ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា អញ្ជើញចូលរួមក្នុងកម្មវិធី «ភ្ជុំបិណ្ឌ៖ តោះទៅវេចនំអន្សមរួមគ្នា» នៅទីស្នាក់ការ ស.ស.យ.ក. រាជធានីភ្នំពេញ អគារខេមរានី នាព្រឹកថ្ងៃទី១៥ ខែកញ្ញា ឆ្នាំ២០២២នេះ ដោយមានការចូលរួមពីសំណាក់ឯកឧត្តម លោកជំទាវ អនុប្រធាន ស.ស.យ.ក. សមាជិក សមាជិកា ស.ស.យ.ក. និងសាធារណជន ក្នុងបរិយាកាសដ៏សែនរីករាយ។
កម្មវិធី «ភ្ជុំបិណ្ឌ៖ តោះទៅវេចនំអន្សមរួមគ្នា» ប្រារព្ធឡើងក្នុងគោលបំណងរំលឹក និងបង្កើតអនុស្សាវរីយ៍ បង្កើនមិត្តភាព សាមគ្គីភាព បំផុសស្មារតីចូលរួមថែរក្សាប្រពៃណីទំនៀមទម្លាប់ដល់យុវជនជំនាន់ក្រោយ រួមទាំងបង្កើតឱកាសជួបជុំមហាគ្រួសារខ្មែរនាឪកាសពិធីបុណ្យកាន់បិណ្ឌ។ ទន្ទឹមនឹងនេះ ក៏មានការចែករំលែករបៀបវេចនំខ្មែរ និងកម្មវិធីកម្សាន្ដសប្បាយនានាបែបប្រពៃណីខ្មែរដល់អ្នកចូលរួមកម្សាន្តសប្បាយ។
ឯកឧត្តម ហ៊ុន ម៉ានី បានថ្លែងថា ព្រឹតិ្តការណ៍នាពេលនេះ ជាបរិយាកាសមួយ ដែលធ្វើឲ្យយើងគ្រប់គ្នា និងជាលក្ខណៈគ្រួសារ អាចមកស្វែងយល់ពីវប្បធម៌ប្រពៃណី និងបរិយាកាសនៃពិធីបុណ្យកាន់បិណ្ឌ និងភ្ជុំបិណ្ឌ អញ្ជើញមកចូលរួមវេចនំអន្សមរួមគ្នា ទោះបីថាធ្វើបាន មិនធ្វើបានកី្ត សំខាន់យើងបានចូលរួមចំណែក។
ឯកឧត្តម ហ៊ុន ម៉ានីំ បានបញ្ជាក់ទៀតថា យើងអាចរៀបចំព្រឹតិ្តការណ៍នេះ គឺផ្តើមចេញពីកត្តាសុខសន្តិភាព លើសពីនេះថែមទៀត យើងត្រូវនិយាយឲ្យច្បាស់ ដែលពិភពលោកទទួលស្គាល់ គឺសមត្ថភាពរបស់កម្ពុជា ក្រោមដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា។
សូមបញ្ជាក់ផងដែរថា កម្មវិធី ភ្ជុំបិណ្ឌ៖ តោះទៅវេចនំអន្សមរួមគ្នា សូមសាធារណជន អញ្ជើញចូលរួមដោយសេរី នៅអាគាខេមរានី ដោយកម្មវិធីនេះនឹងបើកអោយសាធារណជនចូលរួមនៅរសៀលនេះពីម៉ោង ២:០០ ដល់ម៉ោង ៤:០០ រសៀល និងថ្ងៃទី១៧-១៨ ខែកញ្ញា ឆ្នាំ២០២២ ចាប់ពីម៉ោង ៩:០០នាទីព្រឹក រហូតដល់ម៉ោង៤រសៀល៕ អត្ថបទ៖ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
