ភ្នំពេញ​៖ តាមការអញ្ជើញរបស់ធនាគាពិភពលោក លោកជំទាវវេជ្ជបណ្ឌិត យក់ សម្បត្តិ រដ្ឋលេខា​ធិការ​ក្រសួង​សុខាភិបាល បានដឹកនាំគណៈប្រតិភូ ក្រសួងសុខាភិបាលទៅចូលរួមវេទិកា ស្តីពីហិរញ្ញប្បទាន​សុខា​ភិបាល​សម្រាប់តំបន់អាស៊ីប៉ាស៊ីហ្វិក ពីថ្ងៃទី១៥-១៦ ខែកញ្ញា ឆ្នាំ២០២២ នៅទីក្រុងបាងកក ប្រទេស​ថៃឡង់ដ៏ ដែលមានអ្នកចូលរួមជិត២០០នាក់ មកពីបណ្តាប្រទេសនៅតំបន់អាស៊ីប៉ាស៊ីហ្វិក ចូលរួម។

​គោលបំណងនៃ វេទិកានេះ គឺដើម្បីចែករំលែកមេរៀនជាបទពិសោធន៍ពាក់ព័ន្ធនឹងការផ្តល់​ហិរញ្ញ​ប្ប​ទាន​ដល់កម្មវិធីថែទាំសុខភាពបឋម ជាពិសេសអំពីតួនាទីដ៏សំខាន់របស់ក្រសួងសេដ្ឋកិច្ច​នៃប្រទេសនីមួយៗ​ក្នុង​ការការលើកកម្ពស់សុខភាពរបស់ប្រជាជន។ វេទិការយៈពេល២ថ្ងៃបានប្រមូលអ្នកជំនាញការ និងអ្នក​មាន​បទពិសោធន៍ផ្នែកហិរញ្ញប្បទានសុខាភិបាលជាច្រើន បានចូលរួមជាវាគ្មិន ដោយផ្តោត​លើប្រធាន​បទ​សំខាន់ៗ ដូចជា៖ ១) ការបង្កើនភាពស័ក្តសិទ្ធនៃប្រព័ន្ធសុខាភិបាលក្នុងបរិបទនៃ COVID-19 និងនិន្នា​ការ​រយៈពេលវែង, ២) យកប្រជាជនជាមជ្ឈមណ្ឌល៖ការផ្តល់ហិរញ្ញប្បទានកម្ម​វិធីថែទាំ​សុខ​ភាពបឋម​ដល់​អង្គភាព​សុខាភិបាលសកល, ៣) ការផ្តល់មូលនិធិដល់កម្មវិធីថែទាំសុខភាពបឋមក្នុងបរិបទ នៃCOVID-19, ៤) ការការពារហិរញ្ញប្បទានសុខាភិបាលក្នុងបរិបទនៃCOVID-19, ៥)ហិរញ្ញប្បទានឱសថសារ​វ័ន្ត​សម្រាប់​កម្ម​វិធីថែទាំសុខភាពបឋម, ៦) ពន្ធសម្រាប់សុខភាពក្នុងបរិបទនៃ COVID-19, ៧) ការវាយតម្លៃ​ប្រសិទ្ធ​ភាព​កម្ម​វិធីថែទាំសុខភាពបឋម៖ វិភាគអំពីការសម្រាកព្យាបាលនៅមន្ទីរពេទ្យក្នុង​លក្ខខណ្ឌតម្រូវការ​សង្គ្រោះ​បន្ទាន់​ចាំបាច់ និង ៨) ហិរញ្ញប្បទានសុខាភិបាលសម្រាប់ធ្វើឱ្យប្រសើរឡើងនូវការផ្តល់សេវា។

លោកជំទាវវេជ្ជបណ្ឌិត យក់ សម្បតិ្ត រដ្ឋលេខាធិការក្រសួងសុខាភិបាល​បានអញ្ជើញ​ធ្វើជាវា​គ្មិន​លើប្រធានបទ“ ហិរញ្ញប្បទានសុខាភិបាលសម្រាប់ធ្វើឱ្យប្រសើរឡើងនូវការផ្តល់សេវា” ដោយបានចែករំលែក​បទ​ពិសោធន៍ល្អ និងវឌ្ឍនភាព នៃវិស័យសុខាភិបាល ជាពិសេសការគ្រប់គ្រង ឆ្លើយតបការរីករាល​ដាល​នៃជំងឺ​កូវីដ-១៩ និងកិច្ចសហការយ៉ាងជិតស្និទ្ធរវាងក្រសួងសុខាភិបាល និងក្រសួងសេដ្ឋកិច្ច និងហិរញ្ញវត្ថុ ក្រោមការដឹកនាំដ៏ឈ្លាសវៃ ប៉ិនប្រសប់ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងបានទទួលការកោតសរសើរ​និងការ​គាំទ្រ​ពីអ្នក​ចូល​រួម​ទាំងអស់ ព្រមទាំងធនាគារពិភពលោក៕​អត្ថបទ​ ៖ រដ្ឋា