ភ្នំពេញ៖ ជាថ្មីម្តងទៀតឯកឧត្តម ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានជំរុញទឹកចិត្ត​ដល់​ស្រ្តីបំរើការងារក្នុងវិស័យមីន​ ត្រូវជំនះភាពភ័យខ្លាច និងផ្លាស់ប្តូរផ្នត់គំនិតឲ្យកាន់តែមាន​ភាព​រឹងមាំ។

ការជំរុញនេះបានធ្វើឡើងក្នុងឱកាសឯកឧត្តម ទេសរដ្ឋមន្រ្តី នៅល្ងាចថ្ងៃទី១៩ខែកញ្ញាម្សិលមិញ បានអញ្ជើញជាអធិបតីក្នុងពិធីបិទកិច្ចប្រជុំពិគ្រោះយោបល់ លើសេចក្តីព្រាងការកែសម្រួល​គោល​ការណ៍ណែនាំ ស្តីពីការ​បញ្ជ្រាប​យេនឌ័រក្នុងវិស័យសកម្មភាពមីន ដែលបានប្រព្រឹត្តិទៅនៅ​សណ្ឋាគារ Sunway រាជធានីភ្នំពេញ។

ឯកឧត្តម លី ធុជ បានបន្តថា រាជរដ្ឋាភិបាលកម្ពុជា បានដាក់ចេញនូវគោលនយោបាយក្នុង​ការ​លើកកម្ពស់​សមភាពយេនឌ័រ ​ការពារសិទ្ធិស្រ្តី និងផ្តល់តួនាទីឲ្យស្រ្តីឲ្យមានការចូលរួមគ្រប់​សកម្មភាព​សង្គម និងនយោបាយ។ បច្ចុប្បន្ននេះ វិស័យសកម្មភាពមីននៅកម្ពុជា មានការចូលរួម​ច្រើនពីស្រ្តីក្នុងការធ្វើសេចក្តីសម្រេចចិត្ត និងមានស្រ្តីប្រមាណ៥០ភាគរយ ​ជាអ្នកដោះមីន ក្នុងការ​ធានាសុខសុវត្ថិភាព និងផ្តល់ក្តីសង្ឃឹមជូនដល់ប្រជាពលរដ្ឋនៅតាមមូលដ្ឋាន។ មូលហេតុដែលវិស័យសកម្មភាពមីន ​មានមុខមាត់ជាស្រ្តី គឺដោយសារសហគមន៍ដែលងាយរង​គ្រោះ ​មានផលប៉ះពាល់ និងមានហានិភ័យខ្ពស់ដោយសារមីន​ ភាគច្រើនគឺជាស្ត្រី ដូចអ្វីដែល​យើងបានឃើញថា អ្នកទទួលផលប្រយោជន៍ពីការងារបោសសម្អាតមីន ប្រមាណជា៥០ភាគ រយ ជាស្ត្រីផងដែរ។ ដើម្បីឲ្យស្រ្តីរួចចាកផុតពីការព្រួយបារម្ភ ការភ័យខ្លាច ​និងផ្លាស់ប្តូរផ្នត់គំនិតឲ្យកាន់​តែ​មាន​ភាពរឹងមាំ​ និងក្លាហានលោកទេសរដ្ឋមន្រ្តី ​បានណែនាំនូវគោលការណ៍ ៧ចំណុច​សម្រាប់​ការចូលរួមរបស់ស្រ្តី៖ ១/.ត្រូវធ្វើអ្វីឱ្យល្អបំផុតដែលអាចធ្វើបាន ២/. អនុញ្ញាតឱ្យខ្លួនឯងត្រូវបានគេមើលឃើញ ៣/.ទៅមុខកាន់តែឆ្ងាយ កុំភ័យខ្លាច បញ្ចេញវាចេញឱ្យអស់ និងកុំទុកអ្វីចោល ៤/.នេះគឺជាខ្លួនឯង ៥/.នេះគឺជាកន្លែងដែលខ្លួនឯងមក ៦/. នេះគឺជាកំហុសឆ្គងរបស់ខ្លួនឯង និង ៧/.នេះគឺជាអ្វីដែលមានន័យថាជាកម្មសិទ្ធិរបស់អ្នក។

គោលការណ៍ណែនាំស្តីពីការបញ្ជ្រាបយេនឌ័រក្នុងវិស័យសកម្មភាពមីន គឺជាឧបករណ៍ជំនួយ​សម្រាប់​ការអនុវត្តការបញ្ជ្រាបយេនឌ័រនៅក្នុងសសរស្តម្ភសំខាន់ៗ​នៃសកម្មភាពមីន ដូចជាការ​ស្រាវជ្រាវ​និងបោសសម្អាតមីន/ស.ផ.ស. ការអប់រំអំពីគ្រោះថ្នាក់ដោយសារយុទ្ធភណ្ឌគ្រឿងផ្ទុះ កិច្ច​សង្គ្រោះជនរងគ្រោះថ្នាក់ដោយសារមីន ​និងការស្វែងរកការគាំទ្រមតិ។

អត្ថបទ៖ទូច សោភ័ណ