ភ្នំពេញ៖ ប្រធានសមាគមអ្នកផលិតចំណីអាហារកម្ពុជាថា នៅក្នុងឱកាសភ្ជុំបិណ្ឌនេះ ការផ្គត់ផ្គង់ និងចែកចាយចំណីរអាហារនៅលើទីផ្សារ មិនមានការខ្វះខាតនោះឡើយ ខណៈបច្ចុប្បន្នការផលិត នឹងវេចខ្ចប់ចំណីអាហារនៅក្នុងស្រុក បានដំណើរការល្អប្រសើរ និងជាអាហារដែលមានគុណភាព និងសុវត្ថិភាពសម្រាប់អ្នកប្រើប្រាស់ ។

លោក មៀវ សុខទ្រី ប្រធានសមាគមអ្នកផលិតចំណីអាហារកម្ពុជា លើកឡើង​ក្នុង​កិច្ច​សម្ភាសន៍​ជាមួយ​ភ្នាក់ងារអ្នកយកព័ត៌មាន BTV នៅថ្ងៃទី ១៣ខែកញ្ញា ឆ្នាំ២០២២នេះថា ទាក់ទងនឹងការផលិត និងវេចខ្ចប់​ចំណីអាហារ ​ជាពិសេសនៅក្នុងវិបត្តិជំងឺកូវីដ១៩ រាជរដ្ឋាភិបាលបានយកចិត្តទុកដាក់​យ៉ាងខ្លាំង ​ព្រមទាំងផ្តល់ជាហិរញ្ញប្បទាន ​ដើម្បីគាំទ្រដល់ដំណើរការផលិត ​សម្រាប់ការ​ផ្គត់ផ្គង់ និង​ការចែកចាយចំណីអាហារនៅលើទីផ្សារ។

លោក បន្តថា ដោយមានការយកចិត្តទុកដាក់ពីរាជរដ្ឋាភិបាល ក្នុងនោះបន្ទាប់ពីការបើកប្រទេស និង​បើកឲ្យដំណើរគ្រប់វិស័យឡើងវិញ ​ចំពោះការផលិត ​និងវេចខ្ចប់ចំណីអាហាររបស់សហគ្រាស និង​សិប្បកម្មនៅកម្ពុជា​ បានដំណើរការល្អប្រសើរ ​និងងើបឡើងវិញជាបណ្តើរៗ ជាពិសេសនៅក្នុង​ឱកាស​ភ្ជុំបិណ្ឌនេះ​ ម្ចាស់សហគ្រាស​ និងសិប្បកម្មនានាបានបង្កើនការផលិត សម្រាប់​ផ្គត់ផ្គង់​ដល់​ប្រជាពលរដ្ឋ ហើយក្នុងឱកាសនេះដែរ​ ម្ចាស់អាជីវកម្មមួយចំនួន ក៏បានលើកទឹកចិត្ត ឬក៏បញ្ចុះថ្លៃជូនដល់ប្រជាពលរដ្ឋផងដែរ។

ចំណែកពាក់ព័ន្ធសុវត្ថិភាពចំណីអាហារ លោក មៀវ សុខទ្រី បានបញ្ជាក់ថា ពាក់ព័ន្ធសុវត្ថិភាព​ចំណី​អាហារនេះ សមាជិករបស់សមាគមអ្នកផលិតចំណីអាហារទាំងអស់ ​បានចុះបញ្ជីការ នៅក្រសួង​ឧស្សាហកម្ម វិទ្យាសាស្រ្ត បច្ចេកវិទ្យា ​និងនិវានុវត្តន៍​យ៉ាងត្រឹមត្រូវ ព្រមទាំង​បានចូលរួមវគ្គ​បណ្តុះ​បណ្តាល និងបានផ្សព្វផ្សាយអំពីសុវត្ថិភាពចំណីអាហារទៅដល់ខេត្ត-ក្រុងជាបន្តបន្ទាប់ ដូច្នេះ​ចំពោះផលិតផលដែលផលិត​ ឬវេចខ្ចប់ចំណីអាហារចេញពីសមាជិករបស់សមាគម គឺធានានូវ​សុវត្ថិភាព ១០០ ភាគរយ​ ដល់អ្នកប្រើប្រាស់។

សូមបញ្ជាក់ថា ទាក់ទងសុវត្ថិភាពចំណីអាហារនេះ ក្រសួងសុខាភិបាល ​បានធ្វើការក្រើនរំលឹក និង​ជម្រុញ​លើកទឹកចិត្តដល់សាធារណៈជន ​និងស្ថាប័នពាក់ព័ន្ធ អង្គភាពសាធារណៈ អាជ្ញាធរគ្រប់​លំដាប់ថ្នាក់​ ដើម្បីការពារ​សុខភាព​ផ្ទាល់ខ្លួន​ពីការចម្លងវីរុសកូវីដ ១៩ ​និងការពុលចំណីអាហារ ក្នុង​អំឡុងពិធីបុណ្យកាន់បិណ្ឌ និងភ្ជុំបិណ្ឌ ​នឹងបន្ទាប់ពីចប់ពិធីបុណ្យប្រពៃណីជាតិនេះ ប្រជាពលរដ្ឋ​ទាំងអស់ ត្រូវបន្តការពារខ្លួនជាបន្តបន្ទាប់បន្ថែមទៀត ​ដើម្បីសុវត្ថិភាព ​និងសុខភាពរបស់ខ្លួន៕

អត្ថបទ៖ សុន រ៉ាឌី