ភ្នំពេញ៖ ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បានផ្តល់មតិមួយចំនួន​ដល់​មន្រ្តី នគរបាលដែលទើបបញ្ចប់វគ្គបណ្តុះបណ្តាលកម្រិតបឋមវិជ្ជាជីវៈនគរ ដើម្បីធ្វើយ៉ាងណា​បង្ការ​ទប់ស្កាត់ និងបង្រ្កាបបទល្មើសនានាសំដៅរក្សាឲ្យបានគត់មត់នូវសន្តិសុខជាតិ សណ្តាប់ធ្នាប់​របៀបរៀបរយសង្គម ក្នុងចរន្តនៃសាកលភាវូបនីយកម្ម និងការអភិវឌ្ឍសេដ្ឋកិច្ចសង្គម ។

ក្នុងឱកាសអញ្ជើញជាអធិបតីភាពពិធីបិទវគ្គបណ្តុះបណ្តាលកម្រិតបឋមវិជ្ជាជីវៈនគរបាលជំនាន់ទី៦ ចំនួន២៥៧នាក់ ក្រោយពីពួកគេបានសិក្សាអស់រយៈពេលបីខែនៅសាលានគរបាលមិត្តភាពកម្ពុជា-វៀតណាម ដែលស្ថិតនៅខេត្តកំពង់ស្ពឺ នៅថ្ងៃទី​២១ ខែកញ្ញានេះ ឧត្តមសេនីយ៍ឯក ឆាយ គឹមខឿន បានលើកឡើងថា ជាគោលការណ៍យើងត្រូវបន្តខិតខំពង្រឹងនគរបាលជាតិគ្រប់ថ្នាក់គ្រប់ផ្នែក ដែល​ជា​កម្លាំង​អនុវត្តច្បាប់​ឲ្យមានជំនាញវិជ្ជាជីវៈខ្ពស់ ​ជាមួយការគោរពឲ្យបានត្រឹមត្រូវ​នូវ​ច្បាប់របស់រដ្ឋ លើ​កម្ពស់ការ​គោរព​សិទ្ធិមនុស្ស​ការគោរពសិទ្ធិសេរីភាព​របស់ប្រជាពលរដ្ឋដោយត្រូវការគោរព​ឲ្យ​បាន​ម៉ឺងម៉ាត់​នូ​វ​ក្រមសីលធម៌​វិជ្ជាជីវៈ​ ត្រូវមានភាពស្មោះត្រង់​ក្នុងវិជ្ជាជីវៈរបស់ខ្លួន ត្រូវ​ប្រកាន់ខ្ជាប់​នូវវិន័យ សេចក្តីថ្លៃថ្នូរ ​និងភាពស្អាតស្អំក្នុងការ​ បម្រើប្រជាពលរដ្ឋដោយស្មើភាព ហើយត្រូវ​ខិតខំ​ពុះពាររួមគ្នាក្នុងការលុបបំបាត់នូវបាតុភាពអសកម្មផ្សេងៗ​ ក្នុងជូរនគរបាលជាតិដើម្បីរក្សា និង​លើក​កម្ពស់ជាប្រចាំនូវជំនឿរបស់ប្រជាពលរដ្ឋមកលើកម្លាំង ​នគរបាលជាតិ សំដៅធានា​ឲ្យ​មានការ​ចូលរួម​របស់​ប្រជាពលរដ្ឋ​ក្នុងការរក្សាសន្តិសុខសណ្តាប់ធ្នាប់របៀប រៀបរយសង្គម​ប្រកប​ដោយ​ប្រសិទ្ធភាព។

ទន្ទឹមនឹងការជម្រុញអនុវត្តគោលនយោបាយ«ភូមិ-ឃុំមានសុវត្ថិភាព»ដើម្បីពង្រឹងឲ្យបានកាន់តែ រឹងមាំ​ថែមទៀតនូវសន្តិសុខ សុវត្ថិភាព ​សណ្តាប់ធ្នាប់សាធារណៈ និងគោរពច្បាប់សំដៅ​ជម្រុញ​ឲ្យបាន​ខ្លាំងក្លា​នូវការអភិវឌ្ឍសេដ្ឋកិច្ចសង្គមប្រកបដោយចីរភាពរយៈពេលវែងជាបន្តទៀត និង​ដើម្បីផ្តល់ភាពកក់ក្តៅ ជូនប្រជាជន និងសង្គមទាំងមូល រាជរដ្ឋាភិបាលនឹងកំពុង​អនុវត្តនូវយុទ្ធនាការ​ព្រមៗគ្នាទូទាំងប្រទេស ​ដើម្បីបង្ការ ទប់ស្កាត់ បង្រ្កាបបទល្មើស រួមមានការប្រយុទ្ធប្រឆាំង​គ្រឿង​ញៀន ល្បែង​ស៊ីសងខុសច្បាប់ ​អំពើលួចប្លន់ ​និងបទល្មើសគ្រប់ប្រភេទទៀត។

ឧត្តមសេនីយ៍ឯក ​ឆាយ គឹមខឿន​ បានប្រាប់​ដល់សិក្ខាកាម​ទាំងអស់ត្រូវ​ដាក់ចេញនូវវិធានការ ​បង្ការ ទប់​ស្កាត់ជាមុន​ និងចាត់ចែងប្រើប្រាស់គ្រប់​មធ្យោបាយ​ដើម្បី​បង្រ្កាបឲ្យបានទាន់ពេលវេលា ​និងមាន ប្រសិទ្ធភាព​ចំពោះហេតុការណ៍ដែលកើតឡើងក្នុងមូលដ្ឋានរបស់ខ្លួន ​ជាពិសេសអំពើលួចប្លន់ និង​បទល្មើសផ្សេងៗទៀត។

បន្តខិតខំរៀបចំសណ្តាប់ធ្នាប់​សាធារណៈឲ្យកាន់តែល្អប្រសើរស្របតាមការវិវត្តន៍ រីកចំរើនរបស់​ប្រទេសជាតិ។ ​ក្នុងនោះបញ្ហាដែលត្រូវយកចិត្តទុកដាក់ ​គឺសណ្តាប់ធ្នាប់ចរាចរណ៍ ដែលនៅតែ ជា​បញ្ហាប្រឈមដ៏​ធ្ងន់ធ្ងរ​បណ្តាលឲ្យមានគ្រោះថ្នាក់ដល់​អាយុជីវិត ​និងទ្រព្យសម្បត្តិប្រជាពលរដ្ឋ​ជារៀងរាល់ថ្ងៃនោះ។

ដើម្បីលើកកម្ពស់ប្រសិទ្ធភាពខ្ពស់​ក្នុងការអនុវត្តភារកិច្ចខាងលើនេះ ត្រូវបន្តធ្វើ ការកែ​ទម្រង់​នគរបាល​ជាតិ​ឲ្យបានស៊ីជម្រៅ​ ដោយខិតខំបង្កើនការបណ្តុះបណ្តាល ​កសាងសមត្ថភាពកង កម្លាំង​នគរបាលជាតិគ្រប់ថ្នាក់ដើរទន្ទឹមនឹងការលើកម្ពស់មនសិការវិជ្ជាជីវៈការគោរពវិន័យសីលធម៌ ដើម្បីលើកកម្ពស់ គុណភាព សមត្ថភាពនគរបាល​ ក្នុងការបម្រើ និងផ្តល់សន្តិសុខជូនពលរដ្ឋ ប្រកប​ដោយស្មោះត្រង់និងទាន់ពេលវេលា។

ឧត្តមសេនីយ៍ឯកអគ្គស្នងការរងនគរបាលជាតិ បានលើកឡើងទៀតថា ចំពោះការងារ​បណ្តុះ​បណ្តាល និងបំប៉នជំនាញដល់មន្រ្តីនគរបាលជាតិ សេនាធិការដ្ឋានត្រូវបន្តកិច្ចសហការជាមួយ​អង្គភាពជំនាញពាក់ព័ន្ធនានា​ដើម្បីរៀបចំកម្មវិធីសិក្សា​ និងខ្លឹមសារបង្ហាត់បង្រៀន​ឲ្យ​ស្រប​តាមសភាពការណ៍វិវត្តន៍ថ្មីៗ​ របស់សង្គមជាតិ​ ក្នុងនោះមុខវិជ្ជាជីវៈ ​បច្ចេកទេសព័ត៌មានវិទ្យា ក៏​ជាមុខវិជ្ជាសំខាន់មួយដែលត្រូវផ្តោត ការយកចិត្តទុកដាក់​បណ្តុះបណ្តាល​និងបំប៉នដល់កងកម្លាំង​នគរបាលជាតិផងដែរ ​ដើម្បីធ្វើយ៉ាងណា ​បង្កើនសមត្ថភាពដល់​នគរបាល់គ្រប់កម្រិតឲ្យ​កាន់​តែល្អប្រសើ​បន្ថែមទៀត៕ អត្ថបទ៖ បាន ចក់