កោះកុង៖ លោកជំទាវ មិថុនា ភូថង អភិបាលខេត្តកោះកុង សុំការអធ្យាស្រ័យពីប្រជាពលរដ្ឋ និង​អ្នកទេសចរ​ដែលធ្វើដំណើរឆ្លងកាត់តាមបណ្តោយផ្លូវជាតិលេខ៤៨ ខណៈចំណុចមួយចំនួន​រងការខូចខាតខ្លាំង។

កាលពីពេលថ្មីៗនេះ លោកជំទាវ មិថុនា ភូថង អះអាងថា រដ្ឋបាលខេត្តកោះកុង មិនព្រងើយកន្តើយ​នឹងការលំបាកធ្វើចរាចរណ៍តាមកំណាត់ផ្លូវជាតិលេខ៤៨ របស់បងប្អូនប្រជាពលរដ្ឋ និង​អ្នកទេសចរនោះទេ អំឡុងខែវស្សា។

លោកជំទាវ តែង​ក្ដោបក្ដាប់​ព័ត៌មានពីស្ថានភាពការផ្លូវជាតិលេខ៤៨ ដែលកំពុងអនុវត្ត​គម្រោង​ស្ថាបនា​ជាប្រចាំជាមួយនឹងតំណាងក្រុមហ៊ុនសាងសង់ ដើម្បី​សម្របសម្រួល​ដោះស្រាយ​ជួសជុល​ថែទាំ​បន្ទាន់​លើចំណុចដែលរងការខាតខូចខ្លាំង ដោយសារតែរដូវវស្សាមាន​ភ្លៀង​ធ្លាក់ខ្លាំង​ដែល​ជាហេតុធ្វើឱ្យលំបាកក្នុងការជួសជុល។

លោកជំទាវ អភិបាលខេត្តកោះកុង បានបន្ដទៀតថា ទោះបីបែប​នេះក្តី ក្រុមហ៊ុនសាងសង់ ក៏ប្រឹងប្រែងយកចិត្តទុកដាក់​ជួសជុល​ខ្លាំងណាស់ ហើយនៅដើមរដូវប្រាំង ក្រុមហ៊ុនសាងសង់ នឹង​ពន្លឿនការស្ថាបនា និងជួសជុលឱ្យបានឆាប់រហ័ស។​ ជាសុវត្ថិភាពរាល់ការធ្វើចរាចរណ៍ មេត្តា​បង្កើនការប្រុងប្រយ័ត្នខ្ពស់ចំពោះការបើកបរលើផ្លូវដែលមានស្ថានភាពរអិលផងដែរ។

ដោយឡែក ​លោក អន ដាវុធ ប្រធានមន្ទីរសាធារណការ ​និង​ដឹក​ជញ្ជូន​ខេត្តកោះកុង លើកឡើង​នៅម៉ោង១២ថ្ងៃទី២១ ​ខែកញ្ញានេះថា គម្រោងអភិវឌ្ឍន៍​ស្ថាបនាផ្លូវជាតិលេខ៤៨សព្វថ្ងៃមិនស្ថិតនៅ​ក្រោម​ការគ្រប់គ្រងរបស់លោកនោះទេ ​ដោយក្រុមហ៊ុនម៉ៅ​ការសងសង់ជាអនុវត្ត។​ ផ្លូវជាតិលេខ៤៨ ត្រូវបានចាត់ទុកថា​ ផ្លូវហួសសុពលភាពប្រើប្រាស់ ​ដូច្នេះវាប្រឈមនឹងភាពខូចខាត ពិសេសអំឡុង​ពេលភ្លៀងធ្លាក់ជោគជាំ។

បែបនេះក្តី លោក អន ដាវុធ អះអាងថា នៅពេលមេឃរាំងភ្លៀងតិច​ ក្រុមហ៊ុនអនុវត្តគម្រោង​នឹង​ពិនិត្យ និង​ជួសជុល​ជាលក្ខណៈបណ្តោះអាសន្នសម្រួល​ដល់​ការធ្វើដំណើរប្រជាពលរដ្ឋ ជាពិសេស​អ្នកទេសចរដែលមកលេងកម្សាន្តនៅខេត្តកោះកុង​ នារដូវបុណ្យភ្ជុំបិណ្ឌ៕ អត្ថបទ៖ ឈឹម មករា