ភ្នំពេញ៖ អ្នកនាំពាក្យក្រសួងព័ត៌មាន លោក មាស សុភ័ណ្ឌ បានប្រាប់ថា ក្រសួងកំពុងស្រាវជ្រាវរកអ្នកពាក់ព័ន្ធជាមួយនឹងឯកឧត្ដម ម៉ៅ អាយុទ្ធ រដ្ឋលេខាធិការក្រសួងព័ត៌មាន បន្ទាប់ពីលទ្ធផលតេស្តសំណាកបង្ហាញថា លោកបានឆ្លងមេរោគកូវីដ១៩។
លោក មាស សុភ័ណ្ឌ ប្រាប់ BTV នៅថ្ងៃនេះថា ឯកឧត្ដម ម៉ៅ អាយុទ្ធ អាយុ ៧៧ឆ្នាំ ត្រូវបានបញ្ជូនទៅសម្រាកព្យាបាលនៅឯមន្ទីរពេទ្យមិត្តភាពខ្មែរ-សូវៀតតាំងពីថ្ងៃចន្ទដើមសប្ដាហ៍នេះ បន្ទាប់ពីលោកត្រូវបានរកឃើញថា មានអាការគួរឱ្យសង្ស័យថាអាចមានផ្ទុកមេរោគកូវីដ១៩។
លោក មាស សុភ័ណ្ឌ ប្រាប់ថា៖ «តាមព័ត៌មានដែលទទួលបាន សុខភាពរបស់គាត់បានមានលក្ខណៈល្អប្រសើរហើយ កំពុងស្នាក់នៅព្យាបាលនៅមន្ទីរពេទ្យ[មិត្តភាពខ្មែរ-សូវៀត] ហើយស្ថានភាពជំងឺរបស់គាត់ហ្នឹង បានប្រសើរជាងកាលពីប៉ុន្មានថ្ងៃមុន»។
អ្នកនាំពាក្យក្រសួងព័ត៌មានរូបនេះ បញ្ជាក់ថា ឯកឧត្ដម ម៉ៅ អាយុទ្ធ បានធ្វើដំណើរទៅក្រសួងផងដែរកាលពីព្រឹកថ្ងៃទី០១ ខែមេសានេះ ដើម្បីចូលរួមចាក់វ៉ាក់សាំងនៅក្រោមការសម្របសម្រួលរបស់ក្រសួងព័ត៌មាន។
លោក មាស សុភ័ណ្ឌ បន្តថា ប៉ុន្តែ ក្រុមការងារត្រួតពិនិត្យបានប្រាប់គាត់ឱ្យត្រឡប់ទៅផ្ទះ និងធ្វើតេស្តសុខភាពវិញ បន្ទាប់ពីការត្រួតពិនិត្យរកឃើញថា គាត់មានអាការជាប់សង្ស័យថា ឆ្លងមេរោគកូវីដ១៩។
បើតាមលោក សុភ័ណ្ឌ ក្រសួងព័ត៌មានកំពុងស្រាវជ្រាវរកអ្នកពាក់ព័ន្ធជាមួយនឹងឯកឧត្ដម ម៉ៅ អាយុទ្ធ ដើម្បីធ្វើចត្តាឡីស័ក និងពិនិត្យសំណាក។
លោក មាស សុភ័ណ្ឌ ប្រាប់បន្តថា៖ «ឯកឧត្ដមរដ្ឋមន្ត្រី [ខៀវ កាញារីទ្ធ] ក៏បានណែនាំទៅដល់មន្ត្រីក៏ដូចជាអ្នកពាក់ព័ន្ធផ្ទាល់ជាមួយឯកឧត្ដម ម៉ៅ អាយុទ្ធ ហ្នឹង ឱ្យទៅធ្វើតេស្តក៏ដូចជាការដាក់ខ្លួនធ្វើចត្តាឡីស័កដើម្បីតាមដានសុខភាពរបស់ខ្លួនផងដែរ»។
ក្រសួងព័ត៌មានបានបើកយុទ្ធនាការចាក់វ៉ាក់សាំងជូនមន្ត្រីរាជការក្រោមឱវាទ និងក្រុមអ្នកសារព័ត៌មានមកពីស្ថាប័នប្រព័ន្ធផ្សព្វផ្សាយនានាចាប់ពីថ្ងៃទី០១ ខែមេសាមក៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
