ភ្នំពេញ៖ ឯកឧត្ដម ទេសរដ្ឋមន្ត្រី គន់ គីម អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយ នៅព្រឹកថ្ងៃទី១២ កញ្ញានេះ បានដឹកនាំកិច្ចប្រជុំជាមួយមន្ត្រីពាក់ព័ន្ធ ដើម្បីត្រៀមរៀបចំទិវាអាស៊ានគ្រប់គ្រងគ្រោះមហន្តរាយ និងទិវាអន្តរជាតិ កាត់បន្ថយគ្រោះមហន្តរាយនៅខែតុលាខាងមុខ ក្រោមប្រធានបទ "រួមគ្នាធ្វើឱ្យមានតុល្យភាព សកម្មភាពដើម្បីលើកកម្ពស់មូលដ្ឋានីយកម្មសម្រាប់ភាពធន់ទៅនឹងគ្រោះមហន្តរាយ"។
នៅក្នុងកិច្ចប្រជុំនេះ ឯកឧត្តម ទេសរដ្ឋមន្ត្រី គន់ គីម បានមានប្រសាសន៍ថា ព្រឹត្តការណ៍ទិវាជាតិនេះ គ្រោងនឹងប្រព្រឹត្តទៅថ្ងៃទី១៣ ខែតុលា ឆ្នាំ២០២២ខាងមុខ ដើម្បីលើកកម្ពស់ការយល់ដឹងជាសាធារណៈ ស្ដីពីការកាត់បន្ថយហានិភ័យគ្រោះមហន្តរាយតាមរយៈការចូលរួមដឹកនាំ និងអនុវត្តនៅថ្នាក់មូលដ្ឋានប្រកបដោយបរិយាបន្ន។
ឯកឧត្តម បានបន្តថា ផែនការគ្រោងសកម្មភាពខាងលើ មានយុទ្ធនាការប្រព័ន្ធផ្សព្វផ្សាយ ក្នុងគោលបំណងផ្សព្វផ្សាយព្រឹត្តិការណ៍នេះ និងលើកកម្ពស់ការយល់ដឹងអំពីការគ្រប់គ្រងហានិភ័យគ្រោះមហន្តរាយដល់សាធារណជន តាមរយៈគេហទំព័រ និងប្រព័ន្ធផ្សព្វផ្សាយសង្គម។
នៅក្នុងអង្គប្រជុំនោះ បានឲ្យដឹងថា ក្នុងកម្មវិធីនោះ នឹងមានរៀបចំកន្លែងសម្រាប់តាំងពិព័រណ៍ និងបង្ហាញទីផ្សារផលិតផល ដោយបើកចំហរជាសាធារណៈ ដើម្បីលើកទឹកចិត្តដល់ដៃគូអភិវឌ្ឍន៍នានាក្នុងការចែករំលែកចំណេះដឹង និងបទពិសោធន៍របស់ពួកគេ ទាក់ទងនឹងការធ្វើតុល្យកម្មសកម្មភាព ដើម្បីលើកកម្ពស់មូលដ្ឋានីយកម្មសម្រាប់ភាពធន់ទៅនឹងគ្រោះមហន្តរាយ។ ចំពោះភាគីពាក់ព័ន្ធ នឹងមានការចូលរួមពីភ្នាក់ងារសហប្រជាជាតិ អង្គការក្រៅរដ្ឋាភិបាល អង្គការសង្គមស៊ីវិល និងវិស័យឯកជនកំពុងស្ម័គ្រចិត្តចូលរួមរៀបចំការតាំងពិព័ណ៌នេះ។
កម្មវិធីនោះដែរ កម្ពុជាក៏នឹងរៀបចំក្បួនដង្ហែ ដែលនឹងរួមបញ្ចូលមនុស្សគ្រប់វ័យ រួមទាំងយុវជន មនុស្សពេញវ័យ ចាស់ជរា ជនពិការ កាយរឹទ្ធិ សហភាពសហព័ន្ធយុវជនកម្ពុជា កងរុករក និងសង្គ្រោះគ្រោះមហន្តរាយ និងកងកម្លាំងប្រដាប់អាវុធទាំងបីប្រភេទ ដែលនឹងប្រព្រឹត្តទៅនៅតាមទីសាធារណៈ ដោយមានការបង្ហាញបដាពាក្យស្លោក ទង់ជាតិ និងឆៃយ៉ាំ។
ឯកឧត្តម គន់ គីម បានរំលឹកជូនអង្គប្រជុំថា រដ្ឋាភិបាល ដោយមានគណៈកម្មាធិការជាតិគ្រប់គ្រងគ្រោះមហន្តរាយ ជាសេនាធិការ និងបានសម្របសម្រួលជាមួយស្ថាប័នពាក់ព័ន្ធនានា និងកងកម្លាំងប្រដាប់អាវុធ រួមទាំងថ្នាក់ក្រោមជាតិ បានពុះពារគ្រប់ឧបសគ្គ ប្រយុទ្ធលើគ្រប់សមរភូមិ ម្ចាស់ការបានលើគ្រប់ ទិដ្ឋភាព និងកាលៈទេសៈនៃគ្រោះមហន្តរាយ។
សកម្មភាពជាតិសម្រាប់កាត់បន្ថយហានិភ័យគ្រោះមហន្តរាយ គឺដាក់ចេញគោលនយោបាយជាតិគាំពារសង្គមអនុវត្តគោលនយោបាយភូមិ-ឃុំមានសុវត្ថិភាព ដំណើរការប្រព័ន្ធស្បៀងបម្រុងកម្ពុជា ដោយបម្រុងសៀង គ្រាប់ពូជ និងសាច់ប្រាក់ ដើម្បីជួយប្រជាជនរងគ្រោះ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
