សៀមរាប៖ ដើម្បីបម្រើដល់សាធារណជនក្នុងការប្រើប្រាស់រថយន្ដអគ្គិសនី និងដើម្បីលើក​កម្ពស់​បរិស្ថាន ក្រសួងសាធារណការ និងដឹកជញ្ជូន បានដាក់ឱ្យដំណើរការ​ស្ថានីយ​បញ្ចូល​ថាមពល​អគ្គិសនីមួយទៀត នៅក្នុងខេត្ដសៀមរាប បន្តាប់ពីរាជធានីភ្នំពេញ និងក្រុងព្រះសហនុ។ ស្ថានីយបញ្ចូលអាគុយឡាននេះ ស្ថិតនៅសួន ច្បារព្រះរាជដំណាក់ ក្រុងសៀមរាប ដែលដាក់ឱ្យប្រើប្រាស់នៅរសៀលថ្ងៃទី១៤ ខែកញ្ញានេះ។

ឯកឧត្ដម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន មានប្រសាសន៍ ថា ការដំឡើងស្ថានីយបញ្ចូលថាមពលអគ្គិសនីនៅខេត្ដសៀមរាប ​នៅក្នុងខេត្ដទេសចរណ៍មួយនេះ បន្ទាប់ពីបានដំឡើងនៅក្រសួងសាធារណការ និងដឹកជញ្ជូន ក្នុងរាជធានីភ្នំពេញ ដាក់ក្នុង​ខេត្ដព្រះសីហនុហើយ និងនៅក្នុងខេត្ដបាត់ដំបង។

ឯកឧត្ដម បានបញ្ជាក់ថា ស្ថានីយបញ្ចូលអគ្គិសនីរថយន្ដ ចំនួន៤កន្លែងនេះ ជាជំហានទី១ ដែលក្រ សួងបានជំនួយពីអង្គការ UNDP មានចំនួនបួនគ្រឿង ។ តម្លៃការបញ្ចូលអគ្គិសនី ជាងមួយពាន់រៀល អាចប្រើបានចម្ងាយពី៣០០គីឡូម៉ែត្រឡើងទៅ ​តាមប្រភេទរថយន្ដអគ្គិសនី។ក្រសួងគ្រោងបន្ដដាក់ស្ថានីយ បញ្ចូលអាគុយរថយន្ដនេះ នៅតាមបណ្ដាខេត្ដផ្សេងៗទៀត ហើយ​ក្រសួងសាធារណការ ​ក៏ស្នើឱ្យស្ថានីយ ​ប្រេងឯកជននៅទូទាំងប្រទេស ​ដាក់ស្ថានីយបញ្ចូល​ថាមពលអគ្គិសនីនេះ​ឱ្យបានច្រើនដែរ ​ដើម្បីឱ្យប្រជាពលរដ្ឋ ដែលមានរថយន្ដប្រើប្រាស់អគ្គិសនី មានភាពងាយស្រួល ​ក្នុងការធ្វើដំណើរផ្លូវឆ្ងាយ ​ហើយស្ថានីយ មួយចំនួន បានរៀបចំរួចរាល់​ហើយដែរ។

ឯកឧត្ដម បានបន្ដទៀតថា ការស្នើសុំឱ្យមានស្ថានីយបញ្ចូលអគ្គិសនីរថយន្ដនៅតាមស្ថានីយ​ប្រេងឥន្ធនៈ ដោយសារវិស័យឯកជនជាដៃគូយ៉ាងសំខាន់​ និងជាក្បាលរទេះភ្លើង ដើម្បីអូសទាញ​សេដ្ឋកិច្ចឱ្យមានការរីកចម្រើន ។

ឯកឧត្ដម ស៊ុន ចាន់ថុល បានឱ្យដឹងថា មកដល់បច្ចុប្បន្ននេះ កម្ពុជា មានរថយន្ដប្រភេទប្រើអាគុយ នេះ ចំនួនជិត១ពាន់គ្រឿង ​ដែលនាំចូលមកពីប្រទេសចិន អង់គ្លេស អឺរ៉ុប អាមេរិក ។ល។ ឯកឧត្ដម បានអំ ពាវនាវឱ្យប្រជាពលរដ្ឋ ​​ប្រើប្រាស់រថយន្ដប្រភេទអគ្គិសនីនេះ ដើម្បីជួយកាត់បន្ថយ​ការ​ចំណាយ​លើ​ប្រេងឥន្ធនៈ ​និងជួយលើកកម្ពស់បរិស្ថាន​ និងកាត់បន្ថយការប្រែប្រួលអាកាសធាតុ៕

អត្ថបទ៖ ឈិត សាវី