ឧត្តរមានជ័យ៖ មន្ដ្រីជំនាញជំរុញដល់កសិករក្នុងខេត្តឧត្តរមានជ័យ ធ្វើយ៉ាងណាត្រូវមានចលនាភូមិមួយផលិតផលមួយក្នុងការផលិតមុខរបរនិងជំនាញដាំដុះនានាឲ្យបានច្រើន ដើម្បីលើកកម្ពស់ផលិតផលរបស់ខ្មែរឱ្យបានកាន់តែប្រសើរឡើង ដើម្បីជៀសវាងនាំចូលផលិតផលពីក្រៅស្រុក។
ឯកឧត្តមបណ្ឌិត សួង ណយ អគ្គលេខាធិការងគណៈកម្មាធិការជាតិភូមិមួយផលិតផលមួយ ថ្លែងបែបនេះ ក្នុងឱកាសអញ្ជើញចូលរួមក្នុងវេទិកាផ្គូផ្គងរវាងអ្នកផលិត និងអ្នកទិញក្រោមគម្រោងអភិវឌ្ឃន៍អាជីវកម្មប្រកបដោយសុចរិតភាពក្នុងការទទួលបានទីផ្សារសម្រាប់អ្នកផលិតក្នុងស្រុក នៃខេត្តឧត្តរមានជ័យ។
ឯកឧត្តម បន្តថា កត្តាទាំងអស់នេះហើយគឺយើងគ្រប់រូបដែលជាកសិករអាចទទួលបាននូវអត្ថប្រយោជន៍ច្រើនពីការផលិតនេះ នៅតាមមូលដ្ឋានរបស់ខ្លួន និងអាចមានប្រាក់ចំណូលខ្ពស់ដោយត្រូវធ្វើការផ្សព្វផ្សាយឲ្យបានទូលំទូលាយពីផលិតផលរបស់ខ្លួននៅតាមសាលារៀននិងនៅតាមទីសាធារណៈពីផលិតនានារបស់ខ្មែរដែលបងប្អូនផលិតបាននោះ។
ទន្ទឹមគ្នានោះ ឯកឧត្តម បានស្នើឲ្យប្រធានមន្ទីរស្ថាប័នជំនាញពាក់ព័ន្ធក្នុងខេត្តទាំងអស់ធ្វើយ៉ាងណាត្រូវបង្កើននិងពង្រីកការរកទីផ្សារឱ្យបានទូលំទូលាយដើម្បីជួយគាំទ្រផលិតផលដែលផលិតចេញពីកូនខ្មែររបស់ចលនាភូមិ១ ផលិតផល១ ក្នុងស្រុករបស់កសិករឱ្យទទួលភាពរីកចំរើនទៅថ្ងៃមុខផងដែរ។
ក្នុងឱកាសនោះដែរលោកជំទាវ មិន ធារី អភិបាលរងខេត្តឧត្តរមានជ័យ បានលើកឡើងថា ការដែលបង្កើតឱ្យមានចលនាភូមិមួយផលិតផលមួយ ក្នុងខេត្តឧត្តរមានជ័យ គឺវាអាចធ្វើឱ្យកសិករដែលជាអ្នកផលិតអាចទទួលបានផលប្រយោជន៍ច្រើន នៅលើទីផ្សារក្នុងស្រុក ដោយមានការគាំទ្រពីសំណាក់អ្នកទិញជៀសវាងការនាំផលិតផលមកពីក្រៅស្រុក៕ អត្ថបទ៖ សារិទ្ធិ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
