កំពង់ស្ពឺ៖ក្រោយរាជរដ្ឋាភិបាលសម្រេចហាមឃាត់ការធ្វើដំណើរឆ្លងពីខេត្តមួយទៅបណ្តាមួយផ្សេងទៀត ឯកឧត្ដម វ៉ី សំណាង អភិបាលខេត្តកំពង់ស្ពឺ បានថ្លែងថា អាជ្ញាធរមានសមត្ថកិច្ចកំពុងបន្តអនុវត្តយ៉ាងម៉ឺងម៉ាត់ ចំពោះការធ្វើដំណើរណាមិនចាំបាច់ ដែលនេះវិធានទប់ស្កាត់ការឆ្លងពីតំបន់មួយទៅតំបន់មួយ។
ក្នុងដំបូងនៃការអនុវត្តទៅនឹងសេចក្តីសម្រេចរបស់រាជរដ្ឋាភិបាល ស្តីពីការហាមឃាត់ការធ្វើដំណើរពីខេត្តមួយទៅបណ្តាខេត្តមួយផ្សេងទៀត និងបិទរមណីយដ្ឋានទេសចរណ៍នៅទូទាំងប្រទេស នៅថ្ងៃទី០៧ ខែមេសា ឆ្នាំ២០២១នេះ ឯកឧត្ដម វ៉ី សំណាង អភិបាលខេត្តកំពង់ស្ពឺបានចុះពិនិត្យគោលដៅដែលបានរៀបចំនួន២ ដែលមានព្រំប្រទល់រវាងខេត្តកំពង់ស្ពឺ ជាមួយខេត្តកណ្តាល និងខេត្តព្រះសីហនុ។ ក្នុងនោះអនុវត្តតាមសេចក្តីសម្រេចរបស់ប្រមុខរាជរដ្ឋាភិបាល ឯកឧត្ដម វ៉ី សំណាង បានសម្តែងការគាំទ្រចំពោះវិធានការរបស់សម្តេចតេជោនាយករដ្ឋមន្ត្រី ដើម្បីឆ្លើយតបជុំវិញហានិភ័យ នៃការឆ្លងរីករាលដាលដោយជំងឺកូវីដ១៩។
ឯកឧត្ដម វ៉ី សំណាង បានបញ្ជាក់ថា មកទល់ពេលនេះគណ:បញ្ជាការឯកភាពខេត្តកំពង់ស្ពឺ បានពង្រាយនូវកងកម្លាំងដើម្បីអនុវត្តតាមសេចក្តីសម្រេចរបស់ប្រមុខរាជរដ្ឋាភិបាលយ៉ាងម៉ឺងម៉ាត់បំផុត ដោយឯកឧត្តមបានចាត់ទុកស្ថានភាពនៃការឆ្លងរាលដោយជំងឺកូវីដ១៩ក្នុងពេលបច្ចុប្បន្នឈានចូលដល់បន្ទាត់ក្រហម។
ឯកឧត្តម វ៉ី សំណាង បានសង្កត់ធ្ងន់ថា ក្នុងករណីមិនមាននូវសេចក្តីសម្រេចនេះ អាចធ្វើឱ្យស្ថានការណ៍នៃជំងឺកូវីដ បង្កទៅជាភាពធ្ងន់ធ្ងរ ខណ:ខេត្តកំពង់ស្ពឺមានតែករណីវិជ្ជមានកូវីដ១៩ តាមរយៈប្រជាពលរដ្ឋចល័តពីក្រៅតំបន់តែប៉ុណ្ណោះ។
យោងតាមសេចក្តីសម្រេចរបស់រាជរដ្ឋាភិបាលកម្ពុជា នាយប់ថ្ងៃទី០៦ ខែមេសា ឆ្នាំ២០២១នេះ បានបញ្ជាក់ថា ការសម្រេចការបិទមិនឲ្យចេញ-ចូលពីខេត្តមួយទៅកាន់ខេត្តមួយទៀត គឺដើម្បីទប់ស្កាត់ការរីករាលដាលនូវជំងឺកូវីដ១៩ ចូលសហគមន៍បន្តទៀត ប៉ុន្តែការដឹកជញ្ជូនទំនិញគ្រប់ប្រភេទទាំងតាមផ្លូវគោក ផ្លូវទឹក និងផ្លូវដែក ត្រូវបានលើកលែង និងករណីចាំបាច់មួយចំនួនទៀតរួមមាន ការធ្វើដំណើររបស់មន្ត្រីរាជការសាធារណៈទាំងថ្នាក់ជាតិ និងថ្នាក់ក្រោមជាតិ ក្នុងគោលដៅបំពេញការងារប្រចាំថ្ងៃ ដោយត្រូវបង្ហាញដល់កងកម្លាំងមានសមត្ថកិច្ចត្រួតពិនិត្យនូវប័ណ្ណសម្គាល់ការងាររបស់ខ្លួន ឯកសារបេសកកម្ម និងឯកសារពាក់ព័ន្ធផ្សេងទៀត។
ការធ្វើដំណើររបស់កងកម្លាំងប្រដាប់អាវុធគ្រប់ប្រភេទ ក្នុងគោលដៅបំពេញភារកិច្ចរបស់ខ្លួន ដោយរួមទាំងការដឹកជញ្ជូនពលករ ដែលធ្វើដំណើរវិលត្រឡប់ពីក្រៅប្រទេស ចូលមកក្នុងព្រះរាជាណាចក្រកម្ពុជា ទៅកាន់ស្រុកកំណើតក្នុងគោលបំណងដើម្បីធ្វើចត្តាឡីស័ក, រថយន្តសង្គ្រោះបន្ទាន់របស់មន្ទីរពេទ្យរដ្ឋនិងឯកជន រថយន្តពន្លត់អគ្គិភ័យ រថយន្តបម្រើសេវាដឹកជញ្ជូនសំរាម និងកាកសំណល់ ការដឹកជញ្ជូនកម្មករ ទៅកាន់ទីកន្លែងការងារនៅតាមរោងចក្រ សហគ្រាស ដែលត្រូវមានប័ណ្ណអនុញ្ញាតចេញដោយក្រសួងការងារ និងបណ្តុះបណ្តាលវិជ្ជាជីវៈ ឬមន្ទីរការងារ និងបណ្តុះបណ្តាលវិជ្ជាជីវៈ .ការធ្វើដំណើររបស់ពលរដ្ឋទៅកាន់មន្ទីរពេទ្យ ឬមណ្ឌលសុខភាព ដែលនៅជិតបំផុត ដើម្បីទទួលបាននូវសេវាសុខភាពចាំបាច់ និងបន្ទាន់ ដោយកំណត់ចំនួនមនុស្សមិនឱ្យលើសពី៤នាក់ សម្រាប់ករណីនីមួយៗ។
បន្ថែមលេីសពីនេះ ការសម្រេចអំពីការហាមឃាត់ការធ្វើដំណើរពីខេត្តទៅខេត្តមួយផ្សេងទៀតនេះ សម្រាប់រាជធានីភ្នំពេញ និងខេត្តកណ្តាល ត្រូវបានចាត់ទុកជាតំបន់មួយមិនស្ថិតនៅក្រោមវិសាលភាពនៃការហាមឃាត់ការធ្វើដំណើរឆ្លងកាត់ ចេញ-ចូល ទៅវិញទៅមកនោះទេ៕ អត្ថបទ៖ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
