កណ្ដាល៖ ក្រុមពេទ្យនៅទូទាំងខេត្តកណ្តាល នឹងចុះចាក់វ៉ាក់សាំងការពារកូវីដ១៩ នៅតាមបណ្តាវត្តអារ៉ាមនានា ក្នុងអំឡុងថ្ងៃបុណ្យភ្ជុំបិណ្ឌ ចំនួនបីថ្ងៃ ចាប់ពីថ្ងៃទី២៤ ដល់ថ្ងៃទី២៦ ខែកញ្ញាឆ្នាំ២០២២ ដោយអំពាវនាវ​ ពលរដ្ឋដែលដល់ថ្ងៃត្រូវចាក់វ៉ាក់សាំងដូសជំរុញ ត្រូវកាន់បណ្ណចាក់វ៉ាក់សាំង ឬឯកសារពាក់ព័ន្ធចាក់វ៉ាក់សាំងទៅជាមួយ ដើម្បីទទួលបានការចាក់វ៉ាក់សាំងនោះ។

លោក ហម សុផល ប្រធានការិយាល័យសុខាភិបាលស្រុកប្រតិបត្តិ ក្រុងតាខ្មៅ ខេត្តកណ្តាល បាន​ថ្លែងប្រាប់BTV នៅថ្ងៃទី១៥ ខែកញ្ញានេះថា នៅក្នុងអំឡុងថ្ងៃឈប់សំរាកបុណ្យភ្ជុំបិណ្ឌ​ចំនួន​បីថ្ងៃ​ខាងមុខនេះ ការិយាល័យសុខាភិបាលស្រុកប្រតិបត្តិលោក ​ក៏ដូចការិយាល័យ​សុខាភិបាល​តាមស្រុកនានាទៀ​ត​របស់ខេត្តកណ្តាល នឹងរៀបចំក្រុមពេទ្យចុះចាក់វ៉ាក់សាំងការពារកូវីដ១៩ នៅ​តាមវត្តចំនួន១៣វត្ត ក្នុងនោះក្រុងតាខ្មៅបានរៀបចំចាក់ចំនួន៥វត្ត និងស្រុកកណ្តាលស្ទឹង រៀបចំក្រុមពេទ្យប្រចាំការចាក់ចំនួន៨វត្ត។

អាជ្ញាធរ និងចាស់ទុំ ដែលជាអាចារ្យ នៅវត្តពុទ្ធអណ្តែត ហៅវត្តព្រែកហូរ ​នៅក្នុងតាខ្មៅ លើក​ឡើងថា ពួកគាត់​នឹងចាប់​ផ្ដើម​ប្រកាស​ដល់​ប្រជាពុទ្ធបរិស័ទ​សូមយកបណ្ណចាក់វ៉ាក់សាំង និង​អត្តសញ្ញាណបណ្ណមកជាមួយពេលមកវត្តនៅថ្ងៃភ្ជុំធំ ​ ហើយពលរដ្ឋបន្ទាប់ពីទទួល​បានដំណឹងនេះ មួយ​ចំនួនធំគឺបំណងចាក់វ៉ាក់សាំងដូសជំរុញ នៅពេលទំនេរពីការងារផងដែរ។

បើតាមវេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្តកណ្តាល ​គិតត្រឹមព្រឹកថ្ងៃទី១៥ ខែកញ្ញានេះ ​ទូទាំងខេត្តកណ្តាល ​មនុស្សវ័យចាប់ពី៣ឆ្នាំឡើងទៅ ​បានចាក់វ៉ាក់សាំងកូវីដសរុបជាង ១លាន៤ម៉ឺននាក់ ​ហើយតាមរយៈការចុះចាក់តាមវត្តនៅថ្ងៃបុណ្យភ្ជុំបិណ្ឌនោះ នឹង​ជម្រុញ​កំណើនភាគរយយើងបានច្រើនថែមទៀត៕ អត្ថបទ៖ ស៊ុម សុខជា.