សៀមរាប៖ ដំណើរការនៃកិច្ចប្រជុំរដ្ឋមន្ត្រីសេដ្ឋកិច្ចអាស៊ាន ដែលកម្ពុជាធ្វើម្ចាស់ផ្ទះនៅឆ្នាំនេះ បាននិងកំពុងធ្វើឡើងចាប់ពីថ្ងៃទី១១ ដល់ថ្ងៃទី១៨ ខែកញ្ញា ឆ្នាំ២០២២ នៅសណ្ឋាគារសុខា ខេត្តសៀមរាប ហើយនៅថ្ងៃទី១៣ ខែកញ្ញា ឆ្នាំ២០២២ នេះ ឧត្តមមន្ត្រីសេដ្ឋកិច្ចអាស៊ាន បានបន្តពិភាក្សាគ្នាពីរបៀបវារៈសំខាន់ៗ ខណៈកិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងកិច្ចប្រជុំពាក់ព័ន្ធ នឹងបើកជាផ្លូវការនៅថ្ងៃស្អែក។
ក្រុមឧត្តមមន្ត្រីសេដ្ឋកិច្ចអាស៊ាន នៅថ្ងៃនេះ បានបន្តបើកកិច្ចប្រជុំពិភាក្សាពីរបៀបវារៈនានា ដើម្បីដាក់ជូនក្នុងកិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងកិច្ចប្រជុំពាក់ព័ន្ធ ដែលធ្វើឡើងនៅក្នុងខេត្តសៀមរាបរយៈពេល ១សប្តាហ៍ ពោល គឺពីថ្ងៃទី១១ ដល់ថ្ងៃទី១៨ ខែកញ្ញា ឆ្នាំ២០២២។ ចំពោះកិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងកិច្ចប្រជុំពាក់ព័ន្ធជាផ្លូវការ នឹងចាប់ផ្តើមពីថ្ងៃទី១៤ រហូតដល់ថ្ងៃទី១៨ ខែកញ្ញា ឆ្នាំ២០២២។ ពិធីបើកជាផ្លូវការ នឹងធ្វើឡើងនៅថ្ងៃទី១៤ ខែកញ្ញា ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
នៅថ្ងៃទី១៣ ខែកញ្ញា ឆ្នាំ២០២២ នេះផងដែរ ក៏មានកិច្ចប្រជុំសំខាន់ៗមួយចំនួនដូចជា កិច្ចប្រជុំឧត្តមមន្ត្រីសេដ្ឋកិច្ចអាស៊ាន-ឥណ្ឌា ដើម្បីពិភាក្សាលម្អិតប្រធានបទសំខាន់ មុននឹងសម្រេចដាក់ជូនក្នុងកិច្ចប្រជុំរដ្ឋមន្ត្រីសេដ្ឋកិច្ចអាស៊ាន-ឥណ្ឌា និងពិធីពិភាក្សាអាហារការងាររបស់រដ្ឋមន្ត្រីសេដ្ឋកិច្ចអាស៊ានផងដែរ។
ឯកឧត្ដម ប៉ែន សុវិជាតិ អ្នកនាំពាក្យ នៃកិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងកិច្ចប្រជុំពាក់ព័ន្ធ បានលើកឡើងថា ក្រសួងពាណិជ្ជកម្ម និងស្ថាប័នពាក់ព័ន្ធ បានរៀបចំរួចរាល់ហើយ សម្រាប់កម្មវិធីបើកជាផ្លូវការនូវកិច្ចប្រជុំរដ្ឋមន្ត្រីសេដ្ឋកិច្ចអាស៊ានក្រោមវត្តមានដ៏ខ្ពង់ខ្ពស់របស់សម្តេចតេជោ នៅថ្ងៃទី១៤ ខែកញ្ញា ស្អែកនេះ។
បើតាមឯកឧត្តម សុវិជាតិ កិច្ចប្រជុំនេះ គឺជាឱកាសសម្រាប់កម្ពុជា បង្ហាញពីវឌ្ឍភាពនៃសេដ្ឋកិច្ចរបស់ខ្លួន និងផ្តល់មតិយោបល់ក្នុងការដោះស្រាយបញ្ហាសេដ្ឋកិច្ចតំបន់ និងពិភពលោក ដែលបានរងផលប៉ះពាល់ដោយសារវិបត្តិកូវីដ ១៩ និងបញ្ហាសង្គ្រាមរុស្ស៊ី និងអ៊ុយក្រែន។ បន្ថែមពីលើនេះ ឯកឧត្ដមបញ្ជាក់ថា តាមរយៈកិច្ចប្រជុំនេះ កម្ពុជាក៏បានបង្ហាញពីសក្ដានុពលទេសចរណ៍របស់ខ្លួនដ៏អស្ចារ្យ ជាពិសេសនៅក្នុងខេត្តសៀមរាបតែម្តង ទៅដល់ថ្នាក់ដឹកនាំ អ្នកវិនិយោគ នៃបណ្តាប្រទេសដែលបានចូលរួមនៅក្នុងកិច្ចប្រជុំនេះ៕ អត្ថបទ៖ ជា ធីរិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
