កំពង់ឆ្នាំង់៖ រហូតមកដល់ថ្ងៃទី១៤ ខែកញ្ញា ឆ្នាំ២០២២នេះ អុសស្ទែរដែលជាប្រភេទព្រៃឈើលិចទឹក មិនទាន់មានអ្នកទប់ស្កាត់នៅឡើយ ដែលរហូតមកដល់ថ្ងៃនេះ គឺនៅមានចរាចរណ៍យ៉ាងមមាញឹក នៅតាមច្រាំងទន្លេចុងកោះ ស្ថិតក្នុងសង្កាត់ផ្សារឆ្នាំង ក្រុងកំពង់ឆ្នាំង។
រយៈពេលជិត២ឆ្នាំមកហើយ ដែលប្រភេទអុសស្ទែរជាព្រៃឈើលិចទឹក ត្រូវបានឈ្មួញមួយចំនួន បានដឹក និងប្រមូលទិញមកអង្កន់ដឹកចេញទាំងរថយន្តៗយកទៅលក់នៅស្ទើគ្រប់កន្លែង ។ កន្លងមក ប្រជាពលរដ្ឋដែលធ្លាប់បានឃើញ គឺគេបាននាំគ្នាទៅកាប់យកឈើងាប់ៗដែលពួកគេបានចាក់ថ្នាំសម្លាប់ហើយនោះ យកមកធ្វើជាអុសស្ទែរ ចំណែកដើមឈើលិចទឹកដែលត្រូវយកនៅពេលក្រោយ គឺត្រូវបានគេយកថ្នាំចាក់សម្លាប់បន្ត។
ការប្រមូលទិញអុសស្ទែរពីតាមបណ្តាអ្នកចូលទៅកាប់យកមកលក់នោះ គឺពួកគេបានយកមកទម្លាក់ទុកនៅក្នុងទឹកទន្លេ រួចមកគេបានយកមកពុះកាត់ជាចំរៀកៗ បន្ទាប់មកបានដាក់តាមឡានយកទៅលក់នៅគ្រប់កន្លែង។
ពាក់ព័ន្ធនឹងករណីខាងលើនេះ លោក ងិន ហ៊ុន ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកំពង់ឆ្នាំងបានអោយដឹងថា ចំពោះការចរាចរណ៍អុសស្ទែរប្រភេទព្រៃលិចទឹកខាងលើនេះ គឺជាការខុសច្បាប់ទាំងស្រុង មិនត្រូវបណ្តែតបណ្តោយអោយកើតមានបញ្ហាបែបនេះនោះទេ។ ម្យ៉ាងទៀត លោកនឹងអោយខ័ណ្ឌរដ្ឋបាលជលផលកំពង់ឆ្នាំង ចំណាត់ការតាមនីតិវិធី មិនអោយកើតមានបញ្ហាបែបនេះទៀតនោះឡើយ។
លោក ងិន ហ៊ុន ក៏បានបញ្ជាក់បន្ថែមពីសារៈសំខាន់នៃព្រៃលិចទឹក គឺព្រៃលិចទឹកអាចជួយការពារដល់អាយុជីវិតមនុស្ស សត្វ ជួយជារបាំងខ្យល់ ជាជម្រកត្រីគ្រប់ប្រភេទពងកូន និងជួយចំរោះជាតិពុលចេញពីក្នុងទឹកទន្លេទៀតផងដែរ ៕ អត្ថបទ៖ ហុង វាស្នា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
