ភ្នំពេញ៖ ក្រុមប្រឹក្សាជាតិប្រាក់ឈ្នួលអប្បបរមា បើកកិច្ចប្រជុំចុងក្រោយ ដើម្បីពិភាក្សា និង​កំណត់​ប្រាក់​ឈ្នួលអប្បបរមា ផ្នែកវាយនភណ្ឌ កាត់ដេរ ផលិតស្បែកជើង និងផលិត​ផលិត​ផល​ធ្វើ​ដំណើរ​ និង​កាបូប សម្រាប់ឆ្នាំ២០២៣។

ក្រុមប្រឹក្សាជាតិប្រាក់ឈ្នួលអប្បបរមា បានបើកកិច្ចប្រជុំលើកទី៤របស់ខ្លួនរួចហើយ ដោយ​នៅ​ថ្ងៃ​ពុធ​នេះ បើកកិច្ចប្រជុំចុងក្រោយ ដើម្បីពិភាក្សា និងកំណត់ប្រាក់ឈ្នួលអប្បបរមា ផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ២០២៣។

កិច្ចប្រជុំនេះដឹកនាំដោយ ឯកឧត្តម អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាល​វិជ្ជាជីវៈ តំណាងភាគីរដ្ឋាភិបាល និងមានការចូលរួមដោយ តំណាងភាគីនិយោជក និង​តំណាង​ភាគី​កម្មករនិយោជិត។

កាលពីកិច្ចប្រជុំលើកទីបួនរបស់ខ្លួន តំណាងភាគីនិយោជក សម្រេចតួលេខ ១៩៧ដុល្លារ, តំណាង​ភាគីរដ្ឋាភិបាល ១៩៨ដុល្លារ និងតំណាងភាគីកម្មករនិយោជិត លើកនូវតួលេខចំនួន៣ ផ្សេងគ្នា។

គួរបញ្ជាក់ថា ប្រាក់ឈ្នួលអប្បបរមាសម្រាប់កម្មករវិស័យវាយនភណ្ឌកាត់ដេរ ផលិតស្បែកជើង និងសម្ភារធ្វើដំណើរ នៅឆ្នាំ២០២២នេះ ពុំមានការដំឡើងពីភាគីនិយោជកនោះទេ គឺរក្សាទុកត្រឹម ១៩២ដុល្លារ ដូចឆ្នាំ២០២១ដដែល ប៉ុន្តែលោកនាយករដ្ឋមន្ត្រី ហ៊ុន សែន បានបន្ថែម២ដុល្លារ ដែលធ្វើឱ្យប្រាក់ឈ្នួលគោលកម្មករឆ្នាំ២០២២ កើនដល់១៩៤ដុល្លារ៕ អត្ថបទ៖ ឈិត បូរ៉ាវី