ភ្នំពេញ៖ ក្រសួងសុខាភិបាលបានប្រកាសនៅព្រឹកថ្ងៃនេះ មនុស្ស ៩១នាក់បន្ថែមទៀត ត្រូវបានរកឃើញឆ្លងមេរោគកូវីដ១៩ ដែលនាំឱ្យប្រទេសកម្ពុជាមានអ្នកឆ្លងសរុបដល់ទៅជិត ៣ពាន់នាក់ហើយរហូតមកដល់ថ្ងៃនេះ។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលបាននិយាយថា ករណីឆ្លងថ្មី ៩០នាក់នេះ សុទ្ធតែពាក់ព័ន្ធនឹងការឆ្លងក្នុងសហគមន៍២០កុម្ភៈ ហើយត្រូវបានរកឃើញនៅរាជធានីភ្នំពេញច្រើនជាងគេរហូតដល់ទៅ ៧៨នាក់ ខេត្តតាកែវ ៤នាក់ ខេត្តស្វាយរៀង ៣នាក់ និងរកឃើញ ១ករណីនៅខេត្តត្បូងឃ្មុំ ពោធិ៍សាត់ កំពង់ចាម ប៉ៃលិន និងព្រៃវែង។
ចំណែកមួយករណីទៀត ក្រសួងបញ្ជាក់ថា ជាករណីនាំចូលពីក្រៅប្រទេសដែលត្រូវបានរកឃើញលើបុរសជនជាតិឥណ្ឌូនេស៊ីម្នាក់អាយុ ៣៣ឆ្នាំ ដែលបានធ្វើដំណើរមកដល់កម្ពុជាកាលថ្ងៃចន្ទដើមសប្ដាហ៍នេះ។
គិតត្រឹមថ្ងៃនេះ កម្ពុជារកឃើញអ្នកឆ្លងមេរោគកូវីដ១៩សរុបកើនឡើងទៅដល់ចំនួន ២ ៩១៥ករណីហើយនៅទូទាំងប្រទេសគិតចាប់តាំងពីថ្ងៃទី២៧ ខែមករាឆ្នាំមុនមក ក្នុងនោះករណីឆ្លងក្នុងសហគមន៍២០កុម្ភៈនេះ មានចំនួនសរុបដល់ទៅ ២ ៣៨០នាក់។
ទន្ទឹមគ្នានេះ ក្រសួងសុខាភិបាលក៏បានប្រកាសផងដែរថា អ្នកជំងឺសរុបដល់ទៅ ១ ៨២៤នាក់ហើយ ត្រូវបានព្យាបាលជាសះស្បើយ និងអនុញ្ញាតឱ្យចាកចេញពីមន្ទីរពេទ្យ ក្នុងនោះមានទាំងអ្នកជាសះស្បើយ ៣០នាក់ដែលក្រសួងប្រកាសនៅថ្ងៃនេះផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
