ភ្នំពេញ៖ ក្នុងឱកាសពិធីបុណ្យកាន់បិណ្ឌ នៅក្នុងឆ្នាំ២០២២នេះ បណ្ដាផ្សារក្នុងរាជធានីភ្នំពេញមានភាពអ៊ូអរជាងឆ្នាំមុន ខណៈគណៈកម្មការផ្សារបន្តអនុវត្តវិធានការសុខាភិបាលទប់ស្កាត់ជំងឺកូវីដ-១៩។

អាជីវករលក់ដូរក្នុងផ្សារទួលទំពូង និងផ្សារធំថ្មី នៅថ្ងៃទី១៤ ខែកញ្ញានេះ បានប្រាប់BTVឲ្យដឹងថា ក្នុងអំឡុងពិធីបុណ្យកាន់បិណ្ឌ-ភ្ជុំបិណ្ឌនៅឆ្នាំនេះ ការលក់ដូរដាច់ជាងឆ្នាំមុន ព្រោះមានអតិថិជនច្រើន មកត្រី សាច់ បន្លែ និងផ្លែងឈឺជាដើមនោះ យកធ្វើជាចង្ហាន់​ប្រគេន​ព្រះសង្ឃគង់នៅវត្តអារាម។លើសពីនេះ ពួកគាត់បន្តថា​ បច្ចុប្បន្ននៅផ្សារមានភាពអ៊ូអរជាងមុន ព្រោះជំងឺកូវីដ​ស្ងប់ស្ងាត់​ជាងមុន។

លោក ហៀង លីម៉េង អនុប្រធានផ្សារកណ្តាល បានឲ្យដឹងដែរថា ​ដើម្បីទប់ស្កាត់ជំងឺកូវីដ ក្នុង​អំឡុង​ពិធីបុណ្យកាន់បិណ្ឌ-ភ្ជុំបិណ្ឌ គណៈកម្មការផ្សារបន្តអនុវត្តវិធានសុខាភិបាល ​ជាពិសេសអប់រំ​អាជីវករ និង​អតិថិជន​ចេញ-ចូលក្នុងផ្សារ ត្រូវប្រុងប្រ័ត្នការឆ្លងជំងឺកូវីដ។

ក្រៅពីនេះលោកអំពាវនាវដល់ប្រជាពលរដ្ឋ ​សូមអញ្ជើញមកទិញម្ហូបអាហារ និងសំភារៈផ្សេងៗ​ទៀត ​នៅផ្សារកណ្តាល ដែលជាផ្សារមួយមានទំនិញគ្រប់មុខ ​និងជួយឲ្យអាជីវករមានចំណូល ដើម្បី​សម្រួលជាជីវភាពប្រចាំថ្ងៃផងដែរ។

ជារៀងរាល់ឆ្នាំ ពេលដល់ថ្ងៃខែ ដែលត្រូវប្រារព្ធពិធីបុណ្យភ្ជុំបិណ្ឌ ​គ្រប់បងប្អូនកូនចៅ ​សាច់ញាតិ សន្ដានទាំងអស់ ទោះនៅទីជិត ឬទីឆ្ងាយ តែងតែធ្វើដំណើរទៅជួបជុំគ្នា ជាពិសេសទៅជួប​ឪពុក​ម្ដាយ ​ដើម្បីរៀបចំម្ហូបអាហារ ​បាយសម្ល ​ចង្ហាន់យកទៅប្រគេនព្រះសង្ឃដែល​គង់​នៅវត្តអារាម។

បុណ្យភ្ជុំបិណ្ឌ ​ជាពិធីបុណ្យមួយ ក្នុងចំណោមពិធីបុណ្យធំៗដទៃទៀតនៃ ​ព្រះរាជពិធីទា្វរទសមាស ដែល​ប្រជារាស្រ្តខ្មែរ​ តាំងពីបុរាណរៀងមក ​តែងតែប្រារព្ធពិធីនេះ​មិនដែលអាក់ខានឡើយ ពោលគឺ​ចាប់ពីថៃ្ង ១រោច រហូតដល់ថៃ្ងទី ​១៥រោច ខែភទ្របទ ដែលគេហៅថាបិណ្ឌ១, បិណ្ឌ២ ... និងថៃ្ង​បញ្ចប់ គឺជា ថៃ្ង "ភ្ជុំបិណ្ឌ"។ សម្រាប់ឆ្នាំ២០២២ ​ពិធីបុណ្យកាន់បិណ្ឌ-ភ្ជុំបិណ្ឌ ​ប្រព្រឹត្តទៅចាប់ផ្តើមពីថ្ងៃទី១១ ដល់ថ្ងៃទី២៦ ខែកញ្ញានេះ៕ អត្ថបទ៖ទូច សោភ័ណ