ភ្នំពេញ៖ តាមការគ្រោងខេត្តចំនួន៥ ដែលអង្គភាពស៊ីម៉ាក់ទទួលបន្ទុកធ្វើការបោសសម្អាតមីន ក្នុងគម្រោងសម្តេចតេជោ សម្រាប់សកម្មភាពមីន នឹងបញ្ចប់មុនផែនការ ខណៈបច្ចុប្បន្នមានមួយខេត្តបានបញ្ចប់។

ក្នុងពិធីត្រួតពិនិត្យមុខសញ្ញាយោធិនចូលនិវត្តន៍ ដែលជាអតីតមន្រ្តី-បុគ្គលិក នៃមជ្ឈមណ្ឌសកម្ម ភាពកម្ចាត់មីនកម្ពុជា នៅថ្ងៃទី២១ ខែកញ្ញានេះ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) បានប្រាប់អ្នក​សារព័ត៌មានថា បច្ចុប្បន្ន ការងារបោសសម្អាតមីននៅខេត្តចំនួន៥​ ដំណើការយ៉ាងរលូន ដែល​តាម​ផែនការ ​ការបោសសម្អាតមីនក្នុង ខេត្តតាកែវ កំពង់ចាម និងខេត្តកំពង់ឆ្នាំង នឹងបញ្ចប់នៅចុងឆ្នាំនេះ ប៉ុន្តែការអនុវត្តជាក់ស្តែង នឹងបញ្ចប់ មុនពីរខែ ខណៈបច្ចុប្បន្ន ខេត្តកំពង់ឆ្នាំង បានបញ្ចប់ការ​សម្អាតមីនហើយ។

ឯកឧត្ដម បានឱ្យដឹងទៀតថា ខេត្តស្វាយរៀង និងកំពត តាមគម្រោង នឹងបញ្ចប់ការបោសសម្អាត មីន ​នៅអំឡុងខែមិថុនា ឆ្នាំ២០២៣ តែតាមការរំពឹង នឹងបញ្ចប់នៅអំឡុងខែមីនាវិញ។ បន្ទាប់ពី​បញ្ចប់ការ ​សម្អាតមីនក្នុងខេត្តចំនួន៥នេះ អង្គភាពស៊ីម៉ាក់ ​គ្រោងនឹងស្នើទៅសម្តេចតេជោ តាមរយៈអាជ្ញាធរមីន​ ធ្វើការបោសសម្អាតមីនតាមខេត្តផ្សេងៗមួយចំនួនទៀត។

កាលពីខែមុន អាជ្ញាធរមីន និងអង្គភាពស៊ីម៉ាក់ ​បានចុះកិច្ចសន្យាលើកិច្ចព្រមព្រៀង ​ស្តីពីការងារ បោសសម្អាតមីន ក្នុងខេត្តចំនួន០៥ រួមមាន ខេត្តតាកែវ ខេត្តកំពង់ចាម ខេត្តកំពង់ឆ្នាំង ​ខេត្តកំពត និង ខេត្តស្វាយរៀង ព្រមទាំងត្រូវប្រកាសជាខេត្តអស់មីន ក្នុងទំហំផ្ទៃដីសរុបចំនួនជាង ៣០,៩១​គីឡូម៉ែត្រ ក្រឡា ក្រោមគម្រោងសម្តេចតេជោ សម្រាប់សកម្មភាពមីន “ផ្តល់ដីសុវត្ថិភាព បង្កើតស្នាមញញឹម” ។

គម្រោងសម្តេចតេជោ សម្រាប់សកម្មភាពមីន ក្នុងដំណាក់កាលដំបូង ​អាជ្ញាធរមីន​ បានបែងចែក ឲ្យ​ប្រតិបត្តិករដោះមីនជាតិសំខាន់ៗចំនួន៣ រួមមាន៖​ បញ្ជាការដ្ឋានកងទ័ពជើងគោក, មជ្ឈមណ្ឌលជាតិ គ្រប់គ្រងកងកម្លាំងរក្សាសន្តិភាព ​បោសសម្អាតមីន​ និងកាកសំណល់សង្រ្គាម និង​មជ្ឈមណ្ឌលសកម្មភាព កម្ចាត់មីនកម្ពុជា (CMAC) ៕អត្ថបទ៖ ទូច សោភ័ណ