ឧត្តរមានជ័យ៖ ក្នុងនាមជាសសរទ្រូងនៃប្រទេសជាតិ និងជាទំពាំងស្នងឫស្សីដ៏ល្អ យុវវ័យទាំងអស់ ត្រូវខិតខំរៀនសូត្រឲ្យក្លាយជាធនធានមនុស្សមានតម្លៃប្រកប​ដោយ​ក្រម​សីលធម៌ល្អ​ដើម្បី​ជា​ប្រយោជន៍​ក្នុងគ្រួសារ និងសង្គម។

ថ្លែងបែបនេះ ខណៈលោកស្រី មិន ធារី អភិបាលរងខេត្តឧត្ដរមានជ័យអញ្ជើញចូលរួម​ក្នុង​ពិធីបើកវគ្គអប់រំផ្សព្វផ្សាយ ​ស្តីពីការលើកកម្ពស់សីលធម៌សង្គម ​តម្លៃស្ត្រី ​និងគ្រួសារខ្មែរ ក្រោម​ប្រធានបទ៖ «បាតុភាព និងផលប៉ះពាល់របស់យុវវ័យ» នៅសាលប្រជុំមន្ទីរកិច្ចការនារីខេត្តឧត្ដរមានជ័យ នាព្រឹកថ្ងៃទី១៦ ខែកញ្ញាឆ្នាំ២០២២នេះ។

ក្នុងនោះដែរលោកស្រី ឯក សុភារុំ ប្រធានមន្ទីរកិច្ចការនារីខេត្តឧត្ដរមានជ័យ ​បានលើកឡើងថា វគ្គអប់រំ​ផ្សព្វផ្សាយនេះ មានគោលបំណងដើម្បីផ្ដល់ប្រយោជន៍​ដល់សង្គម ​និង​ទប់ស្កាត់​រាល់​ទង្វើ​ទាំងឡាយ​ណា​ដែលធ្វើឲ្យ​ប៉ះពាល់​ដល់​ប្រពៃណីជាតិរបស់យើងជា​ ពិសេសយុវវ័យ និង​រួមគ្នា​ដោះស្រាយនូវបញ្ហាប្រឈមនានា​មួយចំនួន ដែលជាផលប៉ះពាល់ដល់យុវវ័យ នឹងក្រុមគ្រួសារ និងសង្គមទាំងមូល។

លោកស្រី មិន ធារី បានលើកឡើងបន្ដថា គណៈកម្មាធិការជាតិលើកកម្ពស់សីលធម៌សង្គម​ តម្លៃស្ត្រី និង គ្រួសារខ្មែរ ​ដែលមានសម្តេចកិត្ដិព្រឹទ្ធបណ្ឌិត ប៊ុនរ៉ានី ហ៊ុន សែន ​ជាប្រធានកិត្តយស បានដឹកនាំ​គាំទ្រឲ្យមានលទ្ធភាពបំពេញតួនាទី និងភារកិច្ចរបស់ខ្លួនប្រកបដោយ​ប្រសិទ្ធិភាព​ខ្ពស់ និងឈានទៅ​សម្រេចផែនការយុទ្ធសាស្ត្រជាតិ ​យុទ្ធសាស្ត្រចតុកោណ​ គោលនយោបាយភូមិ ​ឃុំ ​មានសុវត្ថិភាព និងផែនការ​យុទ្ធសាស្ត្រ​នារី​រតនះ ទី៥ របស់ក្រសួងកិច្ចការនារីផងដែរ។

យ៉ាងណាម៉ិញលោកស្រី អភិបាលរងខេត្ត ​បានផ្ដាំផ្ញើ​ឲ្យលោកគ្រូ ​អ្នកគ្រូ ប្អូនៗ ​សិស្សានុសិស្ស​ទាំងអស់ ជួយ​ផ្សព្វផ្សាយ​បន្តតាមរយៈក្រុមគ្រួសារ ​មិត្តអប់រំមិត្ត ​ដើម្បីឲ្យយុវវ័យ​បានយល់​ច្បាស់​ហើយរួមគ្នាកែប្រែរាល់ទស្សនៈ ឥរិយាបថ​ និង​អត្តចរិត​អវិជ្ជមាន​ឲ្យ​ស្របតាម​ក្រម​សីលធម៌​ប្រពៃណី និង​ទំនៀមទម្លាប់​ ដើម្បី​ចូលរួមលើកកម្ពស់ ​សីលធម៌​សង្គមតម្លៃស្ត្រី និងគ្រួសារ៕

អត្ថបទ៖ ឃិន សារិទ្ធិ