ឧត្តរមានជ័យ៖ ឯកឧត្តម ប៉ែន កុសល្យ បានអះអាងថា កំណាត់ផ្លូវនានា ក្នុងក្រុងសំរោង ដែលបច្ចុប្បន្នកំពុងរងការខូចខាត នឹងត្រូវធ្វើការជួសជុលឡើងវិញ ក្រោយរដូវភ្លៀង ។

ឯកឧត្តម ប៉ែន កុសល្យ អភិបាលខេត្តឧត្តរមានជ័យ បានឲ្យដឹងថា កំណាត់ផ្លូវខូចខាតទាំងអស់ក្នុងមូលដ្ឋានក្រុងសំរោង មន្ត្រីជំនាញ បានសិក្សា និងគិតគូររួចរាល់អស់ហើយ ប៉ុន្តែដោយសាររដូវនេះជារដូវវស្សា ដូច្នេះការជួសជុលមិនទាន់អាចធ្វើទៅបានទេ ។

ឯកឧត្ដម បានបញ្ជាក់ថា ការជួសជុលផ្លូវនេះ ​នឹងត្រូវធ្វើឱ្យបានរឹងមាំដើម្បីប្រើប្រាស់បានយូរ។

ឯកឧត្តម អភិបាលខេត្តឧត្តរមានជ័យ បានស្នើឲ្យប្រជាពលរដ្ឋរស់នៅក្នុងមូលដ្ឋានក្នុងក្រុង​សំរោងទាំងអស់ ​ដែលជួបបញ្ហាប្រឈមទាំងអស់នេះ ​មេត្តាអត់ធ្មត់បន្តិច ។

ឯកឧត្តម បានរំលឹកដល់ជំនាញពាក់ព័ន្ធក្នុងខេត្ត ​ពិសេសមន្ទីរសាធារណការ ​និងដឹកជញ្ជូន ត្រូវពិនិត្យឱ្យបានជាប់ជាប្រចាំលើបញ្ហាផ្លូវនេះ ​ដើម្បីសម្រួលដល់ការធ្វើដំណើររបស់ប្រជាពលរដ្ឋ៕

អត្ថបទ៖ ឃិន សារិទ្ធិ