សហរដ្ឋអាមេរិក៖ ប្រធានាធិបតីសហរដ្ឋអាមេរិក លោក ចូ បៃដិន បានប្រកាសកាលពីថ្ងៃអង្គារថា មនុស្សពេញវ័យអាមេរិកនឹងអាចទទួល បានការចាក់វ៉ាក់សាំងបង្ការជំងឺ COVID-19 មិនហួសថ្ងៃទី១៩ ខែមេសាខាងមុខនេះនោះទេ។
លោក បៃដិន ប្រកាសកាលវិភាគថ្មី សម្រាប់ការចាក់វ៉ាក់សាំងជូនពលរដ្ឋពេញវ័យអាមេរិក ក្រោយដំណើរទស្សនកិច្ចរបស់លោក ទៅកាន់ទីតាំងចាក់វ៉ាក់សាំងនៅទីក្រុងអាឡិចហ្សាន់ដ្រៀ រដ្ឋវើជីនៀ ពោលគឺរំកិលរយៈពេលជិត ២សប្ដាហ៍ ឆាប់រហ័សជាងឱសានវាទកាលពីដំបូងរបស់លោក ដែលបានកំណត់ត្រឹមថ្ងៃទី១ ខែឧសភា។ លោក បៃដិន បាននិយាយថា វ៉ាក់សាំងបង្ការជំងឺ COVID-19 ចំនួន ១៥០លានដូសត្រូវបានចាក់រួចរាល់ក្នុងរយៈពេល ៧៥ថ្ងៃដំបូងនៃការកាន់អំណាចរបស់លោក ដែលជាចំនួនជិតដល់គោលដៅចាក់វ៉ាក់សាំងចំនួន ២០០លានដូសនៅថ្ងៃទី១០០ នៃការឡើងកាន់តំណែងរបស់លោក។
លោក បៃដិន បានជំរុញផងដែរឲ្យពលរដ្ឋអាមេរិកទាំងអស់ បន្តអនុវត្តន៍តាមវិធានការសុវត្ថិ ភាពជំងឺ COVID-19 ដោយលោកបានអះអាងថា ប្រទេសរបស់លោកមិនទាន់ស្ថិតនៅលើបន្ទាត់បញ្ចប់នៅឡើយទេ ហើយពួកគេអាចនឹងជួបរឿងវេទនាជាងនេះ និងឆ្លងជំងឺបន្ថែមទៀតមុនថ្ងៃទី៤ ខែកក្កដាខាងមុខ។ សូមបញ្ជាក់ថា កាលពីរយៈពេលប៉ុន្មានសប្ដាហ៍មុន លោក បៃដិន បានអំពាវនាវដល់បណ្ដារដ្ឋ ក្រុមកុលសម្ព័ន្ធ និងដែនដីមួយចំនួន ត្រូវតែចាក់វ៉ាក់សាំងដល់ពលរដ្ឋពេញវ័យសហរដ្ឋអាមេរិកទាំងអស់ មិនឲ្យយឺតជាងថ្ងៃទី១ ខែឧសភានោះទេ៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
