ភ្នំពេញ៖ ថ្ងៃទី ២១កញ្ញា ឆ្នាំ ២០២២នេះ ជាថ្ងៃដំបូងដែលខាងរថភ្លើង ធ្វើការចែកសំបុត្រធ្វើដំណើរ​ដោយ​មិនគិតថ្លៃ សម្រាប់ការឈប់សម្រាកឱកាសភ្ជុំបិណ្ឌនាពេលខាងមុខ។ ថ្ងៃដំបូងនៃការចែកសំបុត្រនេះ គឺមានវត្តមានប្រជាពលរដ្ឋទាំងចាស់ ​ទាំងក្មេងជាច្រើនរយនាក់ មកតម្រង់ជួរដើម្បីរង់ចាំទទួលយកសំបុត្រតាំងពី​ព្រឹក​ព្រលឹម។

ជាការចូលរួមជាមួយរាជរដ្ឋាភិបាលកម្ពុជា ក្រុមហ៊ុន Royal Railway Plc. បានសម្រេចផ្ដល់​ការ​ជិះរថភ្លើងដោយមិនគិតថ្លៃរយៈពេល ៤ថ្ងៃចាប់ពីថ្ងៃទី ២៣ដល់ថ្ងៃទី ២៦​ ខែកញ្ញាឆ្នាំ ២០២២។ ចំពោះសំបុត្រ ​សម្រាប់ការជិះរថភ្លើងដោយមិនគិតថ្លៃ គឺនឹងចែកជូនចាប់ពីថ្ងៃទី២១ និងថ្ងៃទី ២២ ខែកញ្ញា។

ការចែកសំបុត្ររថភ្លើងធ្វើដំណើរដោយមិនគិតថ្លៃនេះ គឺធ្វើឡើងចំនួន ៤ដង ក្នុងមួយថ្ងៃ ដោយ​ពេលព្រឹកចែកនៅម៉ោង ៩.០០ ព្រឹក និងម៉ោង ១១.០០ រីឯពេលរសៀលចែកនៅម៉ោង ១.០០ និងម៉ោង ៣.០០ រសៀល ដោយម៉ោងនីមួយៗ គឺសម្រាប់ការចេញដំណើរខេត្តគោលដៅ និងថ្ងៃចេញដំណើរផ្សេងៗគ្នា។ នេះជាការបញ្ជាក់របស់ កញ្ញា សក់ វណ្ណនី ប្រធានគ្រប់គ្រងខ្សែអ្នកដំណើររបស់ក្រុមហ៊ុន Royal Railway Plc.។

សម្រាប់ពលរដ្ឋដែលបានមករង់ចាំយកសំបុត្រធ្វើដំណើរដោយមិនគិតថ្លៃនៅថ្ងៃនេះ មើលឃើញថា​ការផ្ដល់ជូនការជិះមិនគិតថ្លៃនេះ ជាការសម្រួលដល់ការចំណាយប្រជាពលរដ្ឋ និងជា​ការចូលរួមកាត់បន្ថយការកកស្ទះ ​និងគ្រោះថ្នាក់ចរាចរណ៍ផងដែរ។

ការធ្វើដំណើរនេះ គឺមានចំនួនពីរខ្សែគោលដៅ ដោយខ្សែទី ១ចាប់ផ្ដើមនៅម៉ោង ៦.៤០នាទីព្រឹក ចាកចេញពីរាជធានីភ្នំពេញ ​ទៅកាន់ខេត្តកំពង់ឆ្នាំង ពោធិ៍សាត់ និងបាត់ដំបង រីឯម៉ោង ៣.០០រសៀល គឺសម្រាប់ការធ្វើដំណើរពីខេត្តគោលដៅទាំង ៣ចូលមករាជធានីភ្នំពេញវិញ។

ចំពោះខ្សែគោលដៅទី ២ គឺចាប់ផ្ដើមនៅម៉ោង ៧.០០ព្រឹក ដែលមានទិសដៅចេញពីរាជធានីភ្នំពេញ ទៅខេត្តតាកែវ កំពត និងព្រះសីហនុ ​និងធ្វើដំណើរពីបណ្ដាខេត្តទាំង ៣ចូលមករាជធានីភ្នំពេញវិញ​នៅម៉ោង ២.០០រសៀល។

ចំពោះការផ្ដល់ជូនការធ្វើដំណើរដោយមិនគិតថ្លៃនេះ ភាគីក្រុមហ៊ុនក៏បានសំណូមពរ ឱ្យ​ប្រជា​ពលរដ្ឋ​ត្រូវមកដល់មុនម៉ោងចេញដំណើរ ​ក្នុងរយៈពេលមួយម៉ោងមុន ​ដើម្បីងាយស្រួលរៀបចំ​អង្គុយទៅតាមលេខកៅអីបានត្រឹមត្រូវ៕ អត្ថបទ៖ គឹមហុក