ភ្នំពេញ៖ ឯកឧត្តម ឃួង ស្រេង អភិបាលរាជធានីភ្នំពេញ បានប្រាប់ទៅអាជ្ញាធរខណ្ឌនីមួយៗ មិនត្រូវបិទបាំងទីតាំងលេងល្បែងស៊ីសង ខុសច្បាប់ណាមួយទាំងអស់ ក្នុងដែនសមត្ថកិច្ចរបស់ខ្លួន ហើយក្នុងករណីក្រុមការងារចម្រុះបានឃើញ និងចុះបង្ក្រាបបាន គឺអភិបាលខណ្ឌនោះត្រូវទទួលខុសត្រូវ។

ក្នុងកិច្ចប្រជុំបន្ទាន់ពាក់ព័ន្ធការការពារសន្តិសុខ និងបង្ក្រាបល្បែងស៊ីសងគ្រប់ប្រភេទ នៅរសៀលថ្ងៃទី១៧ ខែកញ្ញា ឆ្នាំ២០២២ ឯកឧត្តម ឃួង ស្រេង មានប្រសាសន៍ថា សាលារាជធានីនឹងបង្កើតក្រុមលេខាធិការដ្ឋានមួយ ដែលមានឯកឧត្តមផ្ទាល់ជាប្រធាន និងស្នងការរាជធានី ជាអនុប្រធានអចិន្ត្រៃ ដើម្បីចុះបង្ក្រាបបទល្មើសល្បែងស៊ីសង។

ឯកឧត្តមបានបន្តថា ក្រុមការងាររបស់សាលារាជធានីនេះ ពេលចុះបង្ក្រាបនៅខណ្ឌណាមួយមិនឲ្យអភិបាលខណ្ឌចុះបង្ក្រាបជាមួយទេ ដោយខណ្ឌនោះត្រូវទទួលខុសត្រូវផងដែរ ហើយឯកឧត្តមនឹងស្នើប្រមុខរាជរដ្ឋាភិបាលឲ្យដកដំណែងអភិបាលខណ្ឌនោះ មិនលើកលែងឡើយ។

ឯកឧត្តម ឃួង ស្រេង បានបន្ថែមថា ខណ្ឌនីមួយៗពិតជាបានដឹង នូវអ្វីដែលខុសច្បាប់ចំពោះការបើកល្បែងស៊ីសងក្នុងខណ្ឌរបស់ខ្លួន។ ចំពោះអ្នកមានច្បាប់អនុញ្ញាត ត្រូវមានទីតាំងច្បាស់លាស់ មិនត្រូវចេះតែដាក់គ្រប់កន្លែងនោះទេ ហើយបើឃើញមានដាក់ល្បែងក្នុងផ្សារណាមួយ មានល្បែងឆ្នោតជាដើម គឺត្រូវដកប្រធានផ្សារនោះ។

អភិបាលរាជធានី បានបន្តទៀតថា មួយវិញទៀត ត្រូវពិនិត្យទីតាំងការធ្វើអាជីវកម្មបញ្ចាំដែលគ្មានច្បាប់អនុញ្ញាតក្នុងដែនសមត្ថកិច្ចរបស់ខ្លួន ហើយត្រូវបិទទាំងអស់។ អាជ្ញាធរខណ្ឌមិនត្រូវបិទបាំង និងពាក់ព័ន្ធនោះឡើយ ទាំងទីតាំងលេងល្បែងស៊ីសងខុសច្បាប់នានា រួមទាំងមិនត្រូវផ្ដល់ដំណឹងមុនដល់ទីតាំងល្បើស ពេលដឹងក្រុមការងារចុះបង្ក្រាប។

ជាមួយនេះ ឯកឧត្តម ឃួង ស្រេង បានជំរុញដល់អាជ្ញាធរខណ្ឌទាំងអស់ ត្រូវអនុវត្តឲ្យបានតាមអនុសាសន៍របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ពាក់ព័ន្ធនឹងការបង្ក្រាបល្បែងស៊ីសងនេះ ។

គួរបញ្ជាក់ថា ក្រោយកិច្ចប្រជុំនេះបញ្ចប់ទៅ គណៈបញ្ជាការឯកភាពរដ្ឋបាលខណ្ឌទាំង១៤ សហការជាមួយព្រះរាជអាជ្ញារងដែលមាននៅតាមបណ្តាខណ្ឌ ចុះបង្ល្រាបភ្លាមៗ ដោយត្រូវអនុវត្តចាប់ពីយប់នេះតទៅ៕ អត្ថបទ៖ បាន សុខរិទ្ធិ