ភ្នំពេញ៖ យោងតាមអនុសាសន៍របស់សម្ដេច ហ៊ុន សែន សម្រាប់​ឱកាសឈប់សម្រាក ពិធីបុណ្យ​ភ្ជុំបិណ្ឌ​ខាងមុខនេះ​ រដ្ឋបាលរាជធានីភ្នំពេញ បានសម្រេចប្រើប្រាស់រថយន្តក្រុងចំនួន ​១៧៥ គ្រឿង ដើម្បី​ដឹកជញ្ជូន​ប្រជាពលរដ្ឋទៅស្រុកកំណើតនៅតាមបណ្ដាខេត្ត ​ដោយមិនគិតថ្លៃ។ លើសពីចំនួនរថយន្ត ១៧៥គ្រឿងនេះ អាជ្ញាធរ​ក៏បានត្រៀមរថយន្ត​បន្ថែមក្នុងករណីបើមាន​ប្រជាពលរដ្ឋ​ច្រើនរង់ចាំធ្វើដំណើរ។

សម្រាប់ឱកាសឈប់សម្រាក ក្នុងពិធីបុណ្យភ្ជុំបិណ្ឌខាងមុខនេះ​ គឺនឹងមានរថយន្តក្រុងចំនួន ១៧៥គ្រឿង ​សម្រាប់ដឹកជញ្ជូនប្រជាពលរដ្ឋទៅតាមបណ្ដាខេត្ត​ដោយមិនគិតថ្លៃ។ ការដឹកជញ្ជូន​ពលរដ្ឋ​ចាកចេញពីរាជធានីភ្នំពេញទៅតាមបណ្ដាខេត្តនេះ ​គឺមានរយៈពេល​ ៥ថ្ងៃ ​ចាប់ផ្ដើមពីថ្ងៃទី ២៣ រហូតដល់ថ្ងៃទី ២៧ ខែកញ្ញា។

ពាក់ព័ន្ធនឹងរឿងត្រៀមជូនប្រជាពលរដ្ឋត្រឡប់ទៅស្រុកកំណើតនេះ លោក ឃ្លី នរៈ ប្រធាន​ការិយាល័យ​រដ្ឋបាល​ នៃរដ្ឋាករស្វយ័តដឹក​ជញ្ជូន​សាធារណៈរថយន្តក្រុង​ (City Bus)​ រាជធានីភ្នំពេញ លើកឡើងថា ក្រុមការងារក៏បានពិចារណា​ និងបានត្រៀមរថយន្តបន្ថែមលើចំនួន រថយន្តដែល​បាន​ដាក់ចេញ ១៧៥គ្រឿង ​ក្នុងករណីដែលមានប្រជាពលរដ្ឋច្រើនរង់ចាំធ្វើដំណើរ។

លោករំពឹងថា​ ចំនួនអ្នកជិះគឺអាចក្នុងរង្វង់ជាង​ ១ម៉ឺននាក់ក្នុងមួយថ្ងៃ ខណៈការចាប់ផ្ដើមចេញ​ដំណើរ​គឺនៅម៉ោង៥.៣០នាទីព្រឹក។

ប្រធានការិយាល័យរដ្ឋបាល នៃរដ្ឋាករស្វយ័តដឹកជញ្ជូនសាធារណៈរថយន្តក្រុង​ (City Bus) រាជធានី​ភ្នំពេញ ​បន្តថា ការធ្វើដំណើរគឺធ្វើឡើងចំនួនពីរជើង ​ក្នុងមួយថ្ងៃ សម្រាប់​បណ្ដាខេត្ត​ដែលនៅជិតរាជ​ធានី​ភ្នំពេញ។​ រីឯបណ្ដាខេត្តដែលនៅឆ្ងាយ ​គឺធ្វើដំណើរតែមួយជើងប៉ុណ្ណោះ​ក្នុងមួយថ្ងៃ។

ចំពោះរថយន្តចំនួន ​១៧៥គ្រឿង ​ដែលបានត្រៀមនោះ​ គឺមានការបែងចែក ​១២០ គ្រឿងសម្រាប់ ការ​ចាកចេញ​ទៅបណ្ដាខេត្ត ​និងចំនួន ៥៥គ្រឿង ​សម្រាប់​ភូមិសាស្រ្តរាជធានីភ្នំពេញ៕

អត្ថបទ៖គឺមហុក