ភ្នំពេញ៖ នៅថ្ងៃទី១៧ ខែកញ្ញា ឆ្នាំ២០២២ ឯកឧត្តម ម៉េង ស្រ៊ុន អនុប្រធានសមាគមយុវជនក្រុម៨ និងជាប្រធានសមាគមយុវជនក្រុម៨ សាខារាជធានីភ្នំពេញតំណាងឯកឧត្តមបណ្ឌិត ម៉ឹង មករា ប្រធានសមាគមយុវជនក្រុម៨ និងសហការីបាននាំយកសម្ភារៈប្រើប្រាស់ និងថវិកាមួយចំនួន ជាអំណោយដ៏ថ្លៃថ្លារបស់ឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី ប្រគល់ជូនមន្ទីពេទ្យគន្ធបុប្ផា និងក្រុមគ្រួសារទារកនិងកុមារ ចំនួន១០១គ្រួសារ ដែលកំពុងសម្រាកព្យាបាល នៅមន្ទីពេទ្យគន្ធបុប្ផា។

ក្នុងឱកាសនោះ ឯកឧត្តម ម៉េង ស្រ៊ុន បានមានប្រសាសន៍ថា អំណោយដែលផ្តល់ជូនមន្ទីរពេទ្យ និងក្រុមគ្រួសារទារកកុមារដែលកំពុងសម្រាកព្យាបាលនេះ គឺជាការបង្ហាញនូវការយកចិត្តទុកដាក់ និងចូលរួមចំណែករបស់ថ្នាក់ដឹកនាំ រាជរដ្ឋាភិបាលកម្ពុជា ក្នុងការគាំពារ​សុខុមាលភាព​ប្រជាពលរដ្ឋ ជាពិសេសកុមារតូចៗ ដើម្បីទទួលបាននូវការរស់រានមានជីវិត រស់នៅប្រកបដោយសុខភាពល្អ កាយសម្បទា​រឹងមាំ ​និងអាចមានលទ្ធភាពចូលរួមចំណែកក្នុងការអភិវឌ្ឍប្រទេសជាតិ នាពេលខាងមុខ។

ក្នុងនោះ អំណោយដែលប្រគល់ជូនក្រុមគ្រួសារអ្នកជំងឺនីមួយៗ រួមមាន៖ កាបូប១ ភួយ១ មុង១ កន្ទេល១ ក្រម៉ា១ ទឹកដោះគោឆៅ១ឡូ និងថវិកា ៥ម៉ឺនរៀល។ អំណោយ​ប្រគល់ជូន​មន្ទីរ​ពេទ្យគន្ធបុប្ផាមាន៖ ទឹកសុទ្ធ៨០កេស ខោទឹកនោម១៨កេស ជេល៤កេស និងថវិកាចំនួន ១១.៨៨៨.៨០០រៀល ៕ អត្ថបទ៖ កុម្ភៈ