បន្ទាយមានជ័យ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានឱ្យដឹងថា បើទោះបីមាន​ភ្លៀង​បន្ត​ធ្លាក់ជារៀងរាល់ថ្ងៃ ​ប៉ុន្តែខេត្តបន្ទាយមានជ័យ មិនមានការប្រឈម​នឹងជំនន់ទឹកភ្លៀង​នៅឡើយទេ។

នៅថ្ងៃទី១៣ ខែកញ្ញា ឆ្នាំ២០២២ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានចុះ ពិនិត្យ​ស្ថានភាពទឹកជំនន់​ដែលស្រុងមកពីប៉ែកខាងលិចនៃឃុំសឿ​ ស្ថិតក្នុងភូមិបល្ល័ង្គជ្រៃ ឃុំសឿ ស្រុកមង្គលបូរី។

ឯកឧត្តម អ៊ុំ រាត្រី បញ្ជាក់ថា គិតត្រឹមថ្ងៃនេះ ​ក្នុងភូមិសាស្ត្រខេត្តបន្ទាយមានជ័យ ​ពុំទាន់មានគ្រោះ​ទឹកជំនន់​កើតឡើងនោះទេ ​មាន​តែ​ស្ថានភាពទឹកហូរពីទីខ្ពស់មកកាន់តំបន់ទំនាបបឹង និងស្ទឹង ដែលបានធ្វើអោយស្ថានភាពមានការកើនឡើង ​កន្លែងខ្លះមានការជនលិចផ្លូវ និង​ហូរកាត់ផ្លូវត្រង់ទីតាំងមុខ​ទឹកនៅតំបន់ទំនាបតែប៉ុណ្ណោះ។

ឯកឧត្តម បានក្រើនរំលឹកដល់មន្ត្រីពាក់ព័ន្ធ ​និងអាជ្ញាធរមូលដ្ឋានត្រូវផ្តល់កិច្ចសហការក្តាប់ព័ត៌មាន និង​រាយការណ៍ឲ្យបានទាន់ពេលវេលាចំពោះករណីស្ថាន​ភាព​ទឹកក្នុង​ករណីមានការហក់ឡើង​ខ្លាំង​ជាការព្រួយបារម្ភណាមួយ៕