ភ្នំពេញ៖ មូលនិធិជាតិជំនួយសង្គម ជាស្ថាប័នថ្មីដែលទើបតែបង្កើតឡើង បាននិងកំពុងរៀបចំវគ្គបណ្ដុះ បណ្ដាលជូនមន្ត្រីរបស់ខ្លួន ក្នុងគោលដៅសំខាន់ពង្រឹងសមត្ថភាពនិងបង្កើនប្រសិទ្ធភាពការងារផ្ដល់សេវាជូន ក្រុមគោលដៅរាប់បញ្ចូលទាំងគ្រួសារក្រីក្រ ក្រុមងាយរងគ្រោះ និងនិវត្តជនគ្រប់ប្រភេទ។
មូលនិធិជាតិជំនួយសង្គម ជាស្ថាប័នបង្កើតថ្មី ចេញពីការរួមបញ្ចូលគ្នានៃស្ថាប័នចំនួន៣ ដែលផ្តោតសំខាន់លើ ការងារផ្ដល់សេវាជូនគ្រួសារក្រីក្រ ក្រុមងាយរងគ្រោះក៏ដូចជា និវត្តជនរាប់បញ្ចូលទាំងមន្ត្រីរាជការស៊ីវិល ក៏ដូចជាអតីតយុទ្ធជន។
ថ្លែងក្នុងក្នុងវគ្គបណ្តុះបណ្តាល ស្តីពីនីតិវិធីបើកផ្តល់តាវកាលិក កម្មវិធីជំនួយសង្គម និងរបបឧបត្ថម្ភគោលនយោបាយ សម្រាប់អតីតមន្ត្រីរាជការស៊ីវិល និងអតីតយុទ្ធជន នាព្រឹកថ្ងៃទី១២ ខែកញ្ញា ឯកឧត្តម ឈួរ សុបញ្ញា ប្រតិភូរាជរដ្ឋាភិបាល ទទួលបន្ទុកជាអគ្គនាយកមូលនិធិជាតិជំនួយសង្គម លើកឡើងថា វាជាភាពចាំបាច់ ក្នុងការពង្រឹងសមត្ថភាពមន្ត្រីមូលនិធិជាតិជំនួសង្គម ឱ្យកាន់តែមានប្រសិទ្ធភាពថែមទៀត។
កាលពីពេលថ្មីៗនេះ សម្តេចតេជោ ហ៊ុន សែន នាយករដ្ឋមន្ត្រី បានចុះហត្ថលេខាលើអនុក្រឹត្យលេខ១៦២ ស្តីពីការបន្ថែមរបប សន្តិសុខសង្គមសម្រាប់អតីតមន្ត្រីរាជការស៊ីវិល អតីតយុទ្ធជន និងឧបត្ថម្ភអ្នកបម្រើជូនជនពិការ និងជនបាត់បង់សមត្ថភាពការងារ៕ អត្ថបទ៖ គឹម ហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
