ភ្នំពេញ៖ នារសៀលថ្ងៃទី១៣ ខែកញ្ញា ឆ្នាំ២០២២ ព្រះអង្គម្ចាស់ នរោត្តម ចក្រាវុធ ព្រះប្រធាន​គណបក្សហ៊្វុនស៊ិនប៉ិច និងព្រះអង្គម្ចាស់ក្សត្រីយ៍ នរោត្តម រតនាទេវី អនុប្រធានគណបក្ស បានយាង​ដាក់កូរោនផ្កាគោរពព្រះវិញ្ញាណក្ខន្ធ​ព្រះមហាក្សត្រីយ៍អេលីហ្សាបេតទី២ នៃចក្រភពអង់គ្លេស ដែល​បាន​សោយព្រះទិវង្គត កាលពីរសៀលថ្ងៃទី០៨ ខែកញ្ញា ឆ្នាំ២០២២ ក្នុងព្រះជម្ម៩៦ ព្រះវស្សា នៅស្ថានឯកអគ្គរាជទូតនៃចក្រភពអង់គ្លេសប្រចាំកម្ពុជា ស្ថិតក្នុងខណ្ឌដូនពេញ រាជធានីភ្នំពេញ។

ក្នុងនាមប្រជារាស្ត្រខ្មែរ និងថ្នាក់ដឹកនាំសមាជិកសមាជិកា ​គណបក្សហ៊្វុនស៊ិនប៉ិច បានសម្តែងនូវ​មនោសព្ចោតនា​ដ៏សែនក្រៀមក្រំបំផុត​ ចូលរួម​រំលែក​មរណទុក្ខ​ជាមួយ​ព្រះរាជវង្សានុវង្ស និង​ប្រជាជន​នៃចក្រភពអង់គ្លេស ​ចំពោះការបាត់បង់ដ៏ធំធេងនូវអង្គព្រះមហាក្សត្រិយ៍ដ៏ឆ្នើម ដែលជា​និមិត្តរូបនៃប្រជាជាតិ ​និងប្រជាជននៃចក្រភពអង់គ្លេស។

ក្នុងឱកាសនេះ ព្រះអង្គម្ចាស់ នរោត្តម ចក្រាវុធ​ សូម​ឧទ្ទិស​បួងសួង​ចំពោះដួងព្រះវិញ្ញាណក្ខន្ធ​ព្រះមហាក្សត្រិយ៍​អេលីហ្សាបេតទី២ ទ្រង់​បានយាងទៅ​សោយ​សុខ​ក្នុងសុគតិភព​ជា​និរន្ត​កុំបី​ឃ្លៀងឃ្លាត​ឡើយ៕