​ជប៉ុន៖ ការ​ធ្វើ​យុទ្ធនាការ​បាន​ចាប់ផ្ដើម​ជា​ផ្លូវការ​កាលពី​ថ្ងៃ​អង្គារ​ សម្រាប់​តំណែង​ជាន់ខ្ពស់​របស់​គណបក្ស​ប្រជាធិបតេយ្យ​សេរី​ហៅ​កាត់​ថា (LDP) ដែល​កំពុង​កាន់អំណាច​ដោយមាន​បេក្ខជន​ចំនួន ​៣​រូប​កំពុង​ប្រជែង​គ្នា​ដើម្បី​ស្នង​តំណែង​បន្ត​ពី​លោកនាយក​រដ្ឋមន្ត្រី​ Shinzo Abe។​ លោក ​Abe​ បាន​លាលែង​ពី​តំណែង​ ដោយសារ​បញ្ហា​សុខភាព​ដែល​មាន​ឡើងជា​បន្តបន្ទាប់ ​ដែល​បាន​ធ្វើ​ឱ្យ​ការ​កាន់​តំណែង​លើកដំបូង​របស់​លោក​ជា​នាយករដ្ឋមន្ត្រី ​ឈាន​ដល់​ការ​បញ្ចប់​ភ្លាមៗ​ក្នុង​ឆ្នាំ​២០០៧។

​លោកនាយក​រដ្ឋមន្ត្រី​ជប៉ុន Shinzo Abe កាលពី​ថ្ងៃ​សុក្រ​ ទី​២៨ ខែ​សីហា​បាន​និយាយ​ថា លោក​បាន​សម្រេច​ចិត្ត​លាលែង​ពី​តំណែង ​ដោយសារតែ​ស្ថានភាព​សុខភាព​កាន់តែ​ធ្ងន់ធ្ងរ​។ ការ​ប្រកួត​ប្រជែង​នេះ​គឺ​រវាង​លោក​ Yoshihide Suga អាយុ ៧១​ឆ្នាំជាអ្នកនាំពាក្យ​ជាន់ខ្ពស់​របស់​រដ្ឋាភិបាល​ និង​ជា​រដ្ឋមន្ត្រី​ទទួលបន្ទុក​ទីស្ដីការគណៈរដ្ឋមន្ត្រី​ជប៉ុន​។ លោក Shigeru Ishiba អាយុ​ ៦៣​ឆ្នាំ​ជា​អតីត​រដ្ឋមន្ត្រី​ការពារ​ជាតិ និង​លោក ​Fumio Kishida អាយុ​ ៦៣ឆ្នាំដែល​ជា​ប្រធាន​គោលនយោបាយ​ របស់​គណ​បក្ស​កាន់​អំណាច​ប្រជាធិបតេយ្យ​សេរី​។​ អ្នកឈ្នះ​បោះឆ្នោត​ក្នុង​បក្ស​នៅ​ថ្ងៃ​ទី​១៤ ​ខែ​កញ្ញា​ខាងមុខ​ គឺ​ស្ទើរតែ​ប្រាកដ​ថា​នឹង​ក្លាយ​ជា​នាយករដ្ឋមន្ត្រី​បន្ទាប់ ​ដោយ​សារ​ឥទ្ធិពល​របស់​គណបក្ស LDP នៅ​ក្នុង​សភា​ទាំង២ នៃ​សភា​ទ្វេភាគី​របស់​ជប៉ុន​៕

អត្ថបទ៖ សុខ​មាន