ភ្នំពេញ៖ ក្រសួងវប្បធម៌ និងវិចិត្រសិល្បៈ បានដាក់ឲ្យដំណើរការនូវកាតាឡុកចំនួន ៦សារមន្ទីរ ដែលជាគម្រោងលើកដំបូង ស្មើនឹងសមច្ច័យចំនួនជាង ១៨០០ (វត្ថុបុរាណ) នៅលើប្រព័ន្ធអ៊ិនធឺណេត ។

ក្នុងពិធីសម្ពោធដាក់ឲ្យដំណើរការគម្រោងនេះ នៅថ្ងៃទី១៩ ខែកញ្ញា ឆ្នាំ២០២២ លោក ឆាយ វិសុទ្ធ ប្រធាននាយកដ្ឋានសារមន្ទីរ បានលើកឡើងថា សម្រាប់សារមន្ទីរទាំង៦ ដែលបានដាក់ឲ្យ​ដំណើរការ​កាតាឡុកនេះ ​មានសារមន្ទីរខេត្តតាកែវ អង្គរបុរី ខេត្តពោធិ៍សាត់ ព្រៃវែង កំពង់ឆ្នាំង និងខេត្តកំពង់ធំ ​និងគ្រោងដាក់បញ្ចូលនូវសារមន្ទីរផ្សេងៗទៀតផងដែរ​ ហើយគម្រោងនេះ មានកិច្ចសហការរវាងសារមន្ទីរជាតិ និងស្ថានទូតអាមេរិក ប្រចាំនៅកម្ពុជា ។

លោកបន្តថា គម្រោងនេះ ធ្វើឡើងក្នុងគោលបំណងសំខាន់ពីរ ទី១. ដើម្បីកែសម្រួល និងពង្រីក​ប្រព័ន្ធ​ទិន្នន័យសមុច្ច័យ​ ដែលមានសារមន្ទីរជាតិកម្ពុជាតាំងពីច្រើនឆ្នាំកន្លងមក ដើម្បីបំពាក់ប្រព័ន្ធ​នោះទៅដល់សារមន្ទីរខេត្ត និងទី២. ដើម្បីដាក់បញ្ចូល​ទិន្នន័យ​សមុច្ច័យ របស់សារមន្ទីរខេត្តទាំង​៦សារមន្ទីរ ទៅក្នុងកាតាឡុក ដែលនឹងបង្ហោះលើប្រព័ន្ធ​អ៊ីនធឺណែត​ដូចសារមន្ទីរជាតិបានធ្វើរួចមក​ហើយតាំងពីឆ្នាំ២០១៤ ។

លោកបន្តថា បន្ទាប់ពីពិធីសម្ពោធជាផ្លូវការនេះ​សាធារណជន អាចស្វែងរកទិន្នន័យ​សមុច្ច័យ​របស់សារមន្ទីរទាំង៦ នៅលើប្រព័ន្ធអ៊ីនធឺណែតដោយចូលតាមគេហទំព័ររបស់សារមន្ទីរជាតិ www.cambodiamuseum.info ការដាក់លបង្ហោះទិន្នន័យសមុច្ច័យទាំង៦ នេះជាការចូលរួមថែរក្សា​លើកតម្លៃ និងផ្សព្វផ្សាយអំពីសម្បត្តិបេតិកភណ្ឌខ្មែរទៅដល់មហាជន ពិសេសគឺ​សម្រួល​ដល់អ្នកស្រាវជ្រាវដែលមានបំណងស្វែងយល់បន្ថែមពីសម្បត្តិវប្បធម៌ខ្មែរនៅតាមបណ្ដាខេត្ត ។

ក្នុងឱកាសនោះដែរ ​ឯកឧត្តម ប្រាក់ សុវណ្ណារ៉ា រដ្ឋលេខាធិការក្រសួងវប្បធម៌ និងវិចិត្រសិល្បៈ មាន​ប្រសាសន៍ថា ការផ្ដល់ប្រព័ន្ធទិន្នន័យសម្រាប់សារមន្ទីរខេត្ត និងការរៀបចំឲ្យមានប្រព័ន្ធ​ថែរក្សា​ទិន្នន័យ​រួមមួយ​នៅសារមន្ទីរជាតិនេះ ​ប្រាកដជាទទួល​បាននូវការធានាសុវត្ថិភាពរយៈពេលវែង ក្នុងការ​ថែរក្សាទិន្នន័យសមុច្ច័យសារមន្ទីរទាំងអស់ ។

ឯកឧត្តមបន្តថា បានបន្តថា និយាយជារួមសមិទ្ធផលនេះ គឺជាផ្នែកមួយនៃកិច្ចការចងក្រងឯកសារ​និង​ថែរក្សាទិន្នន័យសម្បត្តិបេតិកភណ្ឌរបស់ខ្មែរ ហើយសូមថ្លែងអំណរគុណដល់រដ្ឋាភិបាល​សហរដ្ឋ​អាមេរិក ​ជាពិសេសស្ថានទូតអាមេរិកប្រចាំនៅកម្ពុជា ដែលតែងតែចូលរួមចំណែកយ៉ាងសកម្មក្នុង​កិច្ចការការពារ​សម្បត្តិបេតិកភណ្ឌកម្ពុជាតាំងពីដើមរៀងរហូតមក ជាពិសេសគឺអរគុណ​សម្រាប់​ការ​ឧបត្ថម្ភថវិកាដល់នាយកដ្ឋានសារមន្ទីរ ​ដើម្បីអនុវត្តគម្រោងជាមួយសារមន្ទីរទាំង៦នេះតែម្ដង ៕

អត្ថបទ៖ បាន សុខរិទ្ធិ