ភ្នំពេញ៖ ក្រុមប្រឹក្សាតំបន់ពាណិជ្ជកម្មសេរីអាស៊ាន បានបើកកិច្ចប្រជុំរដ្ឋមន្ត្រីក្រុមប្រឹក្សាតំបន់ពាណិជ្ជកម្មសេរីអាស៊ានលើកទី៣៦ នៅសណ្ឋាគារសុខា ខេត្តសៀមរាប នៅថ្ងៃទី១៤ ខែកញ្ញា ដើម្បីពិភាក្សាលើវឌ្ឍនភាពនៃកិច្ចសហប្រតិបត្តិការ បញ្ហាប្រឈម និងដំណោះស្រាយក្នុងតំបន់។
ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី, រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ និងជារដ្ឋមន្ត្រីក្រុមប្រឹក្សាអាហ្វតា (AFTA) របស់កម្ពុជា លើកឡើងក្នុងកិច្ចប្រជុំរដ្ឋមន្ត្រីក្រុមប្រឹក្សាតំបន់ពាណិជ្ជកម្មសេរីអាស៊ានលើកទី ៣៦ នៅសណ្ឋាគារសុខា ខេត្តសៀមរាប នៅថ្ងៃទី ១៤ ខែ កញ្ញា ឆ្នាំ ២០២២ នេះថា គិតចាប់តាំងពីការបង្កើតក្រុមប្រឹក្សាតំបន់ពាណិជ្ជកម្មសេរីអាស៊ាន ក្នុងឆ្នាំ ១៩៩២, បណ្តាប្រទេសជាសមាជិកសម្រេចបាននូវវឌ្ឍនភាពគួរឱ្យកត់សម្គាល់ ដើម្បីសម្រេចបាននូវចក្ខុវិស័យរួមរបស់អាស៊ាន ក្នុងការបង្កើតទីផ្សារ និងមូលដ្ឋានផលិតកម្មតែមួយ ការលើកកម្ពស់ភាពប្រកួតប្រជែងតំបន់ និងការអភិវឌ្ឍសេដ្ឋកិច្ច ប្រកបដោយសមធម៌ ព្រមទាំងការធ្វើសមាហរណកម្មពេញលេញទៅក្នុងពិភពលោក។
ឯកឧត្តម បញ្ជាក់ថា អាស៊ានបានលុបបំបាតអត្រាពន្ធគយប្រមាណ ៩០% នៃបន្ទាត់ពន្ធសរុប និងមានការលុបបំបាត់របាំងមិនមែនពន្ធផងដែរ ក្នុងនោះចំពោះការធ្វើពាណិជ្ជកម្មអាស៊ាន ជាមួយបណ្តាប្រទេសនានា ក្នុងពិភពលោកមានចំនួនប្រមាណ ៣.៣ ទ្រីលានដុល្លារសហរដ្ឋអាមេរិក ចំណែកការធ្វើពាណិជ្ជកម្មរវាងសមាជិកអាស៊ានមានចំនួន ៧១២ ប៊ីលានដុល្លារអាមេរិក ក្នុងឆ្នាំ ២០២១ ដែលបានរួមចំណែកក្នុងកំណើនសេដ្ឋកិច្ចអាស៊ានប្រមាណ ៣ ភាគរយ ក្នុងឆ្នាំ ២០២១ផងដែរ។
ឯកឧត្តម បានបន្តថា កម្ពុជាបានធ្វើជាប្រធានប្តូរវេន របស់អាស៊ានក្នុងឆ្នាំ២០២២នេះ គឺចំពេលដែលពិភពលោក និងតំបន់ បាននិងកំពុងប្រឈមនឹងហានិភ័យ និងភាពមិនប្រាកដប្រជាជាច្រើនដូចជា ការអូសបន្លាយនៃសង្គ្រាមអ៊ុយក្រែន, ការបន្តរីករាលដាលនៃជំងឺកូវីដបំប្លែងថ្មី និងបញ្ហាការកើនឡើងនៃអតិផរណា ព្រមទាំងភាពរអាក់រអួលនៃខ្សែចង្វាក់ផ្គត់ផ្គង់ និងផលិតជាដើម។
ហានិភ័យ និងភាពមិនប្រាកដប្រជាទាំងនេះ បាននិងកំពុងបន្ថយល្បឿននៃដំណើរការស្តារសេដ្ឋកិច្ចឡើងវិញរបស់តំបន់។ ដូចនេះ ការអនុម័តប្រធានបទរបស់អាស៊ានឆ្នាំ២០២២ អាស៊ានរួមគ្នាធ្វើ៖ ដោះស្រាយបញ្ហាប្រឈមទាំងអស់ គឺមានគោលបំណងលើកកម្ពស់កិច្ចខិតខំប្រឺងប្រែងរួមគ្នារបស់អាស៊ាន ដើម្បីសម្រេចកិច្ចការសំខាន់ៗរបស់តំបន់ ជាពិសេសការស្តារកំណើនសេដ្ឋកិច្ចតំបន់ និងពន្លឿនដំណើរការកសាងនៃសហគមន៍អាស៊ាន ប្រកបដោយសមធម៌ ភាពខ្លាំង និងបរិយាប័ន្ន។
សូមបញ្ជាក់ថា កិច្ចប្រជុំរដ្ឋមន្ត្រីក្រុមប្រឹក្សាតំបន់ពាណិជ្ជកម្មសេរីអាស៊ានលើកទី៣៦ បានធ្វើការកត់សម្គាល់អំពីវឌ្ឍនភាពសំខាន់ៗ ពាក់ព័ន្ធនឹង ការលើកកម្ពស់កិច្ចសម្រួលពាណិជ្ជកម្មក្នុងតំបន់ តាមរយៈការពង្រីកការអនុវត្តការផ្លាស់ប្តូរឯកសារប្រតិវេទន៍គយអាស៊ាន (ACDD) និងឯកសារពាក់ព័ន្ធពាណិជ្ជកម្មដ៏ទៃទៀត តាមប្រព័ន្ធបញ្ជរតែមួយអាស៊ាន និងការអនុវត្តប្រព័ន្ធឆ្លងកាត់គយអាស៊ាន (ACTS) ក៏ដូចជាការធ្វើសមាហរណកម្មគយអាស៊ាន តាមរយៈការជំរុញការអនុវត្តយន្តការប្រតិបត្តិករសេដ្ឋកិច្ច ដែលទទួលបានការអនុញ្ញាត៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
