ភ្នំពេញ៖ លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បាន​ថ្លែង​ថា ក្រសួងគ្រោងនឹងរៀបចំ បង្កើតឲ្យមានសហគមន៍គំរូមួយ ដែល​ប្រជាពលរដ្ឋ​មាន​សុខភាព​ល្អ​ជាង​​គេ ខណៈកម្ពុជាកំពុងយកចិត្តយ៉ាងខ្លាំងលើបញ្ហាសុខមាលភាពរបស់ប្រជាពលរដ្ឋ តាមរយៈការបង្កើតមន្ទីរពេទ្យនៅទូទាំងប្រទេស និង​បំពាក់​នូវ​ឧបករណ៍​ទំនើប​តាម​មន្ទីរ​ពេទ្យ​រដ្ឋ​ជា​ដើម។

ក្នុងសន្និសីទសារព័ត៌មានស្តីពី សមិទ្ធផលសម្រេចបានរយៈពេល៥ឆ្នាំ របស់ក្រសួងសុខាភិបាល រៀបចំដោយអង្គភាពអ្នកនាំពាក្យរាជរដ្ឋាភិបាល នៅថ្ងៃទី១៥ ខែកញ្ញា ឆ្នាំ២០២២ លោកជំទាវ ឱ វណ្ណឌីន មានប្រសាសន៍ថា ក្នុងការងារថែរក្សាសុខមាលភាពរបស់ប្រជាពលរដ្ឋ គឺត្រូវ ផ្សារ​ភ្ជាប់​នូវសេវាសំខាន់ៗនៅតាមថ្នាក់មូលដ្ឋាន មានការបង្កើតនូវមណ្ឌលសុខភាព ឬប៉ុស្តិ៍សុខភាព និង​មន្ទីរពេទ្យបង្អែកតាមបណ្ដាក្រុងស្រុក នៅទូទាំងប្រទេស ហើយក្រសួងសុខាភិបាល កំពុង​ជំរុញ​ធ្វើ​រឿង​នេះ និងកំពុងគិតគូរបន្ថែមទៀត ។

លោកជំទាវបន្តថា ក្រសួងសុខាភិបាល ត្រូវតែតម្រែតម្រងទិសឡើងវិញ នូវសេវាដែលកំពុងអនុវត្ត នៅក្នុងមណ្ឌលសុខភាព ក៏ដូចជាមន្ទីរពេទ្យបង្អែក ធ្វើយ៉ាង​ណា​ឲ្យ​ស្រប​ទៅ​តាម​អ្វី​ដែល​ជា​តម្រូវ​ការ​របស់ប្រជាពលរដ្ឋ ហើយនឹងអាចឈានដើម្បីអនុវត្ត បង្កើតជាសហគមន៍គំរូ សហគមន៍​ដែល​មាន​សុខភាព សហគមន៍មានអាយុវែង ដែលនេះជាទិសដៅ ។

អ្នកនាំពាក្យសុខាភិបាលរូបនេះ បន្ថែមថា ពីមុនពលរដ្ឋស្វែងរកម្ហូបអាហារដើម្បីបរិភោគ តែ​បច្ចុប្បន្ន​នេះ សម្រាប់ពលរដ្ឋដែលមានធនធាន ក៏ដូចជាពលរដ្ឋមានកំណើនកើនឡើង ប្រាក់​ចំណូល​ក៏​កើន ការប្រកបរបរផ្សេងៗកើន ធ្វើឲ្យពលរដ្ឋមួយចំនួន ជ្រើសរើស​ម្ហូប​សម្រាប់​បរិភោគ​វិញ ព្រោះដើម្បីសុខភាពរបស់ពួកគាត់ ។

លោកជំទាវ ឱ វណ្ណឌីន បានបញ្ជាក់ថា ពីមុនកម្ពុជាមានការព្រួយបារម្ភពីបញ្ហាជំងឺឆ្លង ប៉ុន្តែ​បច្ចុប្បន្ន ក៏មានការព្រួយបារម្ភផងដែរនូវជំងឺមិនឆ្លង ដោយសារការប្រែប្រួល នៃការ​រស់​នៅ​របស់​ពលរដ្ឋ ហើយដើម្បីកុំឲ្យមានកំណើននៃជំងឺមិនឆ្លង គឺកុំបរិភោគប្រៃពេក បរិភោគផ្អែមពេក កុំ​បរិភោគ​ខ្លាញ់ពេក និងធ្វើលំហាត់ប្រាណឲ្យបានទៀងទាត់ បើពលរដ្ឋអាចធ្វើបាន សុខភាព​នឹង​មាន​ការប្រែប្រួល ឈានទៅរកការអភិវឌ្ឍ ព្រោះបើមានសុខភាពល្អ គឺមានពេលវេលាវែងឆ្ងាយ សម្រាប់​រកប្រាក់កម្រៃ សម្រាប់ការប្រកបរបរទទួលទាន ៕ អត្ថបទ បាន សុខរិទ្ធិ