​​អា​មេ​នី៖ ប្រទេស​អា​មេ​នី និង​អា​ហ្ស៊ែ​បៃ​ហ្ស​ង់​បាន​ស្ដីបន្ទោស​ដាក់គ្នា​ ចំពោះ​ការ​ប៉ះទង្គិច​គ្នា​ជា​បន្ត​បន្ទាប់​ដែល​បាន​ផ្ទុះឡើង​នៅ​តាម​ព្រំដែន​ប្រទេស​ទាំង​២ នូវ​អ្វី​ដែល​ជា​ការ​ប៉ះទង្គិច​គ្នា​ដ៏​ខ្លាំងក្លា​រវាង​គូប្រជែង​ប្រទេសជិតខាង​ទាំង​២ ​ចាប់​តាំង​ពី​សង្គ្រាម​ឆ្នាំ២០២០ មក​ជុំវិញ​តំបន់​ជម្លោះ Nagorno-Karabakh។

​យោង​តាម​ក្រសួងការពារជាតិ​របស់​ប្រទេស​អា​មេ​នី អរិភាព​ទាំង​នោះ​បាន​ផ្ទុះឡើង​កាលពី​ព្រឹក​ថ្ងៃ​អង្គារ នៅ​ពេល​ដែល​កងកម្លាំង​អា​ហ្ស៊ែ​បៃ​ហ្ស​ង់​បាន​វាយប្រហារ​ឆ្លង​ព្រំដែន​ដោយ​ប្រើ​កាំភ្លើង​ផ្លោង កាំភ្លើងត្បាល់ យាន​ដ្រូ​ន និង​កាំភ្លើង​វែង ដែល​បាន​សម្លាប់​ទាហាន​អា​មេ​នី​យ៉ាង​ហោចណាស់ ​៤៩​នាក់។ យោធា​បាន​និយាយ​ថា ការវាយប្រហារ​នានា​បាន​ដាក់​គោលដៅ​លើ​ទាំង​យោធា ទាំង​ហេដ្ឋារចនាសម្ព័ន្ធ​ស៊ីវិល ទាំង​ក្នុង ​និង​ក្រៅ​ទីប្រជុំជន​ និង​ភូមិឋាន​មួយ​ចំនួនរួម​ទាំង​ទីប្រជុំជន Vardenis, Sotk, Artanish, Ishkhanasar,Goris Jermuk និង Kapan ដែល​បង្ខំ​ឲ្យ​មានការ​បាញ់​តបត​វិញ​។

ខណៈ​ការ​វាយ​ប្រយុទ្ធ​គ្នា​ទំនងជា​ស្ងប់ស្ងាត់​បន្តិច សេចក្ដីថ្លែងការណ៍​ចេញ​ដោយ​ការិយាល័យ​ប្រធានាធិបតី​អា​ហ្ស៊ែ​បៃ​ហ្ស​ង់​លោក Ilham Aliyev បាន​និយាយ​ថា ​កងកម្លាំងប្រដាប់អាវុធ​របស់​ប្រទេស​នេះ​ អាច​គ្រប់គ្រង​ស្ថានការណ៍​នៅ​តាម​ព្រំដែន​បាន​ហើយ ចំណែក​ក្រសួងការពារជាតិ​អា​មេ​នី​វិញ​បាន​ព្រមាន​ថា ស្ថានភាព​នៅ​តាម​តំបន់​ព្រំដែន​មួយចំនួន​នៅតែ​តានតឹង​ខ្លាំង​នៅឡើយ​។​ ​លោកនាយក​រដ្ឋមន្ត្រី​អា​មេ​នី Nikol Pashinyan បាន​និយាយ​ថា ​ទាហាន​របស់​ខ្លួន​ចំនួន ​៤៩​នាក់​ស្លាប់ក្នុង​ការ​ប៉ះទង្គិច​គ្នា​កាលពី​យប់​អធ្រាត្រ ខណៈ​ក្រសួងការពារជាតិ​អា​ហ្ស៊ែ​បៃ​ហ្ស​ង់​និយាយ​ថា ទាហាន​របស់​ខ្លួន​ ៥០​នាក់​ក៏បាន​ស្លាប់​ដែរ​។ កាលពី​ថ្ង​អង្គារ​សប្ដាហ៍​នេះ​ដែរ​រុស្ស៊ី​និយាយ​ថា ខ្លួន​បាន​សម្រប​សម្រួល​ឲ្យ​មាន​បទ​ឈប់​បាញ់​ចំពោះ​ការ​ផ្ទុះ​អាវុធ​ចុងក្រោយ​នេះ​៕

អត្ថបទ៖ សុខមាន