម៌សុខាភិបាល ទី២, ​ការឆ្លើយតបបន្ទាន់ទៅនឹងជំងឺកូវីដ-១៩ និងអាហារូបត្ថម្ភនៅកម្ពុជា)៕ អត្ថបទ រដ្ឋា