ភ្នំពេញ៖ ប្រជាពុទ្ធបរិស័ទ លោកតា លោកយាយ ក្មេង ចាស់ ប្រុស ស្រី តាមរយៈBTV ព័ត៌មាន នាព្រឹកថ្ងៃទី១៤ ខែកញ្ញា ឆ្នាំ២០២២ បានគោរពថ្លែងអំណរគុណប្រមុខរាជរដ្ឋាភិបាល ជាពិសស​សម្តេច​អគ្គ​មហាសេនាបតីតេជោ ហ៊ុន សែន នាយករដ្ឋមន្រី្ត ​បានអនុញ្ញាតឲ្យ​មានការ​មកជួបជុំគ្នាធ្វើបុណ្យទានតាមវត្តអារាម ​នាឱកាសបុណ្យភ្ជុំបិណ្ឌ និងកាន់បិណ្ឌ។

ទន្ទឹមនឹងនោះព្រះបដិកធម្ម ម៉ៅ នីម ព្រះរាជាគណៈថ្នាក់ចត្វា ព្រះអនុគណខណ្ឌ៧មករា និងជា​ព្រះចៅអធិការវត្តព្រះពុទ្ធមានបុណ្យ មានព្រះថេរដីកាថា ក្នុងពិធីបុណ្យកាន់បិណ្ឌ និងភ្ជុំបិណ្ឌនេះ មានន័យជារួមថា ជាការទ្រទ្រង់នូវព្រះពុទ្ធសាសនា ​ជាពិសេសនោះគឺការទ្រទ្រង់ព្រះសង្ឃ ​អនុគ្រោះ​ដល់​ព្រះសង្ឃ ​ដែល​លោកគង់ចាំព្រះវស្សាណាហើយ លោកបាន​ទទួល​នូវចង្ហាន់​បិណ្ឌបាត​ពី​ញាតិញោម។

សូមបញ្ជាក់ផងដែរថា កាលពីថ្ងៃទី១០ ខែកញ្ញា ឆ្នាំ២០២២ ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានចេញសេចក្តីណែនាំ ​ស្តីពីការការពារការចម្លងវីរុសកូវីដ-១៩ និង​ការពុល ចំណីអាហារ ក្នុងអំឡុងពិធីបុណ្យកាន់បិណ្ឌ និងភ្ជុំបិណ្ឌ​ ដោយធ្វើការក្រើនរំលឹក និង​ជំរុញ​លើក​ទឹកចិត្ត​ដល់​សាធារណជន​ ស្ថាប័នពាក់ព័ន្ធ ​អង្គភាពសាធារណៈ អាជ្ញាធរមូលដ្ឋាន​គ្រប់​លំដាប់ថ្នាក់ ​សេវាឯកជន ​និងជនបរទេស ​ដែលកំពុងរស់​នៅក្នុងប្រទេសកម្ពុជា​ទាំងអស់ ​សូម​ចូលរួម​អនុវត្ត​នូវវិធានការចាំបាច់នានា ​ដើម្បីការពារសុខភាពផ្ទាល់ខ្លួន ​ពីការចម្លងជំងឺផ្សេងៗ រួម​ទាំង​ការការពារការចម្លងវីរុសកូវីដ-១៩​ និងការ​ពុល​ចំណីអាហារ ក្នុងអំឡុងពិធីបុណ្យកាន់បិណ្ឌ និងភ្ជុំបិណ្ឌ​ ដែលនឹងប្រព្រឹត្តទៅចាប់ពីថ្ងៃទី១១ ដល់ថ្ងៃទី២៦ ​ខែកញ្ញា ឆ្នាំ២០២២ និងបន្តការពារ​ខ្លួន​ជាបន្តទៀត នៅក្រោយពេលពី​ចប់ពិធីបុណ្យ​ប្រពៃណី​ជាតិនេះផងដែរ៕

អត្ថបទ រដ្ឋា