ភ្នំពេញ៖ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានព្រមាន​ជាថ្មីចំពោះការធ្វេសប្រហែសពីការឆ្លងជំងឺកូវីដ១៩ ដោយបន្តនុវត្តវិធាន​ការការពារពីការឆ្លង អំឡុង​ពិធីបុណ្យកាន់បិណ្ឌ ​និងភ្ជុំបិណ្ឌនាពេលខាងមុខ​។

ការព្រមានរបស់លោកជំទាវវេជ្ជបណ្ឌិត យក់ សម្បត្តិ ​រដ្ឋលេខាធិការក្រសួងសុខាភិបាល ធ្វើឡើង​ក្នុង​សន្និសីទសារព័ត៌មានដែលរៀបចំ​ដោយអង្គភាពអ្នកនាំពាក្យ​រាជរដ្ឋាភិបាលស្តីពី​សមិទ្ធផល​សម្រេចបានរយៈពេល៥ឆ្នាំកន្លងមករបស់ក្រសួងសុខាភិបាល​ នៅថ្ងៃទី១៥ ខែកញ្ញា ឆ្នាំ២០២២។ លោកជំទាវវេជ្ជបណ្ឌិត ​មានប្រសាសន៍ថា ដើម្បី​ស្របតាម​ការដាក់ចេញនូវការណែនាំដ៏ខ្ពស់ខ្ពស់​របស់​សម្តេចតេជោ ហ៊ុន សែន នាយករដ្ឋមន្រ្តី ក្នុងការធានា​ដល់​ដំណើរការប្រទេស​ឡើងវិញ​ដែល​ទទួល​ជោគជ័យរយៈពេលជិត១ឆ្នាំ ​ការរស់នៅតាមគន្លងប្រក្រតីភាពថ្មី តាមរយៈការអនុវត្តវិធានការ​ការពារ និង​ការ​ទទួល​វ៉ាក់សាំង​បង្ការកូវីដ១៩ គឺជាកត្តាសំខាន់ក្នុងបរិបទកូវីដ១៩ នៅពេលប្រទេស​លើសកល​នៅតែមានការឆ្លងជាបន្តបន្ទាប់។

ជាក់ស្តែងក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌដែលកំពុងប្រព្រឹត្តទៅនាឆ្នាំនេះ លោកជំទាវ​វេជ្ជ​បណ្ឌិត​ បានព្រមានជាថ្មីថា ប្រជាពលរដ្ឋមិនអាចមើលរំលងពីការចម្លង​នៃជំងឺនេះនោះទេ ដោយ​ត្រូវ​ប្រកាន់ខ្ជាប់ជានិច្ចនូវវិធានការ ៣កុំ និង៣ការពារជាប្រចាំ។

បើតាមសេចក្តីណែនាំរបស់ក្រសួងសុខាភិបាលស្តីពីការការពារការចម្លងជំងឺកូវីដ១៩ និងការពុល​ចំណី​អាហារអំឡុង​ពិធីកាន់បិណ្ឌ និងភ្ជុំបិណ្ឌ កាលពីថ្មីៗនេះដោយណែនាំទៅកាន់អាជ្ញាធររាជធានី-ខេត្ត គណៈបញ្ជាការឯកភាពឃុំ/សង្កាត់/ខណ្ឌ ​គណៈកម្មការថែរក្សាសន្តិសុខ និងសណ្តាប់ធ្នាប់​របៀបរៀប​រយ​នៅក្នុងទីវត្តអារាម ​និងគណៈកម្មការវត្ត ត្រូវចាត់ចែងណែនាំឱ្យមានការអនុវត្តវិធាន​ការ​សុខាភិបាលមានដូចខាងក្រោមនេះ​ រួមទាំងបង្កើនសកម្មភាពត្រួតពិនិត្យ និងតាមដាន​ពុទ្ធបរិស័ទ​ដែលចេញ-ចូលទីវត្តអារាម​ វិហារ សាលាឆាន់ ​និងកុដិ​នីមួយៗត្រូវឱ្យបានហ្មត់ចត់ និង​ខ្ជាប់ខ្ជួន​ ដោយចាត់ចែងឱ្យមានគម្លាតសុវត្ថិភាពបុគ្គល ​តាមរយៈរក្សាគម្លាតពីគ្នាយ៉ាងតិចមួយ​ម៉ែត្រ​កន្លះ ហើយព្រះសង្ឃគ្រប់ព្រះអង្គ ដូនជី តាជី និងពុទ្ធបរិស័ទទាំងអស់ ​ត្រូវពាក់ម៉ាស់គ្រប់ៗគ្នា នៅ​ពេលចូលក្នុងទីវត្តអារាមពេលអង្គុយ ឬឈររងចាំការប្រគេន​ ឬវេរចង្ហាន់​ និងទេយ្យទាន។

ក្នុងនោះ ក្រសួងសុខាភិបាល បានក្រើនរំលឹក​ និងជំរុញលើកទឹកចិត្តដល់សាធារណជន ស្ថាប័ន​ពាក់ព័ន្ធ អង្គភាពសាធារណៈ អាជ្ញាធរមូលដ្ឋានគ្រប់លំដាប់ថ្នាក់ សេវាឯកជន ​និងជនបរទេស ដែលកំពុងរស់នៅក្នុងប្រទេសកម្ពុជាទាំងអស់ ​សូមចូលរួមអនុវត្តនូវវិធានការចាំបាច់នានា ដើម្បី​ការពារសុខភាពផ្ទាល់ខ្លួន ពីការចម្លងជំងឺផ្សេងៗ រួមទាំងការការពារការចម្លងវីរុសកូវីដ-១៩, ការពុលចំណីអាហារក្នុងអំឡុងពិធីបុណ្យកាន់បិណ្ឌ ​និងភ្ជុំបិណ្ឌ ​ដែលប្រព្រឹត្តទៅចាប់ពីថ្ងៃទី១១ ដល់ថ្ងៃទី២៦ ខែកញ្ញា ឆ្នាំ២០២២ ដោយបន្តការពារខ្លួនជាបន្តទៀតនៅក្រោយ​ពេលពីចប់​ពិធីបុណ្យ​ប្រពៃណីជាតិនេះផងដែរ៕ អត្ថបទ សេក ឧត្តម