អូទ្រីស៖ កាលពីថ្ងៃអង្គារម្សិលមិញ ប្រេសិតពិសេសចិនបានជំរុញឲ្យសហរដ្ឋអាមេរិក ដកទណ្ឌកម្មខុសច្បាប់ទាំងអស់ចេញពីអ៊ីរ៉ង់ និងយុត្តាធិការ-ដៃវែងរបស់ពួកគេប្រឆាំងនឹងបុគ្គល និងអង្គភាពទី៣ ដែលរួមទាំងអ្នកមកពីចិនផងដែរ ស្របពេលដែលកិច្ចព្រមព្រៀងនុយក្លេអ៊ែរ ចាប់ផ្ដើមឡើងវិញ នៅក្នុងទីក្រុងវីយែនប្រទេសអូទ្រីស។
មន្ត្រីការទូតជាន់ខ្ពស់មកពីចិន បារាំង អាល្លឺម៉ង់ រុស្ស៊ី អង់គ្លេស និងអ៊ីរ៉ង់បានជួបជុំគ្នាក្នុងបន្ទប់បិទទ្វារនៅឯសណ្ឋាគារ Grand Hotel Wien។ ស្ថិតនៅលើកំពូលរបៀបវារៈនៃជំនួបលើកនេះ គឺការដកទណ្ឌកម្មសេដ្ឋកិច្ចចេញពីអ៊ីរ៉ង់ និងការអនុវត្តន៍វិធានការនុយក្លេអ៊ែរ។ ជំនួបស្ដីពីកិច្ចព្រមព្រៀងនុយក្លេអ៊ែរអ៊ីរ៉ង់នេះដែរ បានធ្វើឲ្យមានការចាប់អារម្មណ៍យ៉ាងខ្លាំង ពីសាធារណជនទូទាំងពិភពលោក ស្របពេលដែលក្រុមតំណាងមកពីអាមេរិកនៅទីក្រុងវីយែន ត្រូវសង្គ្រោះកិច្ចព្រមព្រៀងមួយនេះ។ លោក វ៉ាង ឈុន ប្រេសិតពិសេសចិនប្រចាំនៅអង្គការសហប្រជាជាតិ (UN) និងអង្គការអន្តរជាតិផ្សេងទៀតនៅទីក្រុងវីយែន បាននិយាយក្រោយជំនួបថា សហរដ្ឋអាមេរិកគួរតែដកទណ្ឌកម្ម ខុសច្បាប់ទាំងអស់ចេញពីទីក្រុងតេអេរ៉ង់ ហើយភាគីអ៊ីរ៉ង់ក៏គួរតែចាប់ផ្ដើមឡើងវិញការអនុវត្តន៍ទាំងស្រុង កិច្ចព្រមព្រៀងនុយក្លេអ៊ែរឆ្នាំ២០១៥ ដោយផ្អែកលើមូលដ្ឋានគ្រឹះ។
លោក វ៉ាង បន្តទៀតថា ការដកខ្លួនរបស់សហរដ្ឋអាមេរិក ចេញពីកិច្ចព្រមព្រៀងនុយក្លេអ៊ែរ និងបានដាក់ទណ្ឌកម្មអតិបរមាលើអ៊ីរ៉ង់ គឺជាមូលដ្ឋានសំខាន់មួយដែលនាំឲ្យមានស្ថានភាពដូចបច្ចុប្បន្ននេះ។ ហេតុដូច្នេះហើយ ការវិលត្រឡប់មករកកិច្ចព្រមព្រៀងមួយនេះ ឲ្យបានឆាប់រហ័សរបស់សហរដ្ឋអាមេរិកសំខាន់ខ្លាំងណាស់ ក្នុងការដោះស្រាយបញ្ហាទាំងអស់។ លោក វ៉ាង បានធ្វើការសង្កត់ធ្ងន់ថា ចិនជំទាស់ដាច់ណាត់ចំពោះទណ្ឌកម្មខុសច្បាប់ឯកតោភាគី ដាក់ជូនដោយសហរដ្ឋអាមេរិក ហើយទីក្រុងប៉េកាំងនឹងការពារសិទ្ធិស្របច្បាប់ និងអត្ថប្រយោជន៍របស់ខ្លួន៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
